ଦୁବାଇ, ୮।୨ (ପି.ଟି.): ଜାନୁୟାରୀ ମାସରେ ଚମତ୍କାର ପ୍ରଦର୍ଶନ ପାଇଁ ଆଇସିସି ପ୍ଲେୟର ଅଫ୍ ଦି ମନ୍ଥ୍ ପୁରସ୍କାର ଦୌଡ଼ରେ ଭାରତ ପେସ୍ ବୋଲର ମହମ୍ମଦ ସିରାଜ ଓ ଓପନର ଶୁବମନ ଗିଲ୍ ରହିଛନ୍ତି। ପୁରସ୍କାର ପାଇଁ ତୃତୀୟ ଦାବିଦାର ରହିଛନ୍ତି ନ୍ୟୁଜିଲାଣ୍ଡ ଓପନର ଡେଭନ କନ୍ଓ୍ବେ। ତାଙ୍କର ବର୍ଷ ଆରମ୍ଭ ଖୁବ୍ ଭଲ ରହିଥିଲା। ସେ ସମସ୍ତ ଫର୍ମାଟରେ ମୋଟ ୩ଟି ଶତକ ଓ ଦୁଇ ଅର୍ଦ୍ଧଶତକ ହାସଲ କରିଥିଲେ। ୨୦୨୨ରେ ସଫଳ ବର୍ଷ ପରେ ଗିଲ୍ ଗତ ମାସରେ ଉଭୟ ହ୍ବାଇଟ୍-ବଲ୍ ଫର୍ମାଟରେ ତାଙ୍କ ଦକ୍ଷତା ପ୍ରତିପାଦନ କରିଥିଲେ। ଅନ୍ୟପକ୍ଷରେ ଯଶପ୍ରୀତ୍ ବୁମ୍ରାଙ୍କ ଅନୁପସ୍ଥିତିରେ ସିରାଜ ନିକଟରେ ଖେଳାଯାଇଥିବା ଅନ୍ତର୍ଜାତୀୟ ଦିନିକିଆଗୁଡ଼ିକରେ ବିଶେଷ କରି ନୂଆ ବଲ୍ରେ ଭାରତର ଫାଷ୍ଟ ବୋଲିଂ ଆକ୍ରମଣକୁ ଶାଣିତ କରିଥିଲେ। ମୁମ୍ବାଇରେ ଶ୍ରୀଲଙ୍କା ବିପକ୍ଷ ପ୍ରଥମ ମ୍ୟାଚରେ ଗିଲ୍ ତାଙ୍କର ପ୍ରଥମ ଅନ୍ତର୍ଜାତୀୟ ଟି୨୦ ଖେଳିଥିଲେ। ଏଥିରେ ସେ ମାତ୍ର ୭ ରନ ସଂଗ୍ରହ କରିିଥିଲେ। ପରବର୍ତ୍ତୀ ମ୍ୟାଚରେ ସେ ଏକ ଅଙ୍କ ବିଶିଷ୍ଟ ରନ ସ୍କୋର କରିଥିଲେ। ରାଜକୋଟଠାରେ ଅନୁଷ୍ଠିତ ତୃତୀୟ ଅନ୍ତର୍ଜାତୀୟ ଟି୨୦ରେ ସେ ୪୬ ରନ କରିଥିଲେ। ଗିଲ୍ ପରେ ଶ୍ରୀଲଙ୍କା ବିପକ୍ଷ ୩ ଅନ୍ତର୍ଜାତୀୟ ଦିନିକିଆରେ ୭୦, ୨୧ ଓ ୧୧୬ ରନ କରିଥିଲେ। ହାଇଦ୍ରାବାଦରେ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଅନ୍ତର୍ଜାତୀୟ ଦିନିକିଆରେ କିନ୍ତୁ ତାଙ୍କ ପ୍ରଦର୍ଶନ ଜୋର୍ଦାର ଥିଲା। ୨୩ ବର୍ଷୀୟ ଖେଳାଳି ୧୪୯ ବଲ୍ରୁ ୨୦୮ ରନ କରିଥିଲେ। ସେହିଦିନ ତାଙ୍କର ଜଣେ ହେଲେ ଟିମ୍ମେଟ୍ ୨୮ ରନ ଅତିକ୍ରମ କରିପାରି ନ ଥିଲେ। ଗିଲ୍ ଲୋକି ଫର୍ଗୁସନଙ୍କ ବୋଲିଂରେ କ୍ରମାଗତ ୩ ଛକା ମାରି ତାଙ୍କ ଦ୍ୱିଶତକ ପୂରଣ କରିଥିଲେ। ଅନ୍ତର୍ଜାତୀୟ ଦିନିକିଆରେ ଏହି ମାଇଲଖୁଣ୍ଟ ହାସଲ କରିବାରେ ସେ ସର୍ବକନିଷ୍ଠ ଖେଳାଳି ହୋଇପାରିଥିଲେ। ପରବର୍ତ୍ତୀ ଦୁଇଟି ମ୍ୟାଚରେ ସେ ଅପରାଜିତ ୪୦ ଓ ୧୧୨ ରନ କରିଥିଲେ। ସିରିଜରେ ସେ ମୋଟ ୩୬୦ ରନ ସଂଗ୍ରହ କରିଥିଲେ। ଫଳତଃ ସେ ୩ ମ୍ୟାଚ ବିଶିଷ୍ଟ ଅନ୍ତର୍ଜାତୀୟ ଦିନିକିଆ ସିରିଜରେ ସର୍ବାଧିକ ରନ ସଂଗ୍ରହ କରିବାରେ ବାବର ଆଜମ (୨୦୧୬-୧୭ରେ ଓ୍ବେଷ୍ଟଇଣ୍ଡିଜ ବିପକ୍ଷରେ)ଙ୍କ ରେକର୍ଡ ସମକକ୍ଷ ହୋଇପାରିଥିଲେ। ଅପରପକ୍ଷରେ ସିରାଜଙ୍କ ଚମତ୍କାର ଫର୍ମର ପ୍ରତିଫଳନ ଆଇସିସି ପ୍ଲେୟର ର଼୍ୟାଙ୍କିଙ୍ଗରେ ଦେଖିବାକୁ ମିଳିଥିଲା। ଅନ୍ତର୍ଜାତୀୟ ଦିନିକିଆରେ ସେ ନମ୍ବର ଓ୍ବାନ ବୋଲର ହୋଇପାରିଥିଲେ। ଗୁଆହାଟିଠାରେ ଶ୍ରୀଲଙ୍କା ବିପକ୍ଷ ହାଇ ସ୍କୋରିଂ ପ୍ରଥମ ଅନ୍ତର୍ଜାତୀୟ ଦିନିକିଆରେ ସେ ତାଙ୍କ ୭ ଓଭର ବୋଲିଂରେ ୩୦ ରନ ବିନିମୟରେ ୨ ଉଇକେଟ ଅକ୍ତିଆର କରିଥିଲେ। ପରବର୍ତ୍ତୀ ଦୁଇଟି ମ୍ୟାଚରେ ତାଙ୍କ ବୋଲିଂ ଫିଗର ୩/୩୦ ଓ ୪/୩୨ ରହିଥିଲା। ସିରିଜରେ ସେ ଥିଲେ ଅଗ୍ରଣୀ ଉଇକେଟ ହାସଲକାରୀ ବୋଲର। ହୋମ୍ ଗ୍ରାଉଣ୍ଡ ହାଇଦ୍ରାବାଦରେ ନ୍ୟୁଜିଲାଣ୍ଡ ବିପକ୍ଷ ହାଇସ୍କୋରିଂ ରୋମାଞ୍ଚ ମ୍ୟାଚରେ ଏହି ଡାହାଣହାତୀ ବୋଲର ତାଙ୍କ ୧୦ ଓଭର ବୋଲିଂରେ ୪୬ ରନ ବିନିମୟରେ ୪ ଉଇକେଟ ସଫଳତା ପାଇଥିଲେ। ରାୟପୁରରେ ଦ୍ୱିତୀୟ ଅନ୍ତର୍ଜାତୀୟ ଦିନିକିଆରେ ଓପନିଂ ବୋଲିଂ କରିବାକୁ ଆସି ସେ ତାଙ୍କ ୬ ଓଭର ବୋଲିଂରେ ୧ ମେଡେନ ସହ ୧୦ ରନ ବିନିମୟରେ ୧ ଉଇକେଟ ଅକ୍ତିଆର କରିଥିଲେ।
