ଭୁବନେଶ୍ୱର,୧୧ା୧(ଅନୁରାଧା ମହାରଣା): ଦେଶରେ ପର୍ବପର୍ବାଣି ତଥା ଉତ୍ପାଦନ କ୍ଷେତ୍ରରେ ଅଭିବୃଦ୍ଧି ସମୟରେ ଚାହିଦା ବୃଦ୍ଧି ହେତୁ ଶିଳ୍ପ ଉତ୍ପାଦନ ସୂଚକାଙ୍କ (ଆଇଆଇପି) ଆକଳନ ସୁଦୃଢ଼ ହୋଇଛି। ୨୦୨୪ ନଭେମ୍ବରରେ ଏହା ବାର୍ଷିକ ଭିତ୍ତିରେ ୫.୨ ପ୍ରତିଶତ ବୃଦ୍ଧି ପାଇ ୬ ମାସର ଉଚ୍ଚତାକୁ ଆସିଥିଲା। ପରିସଂଖ୍ୟାନ ଏବଂ କାର୍ଯ୍ୟକ୍ରମ କାର୍ଯ୍ୟାନ୍ବୟନ ମନ୍ତ୍ରଣାଳୟ ପକ୍ଷରୁ ଶୁକ୍ରବାର ପ୍ରକାଶିତ ସରକାରୀ ତଥ୍ୟ ଅନୁଯାୟୀ, ୨୦୨୩ ନଭେମ୍ବରରେ ଶିଳ୍ପ ଉତ୍ପାଦନ ସୂଚକାଙ୍କ (ଆଇଆଇପି) ୨.୫ ପ୍ରତିଶତ ବୃଦ୍ଧି ପାଇଛି। ଏହାପୂର୍ବରୁ ୨୦୨୪ ମେ’ରେ ଶିଳ୍ପ ଉତ୍ପାଦନରେ ସର୍ବାଧିକ ଅଭିବୃଦ୍ଧି ହାର ୬.୩ ପ୍ରତିଶତ ଥିଲା। ଜୁନ୍ ମାସରେ ଅଭିବୃଦ୍ଧି ହାର ୪.୯ ପ୍ରତିଶତ ଥିବାବେଳେ ଜୁଲାଇରେ ଏହା ୫% ଥିଲା। ମାତ୍ର ଅଗଷ୍ଟରେ ଆଇଆଇପି ଅଭିବୃଦ୍ଧି ସ୍ଥିର ରହିଥିଲା । ସେପ୍ଟେମ୍ବରରେ ଏହା ୩.୧ ପ୍ରତିଶତ ବୃଦ୍ଧି ପାଇ ଅକ୍ଟୋବରରେ ୩.୭ ପ୍ରତିଶତ ବୃଦ୍ଧି ପାଇଥିଲା। ତଥ୍ୟ ଅନୁଯାୟୀ, ଆଇଆଇପି ଅନୁଯାୟୀ ମପାଯାଇଥିବା ଶିଳ୍ପ ଉତ୍ପାଦନ ଅଭିବୃଦ୍ଧି ୨୦୨୪ ଏପ୍ରିଲ-ନଭେମ୍ବରରେ ୪.୧ ପ୍ରତିଶତ ରହିଥିଲା; ଯାହାକି ପୂର୍ବ ବର୍ଷ ସମାନ ଅବଧିରେ ୬.୫% ଥିଲା। ତଥ୍ୟ ଅନୁଯାୟୀ, ନଭେମ୍ବର ମାସରେ ଖଣି ଉତ୍ପାଦନର ଅଭିବୃଦ୍ଧି ହାର ୧.୯%କୁ ହ୍ରାସ ପାଇଥିଲାବେଳେ ୧ ବର୍ଷ ପୂର୍ବେ ଏହା ୭% ଅଭିବୃଦ୍ଧି ପଞ୍ଜୀକୃତ ହୋଇଥିଲା। ନଭେମ୍ବରରେ ଉତ୍ପାଦନ କ୍ଷେତ୍ରର ଅଭିବୃଦ୍ଧି ହାର ୫.୮%ରେ ପହଞ୍ଚିଛି, ଯାହାକି ପୂର୍ବ ବର୍ଷ ତୁଳନାରେ ୧.୩% ଥିଲା।
ଅନ୍ୟପଟେ ବିଦ୍ୟୁତ୍ ଉତ୍ପାଦନର ଅଭିବୃଦ୍ଧି ହାର ୪.୪ ପ୍ରତିଶତକୁ ହ୍ରାସ ପାଇଛି, ଯାହାକି ୧ ବର୍ଷ ପୂର୍ବେ ୫.୮ ପ୍ରତିଶତ ଥିଲା। ବ୍ୟବହାରଭିତ୍ତିକ ବର୍ଗୀକରଣ ଅନୁଯାୟୀ, ୨୦୨୪ ନଭେମ୍ବରରେ ପୁଞ୍ଜି ସାମଗ୍ରୀ ବିଭାଗର ଅଭିବୃଦ୍ଧ ୯% ବୃଦ୍ଧି ପାଇଥିଲା, ଯାହା ପୂର୍ବ ବର୍ଷ ସମାନ ଅବଧିରେ ୧.୧% ହ୍ରାସ ପାଇଥିଲା। ପାର୍ବଣ ସମୟରେ ଅର୍ଥାତ୍ ନଭେମ୍ବରରେ ଉପଭୋକ୍ତା ସ୍ଥାୟୀ (ବୃହତ୍ ଇଲେକ୍ଟ୍ରୋନିକ୍ସ ଉତ୍ପାଦ) ଉତ୍ପାଦନ ସମୀକ୍ଷାଧୀନ ମାସରେ ୧୩.୧ ପ୍ରତିଶତ ବୃଦ୍ଧି ପାଇଛି । ତେବେ ୨୦୨୩ ନଭେମ୍ବରରେ ଏହା ୪.୮ ପ୍ରତିଶତ ହ୍ରାସ ପାଇଥିଲା। ୨୦୨୩ ନଭେମ୍ବରରେ ଗ୍ରାହକ ଅଣସ୍ଥାୟୀ ଦ୍ରବ୍ୟ ଉତ୍ପାଦନର ଅଭିବୃଦ୍ଧି ହାର ପ୍ରାୟ ୦.୬%ରେ ସ୍ଥିର ରହିଥିଲାବେଳେ ୨୦୨୩ ନଭମ୍ବରରେ ଏହା ୩.୪ ପ୍ରତିଶତ ହ୍ରାସ ପାଇଥିଲା। ତଥ୍ୟ ଅନୁଯାୟୀ ୨୦୨୪ ନଭେମ୍ବରରେ ନିର୍ମାଣ ସାମଗ୍ରୀ ୧୦% ବୃଦ୍ଧି ପାଇ ୧ ବର୍ଷ ପୂର୍ବେ ସମାନ ଅବଧିରେ ୧.୫% ଥିଲା। ତଥ୍ୟ ଅନୁଯାୟୀ, ୨୦୨୪ ନଭେମ୍ବରରେ ପ୍ରାଥମିକ ଦ୍ରବ୍ୟର ଉତ୍ପାଦନ ୨.୭% ଅଭିବୃଦ୍ଧି ପଞ୍ଜୀକୃତ ହୋଇଥିବାବେଳେ ବର୍ଷ ପୂର୍ବେ ନଭେମ୍ବରରେ ୮.୪ % ଅଭିବୃଦ୍ଧି ରେକର୍ଡ କରାଯାଇଥିଲା।
