ମାମାଭଗିନା ,୭।୧ : ଭାରତ-ବାଂଲାଦେଶ ସୀମାରେ ଚୋରା ଚାଲାଣକାରୀଙ୍କ ଦ୍ୱାରା ବିଏସଏଫ ଯବାନଙ୍କ ଟିମ୍ ଉପରେ ଆକ୍ରମଣ ହୋଇଛି। ଏଥିରେ ଜଣେ ମହିଳା ପ୍ରହରୀଙ୍କ ସମେତ ଚାରି ଜଣ ଯବାନ ଆହତ ହୋଇଥିବା ସୂଚନା ମିଳିଛି। ଆହତମାନଙ୍କୁ ଚିକିତ୍ସା ଲାଗି ଡାକ୍ତରଖାନାରେ ଭର୍ତ୍ତି କରାଯାଇଛି।
ଚୋରା ଚାଲାଣକାରୀଙ୍କୁ ଧରିବା ପାଇଁ ଅପରେଶନ ଜୋରଦାର କରାଯାଇଛି। ସୀମା ନିରୀକ୍ଷଣରେ ନିୟୋଜିତ ସିସିଟିଭି କ୍ୟାମେରା, ରେକର୍ଡର, କମ୍ପ୍ୟୁଟର ଏବଂ କଣ୍ଟ୍ରୋଲ ରୁମକୁ ଭଙ୍ଗାରୁଜା କରି ଚୋଲା ଚାଲାଣକାରୀମାନେ ବିଏସଏଫ ସମ୍ପତ୍ତିର ବ୍ୟାପକ କ୍ଷତି ଘଟାଇଛନ୍ତି। ଚୋରା ଚାଲାଣକାରୀଙ୍କୁ ଧରିବା ପାଇଁ ବିଏସଏଫ ସର୍ଚ୍ଚ ଅପରେଶନକୁ ଜୋରଦାର କରିଛି।
ଦକ୍ଷିଣ ପଶ୍ଚିମବଙ୍ଗ ସୀମାନ୍ତ ଅନ୍ତର୍ଗତ ୬୮ତମ କର୍ପସ ଉତ୍ତର ୨୪ ପରଗଣା ଜିଲାର ସୀମା ପୋଷ୍ଟ ମାମାଭଗିନାର ଯବାନମାନେ ଶୁକ୍ରବାର ଦିନ ସୂଚନା ପାଇଥିଲେ ଯେ ନାଭାଡାପଡା ଗାଁର ଆଲାମଗିର ମଣ୍ଡଳ,ସୁଖଦେବ ମଣ୍ଡଳ ସୁକୁମାର ଏବଂ ପବିତ୍ରଙ୍କ ପାଖରୁ ବହୁ ପରିମାଣର ଗଞ୍ଜା ଏବଂ ଫେନସେଡିଲ ଚୋରା ଚାଲାଣ କରାଯିବ। ଏସବୁ ବାଂଲାଦେଶକୁ ପଠାଯିବ। ଏହା ପରେ କମ୍ପାନୀ କମାଣ୍ଡର ବଗଦାହ ପୋଲିସ ଷ୍ଟେଶନକୁ ସୂଚନା ଦେଇଥିଲେ। ଏହା ପରେଯବାନମାନେ ଗ୍ରାମ ସଦସ୍ୟଙ୍କ ଉପସ୍ଥିତିରେ ଉକ୍ତ ସନ୍ଦିଗ୍ଧ ଘର ଉପରେ ଚଢ଼ାଉ କରିଥିଲେ। ଖୋଜାଖୋଜି ସମୟରେ ଆଲାମଗିର ମଣ୍ଡଳଙ୍କ ଘରୁ ୪୩ କିଲୋଗ୍ରାମ ଗଞ୍ଜା ଏବଂ ୩୭୧ ବୋତଲ ଫେନସେଡିଲ ସହିତ ଗିରଫ କରାଯାଇଥିଲା।
ଯେତେବେଳେ ବିଏସଏଫ ଯବାନମାନେ ଆଲାମଗିର ମଣ୍ଡଳଙ୍କୁ ଗିରଫ ନେଇ ଯାଉଥିଲେ, ସେତେବେଳେ ତାଙ୍କ ସହଯୋଗୀ ଚୋରା ଚାଲାଣକାରୀମାନେ ହଠାତ ବାଡ଼ି ଓ ପଥରରେ ଆକ୍ରମଣ କରିଥିଲେ। ଯେଉଁଥିରେ ୪ ଜଣ ବିଏସଏଫ ଯବାନ ଗୁରୁତର ଆହତ ହୋଇଥିଲେ। ଯବାନମାନେ ଆତ୍ମରକ୍ଷା ପାଇଁ ପିଏଜିର ବ୍ୟବହାର କରିଥିଲେ। ଏହା ପରେ ଚୋରା ଚାଲାଣକାରୀମାନେ ସେଠାରୁ ପଳାୟନ କରିଥିଲେ।
