ବେଙ୍ଗାଲୁରୁ,୨୦।୯ : ସୋସିଆଲ ମିଡିଆ ବ୍ୟବହାର ପାଇଁ ବୟସ ସୀମା ଧାର୍ଯ୍ୟ ସମ୍ପର୍କରେ କର୍ନାଟକ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି। ହାଇକୋର୍ଟ କହିଛନ୍ତି ଦେଶରେ ସୋସିଆଲ ମିଡିଆ ବ୍ୟବହାର ପାଇଁ ବୟସ ସୀମା ସ୍ଥିର କରିବାକୁ କେନ୍ଦ୍ର ସରକାର ବିଚାର କରିବା ଉଚିତ। ହାଇକୋର୍ଟ ଏକ ମୌଖିକ ମନ୍ତବ୍ୟରେ କହିଛନ୍ତି ସୋସିଆଲ ମିଡିଆ ବ୍ୟବହାର କରିବାକୁ ବୟସ ସୀମା ଅତି କମରେ ୨୧ ହେବା ଉଚିତ।
କର୍ନାଟକ ହାଇକୋର୍ଟର ଦୁଇ ଜଣିଆ ଖଣ୍ଡପୀଠ ଏକ ନିର୍ଦ୍ଦିଷ୍ଟ ସୋସିଆଲ ମିଡିଆ ଆକାଉଣ୍ଟ ଏବଂ ଟୁଇଟକୁ କେନ୍ଦ୍ରର ଆଦେଶକୁ ଚ୍ୟାଲେଞ୍ଜକୁ ଖାରଜ କରିବା ବିରୋଧରେ ସୋସିଆଲ ମିଡ଼ିଆ ପ୍ଲାଟଫର୍ମ ଏକ୍ସ କର୍ପର ଆବେଦନ ଶୁଣାଣି କରିଥିଲେ। କେନ୍ଦ୍ର ସରକାରଙ୍କ ବିରୋଧରେ ସୋସିଆଲ ମିଡିଆ କମ୍ପାନୀର ଆବେଦନକୁ କୋର୍ଟ ଅଗ୍ରାହ୍ୟ କରିଦେଇଥିଲେ ଏବଂ ଏହି ନିର୍ଦ୍ଦେଶ ପାଳନ ନ କରି ଥିବାରୁ ୫୦ ଲକ୍ଷ ଟଙ୍କା ଜରିମାନା ଲଗାଇଥିଲେ।
ଯେତେବେଳେ କେନ୍ଦ୍ର ସରକାରଙ୍କ ଆଇନଜୀବୀ କୋର୍ଟଙ୍କୁ କହିଥିଲେ ଏହି ନିୟମ ଅନ୍ତର୍ଗତ ବର୍ତ୍ତମାନ ଉପଭୋକ୍ତାମାନଙ୍କୁ କିଛି ଅନଲାଇନ ଗେମରେ ପ୍ରବେଶ କରିବା ପୂର୍ବରୁ ଆଧାର ଏବଂ ଅନ୍ୟାନ୍ୟ ଡକ୍ୟୁମେଣ୍ଟ ଦେବାକୁ କୁହାଯାଉଛି। ସୋସିଆଲ ମିଡିଆରେ କାହିଁକି ଏପରି ପରିଚୟ ବିସ୍ତାର କରାଯାଉ ନାହିଁ ବୋଲି କୋର୍ଟ ପ୍ରଶ୍ନ କରିଛନ୍ତି।
ଜଷ୍ଟିସ ଜି ନରେନ୍ଦ୍ର କହିଛନ୍ତି, ସୋସିଆଲ ମିଡିଆକୁ ନିଷିଦ୍ଧ କରନ୍ତୁ। ମୁଁ ଆପଣଙ୍କୁ କହିବି ଅନେକ ଭଲ ଘଟଣା ଘଟିବ। ଆଜିର ସ୍କୁଲ ଯାଉଥିବା ପିଲାମାନଙ୍କର ଏହା ନିଶା ପାଲଟିଛି। ମୁଁ ଅନୁଭବ କରୁଛି ଏକ୍ସାଇଜ ନିୟମ ପରି, ଏହାର ଏକ ବୟସ ସୀମା ମଧ୍ୟ ରହିବା ଉଚିତ।
ହାଇକୋର୍ଟ ଏହା ମଧ୍ୟ କହିଛନ୍ତି, ’ପିଲାମାନେ ହୁଏତ ୧୭ କିମ୍ବା ୧୮ ବର୍ଷର ହୋଇପାରନ୍ତି, କିନ୍ତୁ ଦେଶର ସ୍ବାର୍ଥ ପାଇଁ କ’ଣ ଭଲ ଏବଂ କ’ଣ ନୁହେଁ ତାହା ସ୍ଥିର କରିବାକୁ ସେମାନଙ୍କର ପରିପକ୍ୱତା ଅଛି କି? କୋମଳ ମନରେ ବିଷ ଭରୁଥିବା ଏପରି ଜିନିଷ କେବଳ ସୋସିଆଲ ମିଡିଆରେ ନୁହେଁ ଇଣ୍ଟରନେଟରୁ ମଧ୍ୟ ହଟାଯିବା ଉଚିତ। ସୋସିଆଲ ମିଡିଆ ବ୍ୟବହାର ପାଇଁ ସରକାର ଏକ ବୟସ ସୀମା ସ୍ଥିର କରିବାକୁ ମଧ୍ୟ ବିଚାର କରିବା ଜରୁରୀ।
କୋର୍ଟ ଏକ୍ସ କର୍ପ’ ଉପରେ ୫୦ ଲକ୍ଷ ଟଙ୍କାର ଜରିମାନା ମଧ୍ୟ ଲାଗୁ କରିଛନ୍ତି। ମାମଲାର ଶୁଣାଣି ବୁଧବାର ପର୍ଯ୍ୟନ୍ତ ସ୍ଥଗିତ ରଖାଯାଇଛି। କୋର୍ଟ କହିଛନ୍ତି ବୁଧବାର ଦିନ ଏକ୍ସ କର୍ପ ମାଗିଥିବା ମଧ୍ୟବର୍ତ୍ତୀକାଳୀନ ଆଶ୍ୱସ୍ତି ଉପରେ ନିଷ୍ପତ୍ତି ନେବେ ଏବଂ ଏହାର ଆବେଦନ ପରେ ଶୁଣାଣି ହେବ।
