ଭୁବନେଶ୍ୱର,୬।୧୦(ବ୍ୟୁରୋ): ୨୦୨୫ ମାର୍ଚ୍ଚ ସୁଦ୍ଧା ସମଗ୍ର ଦେଶରେ ବିଦ୍ୟୁତ୍ ଦେୟକୁ ନିୟନ୍ତ୍ରିତ କରିବା ପାଇଁ ସ୍ମାର୍ଟ ପ୍ରିପେଡ୍ ମିଟର ପ୍ରଚଳନ ହେବ। ରାଜ୍ୟରେ ଏହି ବ୍ୟବସ୍ଥା ୨୦୨୨ ମାର୍ଚ୍ଚ ସୁଦ୍ଧା କାର୍ଯ୍ୟକାରୀ କରାଯିବ ବୋଲି ବାଚସ୍ପତି ସୂର୍ଯ୍ୟନାରାୟଣ ପାତ୍ର ମଙ୍ଗଳବାର ସୂଚନା ଦେଇଛନ୍ତି। ବିଧାନସଭା ସମ୍ମିଳନୀ କକ୍ଷରେ ବାଚସ୍ପତି ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବିଧାନସଭା ଶକ୍ତି ବିଭାଗ ଷ୍ଟାଣ୍ଡିଂ କମିଟି ବୈଠକରେ ଏହି ନିଷ୍ପତ୍ତି ନିଆଯାଇଛି। ବିଦ୍ୟୁତ୍ ପାଇଁ ପ୍ରତ୍ୟେକ ଘରେ ପ୍ରିପେଡ୍ ମିଟର ଲଗାଯିବ। ଫଳରେ ଉପଭୋକ୍ତାମାନେ ଆଗୁଆ ସିମ୍କାର୍ଡ ମାଧ୍ୟମରେ ବିଦ୍ୟୁତ୍ ଦେୟ ପଇଠ କରିପାରିବେ। ଆଉ ଯେତେବେଳେ ପଇସା ସରିଯିବ ସେମାନଙ୍କ ବିଦ୍ୟୁତ୍ ସରବରାହ କାଟି ଦିଆଯିବ ବୋଲି ବାଚସ୍ପତି ପାତ୍ର କହିଛନ୍ତି। ଯେଉଁ ଗ୍ରାମ ବା ଗୃହ ବିଦ୍ୟୁତ୍ ସେବା ପାଇବାରୁ ବଞ୍ଚତ୍ତ ହୋଇଛନ୍ତି, ସେଗୁଡ଼ିକୁ ଯୋଗାଣ ନିଶ୍ଚିତ କରିବାକୁ ପଦକ୍ଷେପ ନେବାକୁ ବିତରଣ କମ୍ପାନୀକୁ ନିର୍ଦ୍ଦେଶ ଦିଆଯାଇଛି। ଗ୍ରାମାଞ୍ଚଳଠାରୁ ଆରମ୍ଭ କରି ସହର ସବୁଠାରେ ଅଘୋଷିତ ବିଦ୍ୟୁତ୍ କାଟ ଖୁବ୍ଶୀଘ୍ର ସ୍ମାର୍ଟ ହେଉଥିବାରୁ ବାଚସ୍ପତି ପାତ୍ର ଉଦ୍ବେଗ ପ୍ରକାଶ କରିଥିଲେ। ତେଣୁ କୌଣସି ସ୍ଥାନରେ ବିଦ୍ୟୁତ୍ କାଟ ପୂର୍ବରୁ ସର୍ବସାଧାରଣଙ୍କ ଅବଗତି ନିମନ୍ତେ ପ୍ରଚାର କରାଯିବା ସହ ରାଜ୍ୟ ସରକାରଙ୍କ ଦ୍ୱାରା ସ୍ଥିରିକୃତ ପ୍ରାପ୍ୟ ସମସ୍ତ ଠିକା କର୍ମଚାରୀଙ୍କୁ ଦେବାକୁ ନିର୍ଦ୍ଦେଶ ଦେଇଛନ୍ତି। ବିଦ୍ୟୁତ୍ ଯୋଗାଣକୁ ସରଳ କରିବାକୁ କିଛି ଲୋକଙ୍କୁ ମଧ୍ୟସ୍ଥଭାବେ ନିଯୁକ୍ତି ଦିଆଯାଇ ଇଲେକ୍ଟ୍ରି ବିଲ୍ ସଂଗ୍ରହ କରାଯାଉଛି। ହେଲେ ସେମାନଙ୍କ ମଧ୍ୟରୁ କେତେଜଣ ଟଙ୍କା ଆଦାୟ କରି ଆତ୍ମସାତ୍ କରୁଥିବା ଅଭିଯୋଗ ହେଉଛି। ତେଣୁ ଏହି ଦାୟିତ୍ୱ ଆଗାମୀ ଦିନରେ ସ୍ବୟଂ ସହାୟକ ଗୋଷ୍ଠୀ(ଏସ୍ଏଚ୍ଜି)କୁ ଦିଆଯିବାକୁ ନିଷ୍ପତ୍ତି ହୋଇଛି। ସେମାନେ ଘର ଘର ବୁଲି ବିଦ୍ୟୁତ୍ ବିଲ୍ ଆଦାୟ କରିବେ। ଏହି ଷ୍ଟାଣ୍ଡିଂ କମିଟି ବୈଠକରେ ଟାଟା ପାଓ୍ବାର ସଦର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍(ଟିପିଏସ୍ଓଡିଏଲ୍) ଏବଂ ଶକ୍ତି ବିଭାଗର ବରିଷ୍ଠ ଅଧିକାରୀମାନେ ଯୋଗ ଦେଇ ବିଦ୍ୟୁତ୍ ଯୋଗାଣ ନେଇ ବିସ୍ତୃତ ଆଲୋଚନା କରିଥିଲେ।
