ଭୁବନେଶ୍ୱର,୧୯।୧୨(ବ୍ୟୁରୋ):ସ୍ମାର୍ଟସିଟିକୁ ସ୍ବଚ୍ଛ ତଥା ସୁନ୍ଦର କରିବା ପାଇଁ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁୁ ବ୍ୟାପକ ଯୋଜନା କରାଯାଉଛି। ହେଲେ ଯୋଜନାଗୁଡ଼ିକ ସେପରି ସଫଳ ତଥା ଦୀର୍ଘସ୍ଥାୟୀ ହୋଇପାରୁ ନାହିଁ। ଆବର୍ଜନା ପରିଚାଳନା ପାଇଁ ଘରକୁ ଘର ବୁଲି ଅଳିଆ ସଂଗ୍ରହ କରାଯାଉଛି। ମାତ୍ର ସେସବୁକୁ ହିଁ ଜନବସତି ଅଞ୍ଚଳରେ ପକାଇ ଦିଆଯାଉଥିବାରୁ ପୃଥକ ଅଳିଆ ସଂଗ୍ରହ ପ୍ରହସନରେ ପରିଣତ ହୋଇଛି। ଟ୍ରକ୍ ଟ୍ରକ୍ ଓଦା ଓ ଶୁଖିଲା ଆବର୍ଜନା ମାସ ମାସ ଧରି ଘାଟିକିଆର ଜନବସତି ଅଞ୍ଚଳରେ ଗଦା ହୋଇ ରହିଛି। କିଛିଦିନ ତଳେ ଖଣ୍ଡଗିରି ଟୁରିଷ୍ଟ ବସ୍ଷ୍ଟାଣ୍ଡରେ ଦୀର୍ଘଦିନ ଧରି ଅଳିଆ ଗଦା କରାଯିବା ପରେ ଅସନ୍ତୋଷ ପ୍ରକାଶ ପାଇବାରୁ ବିଏମସି ତାହାକୁ ଉଠାଇଥିଲା। ହେଲେ ଏବେ ବି ଉକ୍ତ ଅଞ୍ଚଳ ସମ୍ପୂର୍ଣ୍ଣ ଆବର୍ଜନାମୁକ୍ତ ହୋଇପାରି ନାହିଁ। ସେହିପରି ଏବେ ଘାଟିକିଆ ଓ ଖଣ୍ଡଗିରି ବାରି ଅଞ୍ଚଳରୁ ପ୍ରତିଦିନ ବାହାରୁ ଥିବା କୁଢ଼ କୁଢ଼ ଅଳିଆ ସ୍ଥାନୀୟ ସାଇ ମନ୍ଦିର ନିକଟରେ ଗଦା ହେଉଥିବା ଦେଖିବାକୁ ମିଳୁଛି। ବିଏମ୍ସି ପକ୍ଷରୁ ଉକ୍ତ ଆବର୍ଜନା ସ୍ଥାନାନ୍ତରିତ କରାଯାଉଥିଲେ ମଧ୍ୟ ସେଠାରେ ଡମ୍ପିଂୟାର୍ଡର ଭ୍ରମ ସୃଷ୍ଟି କରୁଛି। ଅଳିଆ ଆବର୍ଜନା ପଚିସଢ଼ି ଦୁର୍ଗନ୍ଧ ବାହାରୁଛି। ରସୁଲଗଡ଼, ବମିଖାଲ, କେନାଲବନ୍ଧର ଉଭୟ ପାର୍ଶ୍ୱ ରାସ୍ତା ଆଦି ଅଞ୍ଚଳର ଜନବସତିରେ ଏପରି ଅଳିଆ ଗଦା ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛି। ସେହିପରି ବୁଲା ଜୀବଜନ୍ତୁ ଆବର୍ଜନାରୁ ପଲିଥିନ ଜରି ଆଦି ଖାଇବା ଦ୍ୱାରା ରୋଗଗ୍ରସ୍ତ ହେଉଛନ୍ତି।
