ପ୍ରଦୀପ୍ତ କୁମାର ପୃଷ୍ଟି
ଚଣ୍ଡିଖୋଲ, ୧୮ା୨: ମହାଶିବରାତ୍ରି ଜାଗର ଅବସରରେ ଯାଜପୁର ଜିଲାର ପ୍ରସିଦ୍ଧ ଶୈବପୀଠ ମହାବିନାୟକ ମନ୍ଦିରରେ ନିଆରା ପରମ୍ପରା ଦେଖିବାକୁ ମିଳିଥାଏ। ଏଠାରେ ପଞ୍ଚ ଦେବତା ପୂଜା ପାଇଥାନ୍ତି। ରାତ୍ରି ସାରା ପଞ୍ଚ ଦେବତା ଉଜାଗର ରହିଥାନ୍ତି। ସେହି ଦେବତାମାନେ ହେଲେ ଗଣେଶ, ବିଷ୍ଣୁ, ଦୁର୍ଗା, ସୂର୍ଯ୍ୟଦେବ ଓ ମହାଦେବ। ଜାଗରର ତୃତୀୟ ପ୍ରହରରେ ପ୍ରଭୁ ଚନ୍ଦ୍ରଶେଖର ତିନିଥର ମନ୍ଦିର ବେଢ଼ା ପରିକ୍ରମା କରିଥାନ୍ତି। ପରିକ୍ରମା ସରିବା ପରେ ଏଠାରେ ମହାଦୀପ ଉଠିଥାଏ।
ଜାଗରରେ ଭୋର ୪ଟାରୁ ମଙ୍ଗଳ ଆଳତି, ବଡ଼ସିଂହାର ବେଶ, ଧୂପ ଲାଗି, ପରେ ନୀତି ଭୋଗ ବାଲ୍ୟଭୋଗ କରାଯାଇଥାଏ। ସନ୍ଧ୍ୟା ସମୟରୁ ୪ପ୍ରହର ଭିନ୍ନ ଭିନ୍ନ କ୍ରମେ ପୂଜା କରାଯାଇଥାଏ। ପ୍ରତ୍ୟେକ ପ୍ରହରରେ ଲଡ଼ୁ ଓ ପଣା ପ୍ରଦାନ କରାଯାଇ ଘର୍ଷଣ କରାଯିବା ସହ ମହାସ୍ନାନ, ମଙ୍ଗଳ ଆଳତି ଓ ଧୂପ ଲାଗି କରାଯାଇଥାଏ। ତୃତୀୟ ପ୍ରହର ସମୟରେ ମହାପ୍ରଭୁଙ୍କର ଚଳନ୍ତି ପ୍ରତିମା ଚନ୍ଦ୍ରଶେଖରଙ୍କୁ ତିନିଥର ବେଢ଼ା ପରିକ୍ରମା କରାଯିବା ପରେ ୧୦୮ ଦୀପ ପ୍ରଜ୍ୱଳନ କରାଯାଏ। ଏହି ୧୦୮ ଦୀପ ପ୍ରଜ୍ୱଳନ ପରେ ବିଶ୍ୱଶାନ୍ତି ପାଇଁ ଏହା ଉତ୍ସର୍ଗ କରାଯାଇଥାଏ। ସେଥିପାଇଁ ମହାଶିବରାତ୍ରି ଅବସରରେ ବିଶ୍ୱଶାନ୍ତି ମହାଯଜ୍ଞ ୫ ଦିନ ଧରି ଏଠାରେ ଅନୁଷ୍ଠିତ ହୋଇଥାଏ। ଜନକଲ୍ୟାଣ ଉଦ୍ଦେଶ୍ୟରେ ଏହି ଯଜ୍ଞ ଜାଗର ଅମାବାସ୍ୟାର ଦୁଇ ଦିନ ପୂର୍ବରୁ ଆରମ୍ଭ ହୋଇଥାଏ ଏବଂ ମହାଶିବରାତ୍ରିର ଦୁଇ ଦିନ ପରେ ଯଜ୍ଞ ଶେଷ ହୋଇଥାଏ। ଏହା ନାରାୟଣଙ୍କ ଯଜ୍ଞ ଭାବେ ପରିଚିତ ହୋଇଥାଏ। ଶନିବାର ଜାଗର ଉପଲକ୍ଷେ ପୋଲିସ ପ୍ରଶାସନ ତରଫରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିବା ବେଳେ ବହୁସଂଖ୍ୟାରେ ଉଠା ଦୋକାନୀ ଏଠାରେ ପସରା ମେଲାଇଛନ୍ତି। ଯାଜପୁର ଜିଲା ପ୍ରଶାସନ ତରଫରୁ ଆଇନ ଶୃଙ୍ଖଳା ରକ୍ଷା ସହ ସମସ୍ତ ପ୍ରକାର ବନ୍ଦୋବସ୍ତ କରାଯାଇଥାଏ ଏବଂ ଆମକୁ ସମ୍ପୂର୍ଣ୍ଣ ସହଯୋଗ କରିଥାନ୍ତି ବୋଲି ମନ୍ଦିର ଟ୍ରଷ୍ଟି ଧନେଶ୍ୱର ସାମଲ କହିଛନ୍ତି। ପୂଜକ ହିମାଂଶୁ ଶେଖର ପଣ୍ଡା କହିଛନ୍ତି ଯେ ରାତ୍ରିସାରା ମହାଦେବଙ୍କ ସହ ନାରାୟଣ, ଗଣେଶ, ଦୁର୍ଗା ଓ ସୂର୍ଯ୍ୟ ଦେବତା ଏଠାରେ ଉଜାଗର ରହିବେ। ସମସ୍ତଙ୍କୁ ଏକ ସଙ୍ଗରେ ପୂଜା କରାଯାଇଥାଏ। ଅନ୍ୟ ସ୍ଥାନ ଅପେକ୍ଷା ଏଠାରେ ନିଆରା ଢଙ୍ଗରେ ପୂଜା କରାଯାଏ।
