ମାଲକାନଗିରି,୫ା୪(ଡି.ଏନ୍.ଏ.): ପଛୁଆ ବର୍ଗ ଆୟୁକ୍ତଙ୍କ ନିର୍ଦ୍ଦେଶକ୍ରମେ ଓଡିଶାର ପଛୁଆ ବର୍ଗର ଲୋକଙ୍କ ସାମାଜିକ ଓ ଶିକ୍ଷାଗତ ସ୍ଥିତି ସମ୍ପର୍କରେ ସର୍ଭେ କରିବା ନିମନ୍ତେ ମଙ୍ଗଳବାର ସ୍ଥାନୀୟ ଜିଲା ପରିଷଦ ସମ୍ମିଳନୀ କକ୍ଷରେ ବ୍ଲକସ୍ତରୀୟ ମାଷ୍ଟର ଟ୍ରେନର ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି। ଏଥିରେ ଏନୁମେରେଟର ଏବଂ ସୁପରଭାଇଜରମାନଙ୍କୁ ପ୍ରଶିକ୍ଷଣ ଦିଆଯାଇଛି। ଜିଲାପାଳ ବିଶାଲ ସିଂଙ୍କ ତତ୍ତ୍ୱାବଧାନରେ ଅନୁଷ୍ଠିତ ଏହି ଶିବିରରେ ଅତିରିକ୍ତ ଜିଲାପାଳ (ରାଜସ୍ବ) ମହେଶ୍ୱର ଚନ୍ଦ୍ର ନାୟକ ଓ ଅତିରିକ୍ତ ଜିଲାପାଳ (ସାଧାରଣ) ତ୍ରିନାଥ ମାଝି ଉପସ୍ଥିତ ଥିଲେ। ଶିବିରରେ ରାଜ୍ୟସ୍ତରୀୟ ପର୍ଯ୍ୟବେକ୍ଷକ ଭାବେ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ସଚିବ ଦଳମଣି ପଟେଲ ଯୋଗ ଦେଇଥିଲେ। ଜିଲାରେ ୫୮୦ଟି ସର୍ଭେ କେନ୍ଦ୍ର କରାଯାଇଛି। ଏଥିଲାଗି ୫୮୦ ଏନୁମେରେଟର ନିଯୁକ୍ତି ପାଇଛନ୍ତି। ସେହିପରି ତଦାରଖ କରିବା ପାଇଁ ୫୯ଜଣ ସୁପରଭାଇଜର ନିଯୁକ୍ତି ହୋଇଛନ୍ତି। ପ୍ରଶିକ୍ଷଣ ପରେ ଜିଲାରେ ମେ ୧ ତାରିଖଠାରୁ ୨୭ ତାରିଖ ପର୍ଯ୍ୟନ୍ତ ସାମାଜିକ ପଛୁଆ ବର୍ଗ ଲୋକଙ୍କ ସର୍ଭେ କାର୍ଯ୍ୟ ଆରମ୍ଭ ହେବ। ସେହିପରି ବ୍ଲକସ୍ତରରେ ଅର୍ଥାତ୍ ଜିଲାର ୭ ବ୍ଲକରେ ଏପ୍ରିଲ ୧୦ରୁ ୧୩ ତାରିଖ ପର୍ଯ୍ୟନ୍ତ ପ୍ରଶିକ୍ଷଣ ଅନୁଷ୍ଠିତ ହେବା। ଚିତ୍ରକୋଣ୍ଡାରେ ୮୮ ଜଣ ଏନୁମେରେଟର ଓ ୭ ଜଣ ସୁପରଭାଇଜର, ଖଇରପୁଟରେ ୫୫ ଏନୁମେରେଟର ଓ ୬ଜଣ ସୁପରଭାଇଜର, କୋରୁକୋଣ୍ଡାରେ ୬୦ ଏନୁମେରେଟର ଓ ୬ ସୁପରଭାଇଜର, ମାଲକାନଗିରିରେ ୯୫ ଏନୁମେରେଟର ଓ ୧୧ ସୁପରଭାଇଜର, ମାଥିଲିରେ ୧୦୦ ଜଣ ଏନୁମେରେଟର, ୧୦ ସୁପରଭାଇଜର, ପଡିଆରେ ୪୦ ଜଣ ଏନୁମେରେଟର ଓ ୪ ସୁପରଭାଇଜର, କାଲିମେଳାରେ ୧୧୫ ଏନୁମେରେଟର ୧୧ ଜଣ ସୁପରଭାଇଜର, ବାଲିମେଳା ଏନ୍ଏସିରେ ୧୦ ଜଣ ଏନୁମେରେଟର ଓ ୭ ସୁପରଭାଇଜର, ମାଲକାନଗିରି ପୌରାଞ୍ଚଳରେ ୧୭ ଜଣ ଏନୁମେରେଟର ଓ ୨ ଜଣ ସୁପରଭାଇଜର ନିଯୁକ୍ତି ପାଇଛନ୍ତି। ପଛୁଆ ବର୍ଗର ସମସ୍ତ ଜନସାଧାରଣ ସ୍ବେଚ୍ଛାକୃତ ଭାବେ ଯାଇ ସର୍ଭେ କେନ୍ଦ୍ରରେ ନିଜର ତଥ୍ୟ ପ୍ରଦାନ କରି ପଞ୍ଜୀକରଣ କରିପାରିବେ। ସଚେତନତା ସୃଷ୍ଟି ନିମନ୍ତେ ଜିଲାରେ ପ୍ରଚାର ପ୍ରସାର କରାଯିବ। ସର୍ଭେ ପରେ ଜୁନ୍ ୨୭ରେ ଡ୍ରାଫ୍ଟ ପ୍ରକାଶ କରାଯିବ। ଜୁନ୍ ୨୮ରୁ ଜୁଲାଇ ୩ ତାରିଖ ପର୍ଯ୍ୟନ୍ତ ଜନସାଧାରଣ ଅଭିଯୋଗ ଦାଖଲ କରିପାରିବେ। ସମ୍ପୂର୍ଣ ପ୍ରସ୍ତୁତ ଡ୍ରାଫ୍ଟକୁ ଜୁଲାଇ ୧୨ ତାରିଖରେ ପ୍ରକାଶ କରାଯିବ। ଏହି ପ୍ରଶିକ୍ଷଣ ନିମନ୍ତେ ଜିଲାରୁ ଅତିରିକ୍ତ ଜିଲାପାଳ ସାଧାରଣ, ଡେପୁଟି କଲେକ୍ଟର ପ୍ରମୋଦ କୁମାର ବେହେରା, ଚିତ୍ରକୋଣ୍ଡା ତହସିଲଦାର ଟି. ପଦ୍ମନାଭ ଦୋରା, ଏପିଡି ହିମାଂଶୁ ମହାରଣା ଜିଲାସ୍ତରୀୟ ମା୍ଷ୍ଟର ଟ୍ରେନର ଭାବେ ପ୍ରଶିକ୍ଷଣ ନେଇଛନ୍ତି। ଏହି ସ୍ବତନ୍ତ୍ର ସର୍ଭେ ନିମନ୍ତେ ଜିଲାପାଳ ଅଧ୍ୟକ୍ଷ, ଅତିରିକ୍ତ ଜିଲାପାଳ ଜିଲା ନୋଡାଲ ଅଧିକାରୀ, ଡେପୁଟି କଲେକ୍ଟର ଡେପୁଟି ଜିଲା ନୋଡାଲ ଅଧିକାରୀ, ସମସ୍ତ ବିଡିଓ ବ୍ଲକ ନୋଡାଲ ଅଧିକାରୀ, ନିର୍ବାହୀ ଅଧିକାରୀ ପୌରାଞ୍ଚଳ ନୋଡାଲ ଅଧିକାରୀ ଅଛନ୍ତି। ଶିବିରରେ ସମସ୍ତ ସିଡିପିଓ, ବିଡିଓ, ତହସିଲଦାର, ବିଇଓ ଓ ନିର୍ବାହୀ ଅଧିକାରୀମାନେ ଉପସ୍ଥିତ ଥିଲୋ
