ଖଜୁରିପଡ଼ା/ବଳସକୁମ୍ପା, ୨।୧(ଡି.ଏନ.ଏ.): ଓଡ଼ିଶାର ବିଭିନ୍ନ ପର୍ଯ୍ୟଟନସ୍ଥଳୀରେ ଶୀତଦିନର ମଜା ନେବାକୁ ପର୍ଯ୍ୟଟକଙ୍କ ଭିଡ ଜମିଥାଏ। ମାତ୍ର କନ୍ଧମାଳର ଶୀତ ନିଆରା। ଜିଲାର ବିଭିନ୍ନ ସ୍ଥାନରେ ଶୀତଦିନେ ତୁଷାରପାତ ହେଉଥିବାରୁ ଏଠାକୁ ପ୍ରତିବର୍ଷ ଡିସେମ୍ବର ଓ ଜାନୁୟାରୀରେ ପର୍ଯ୍ୟଟକଙ୍କ ସୁଅ ଛୁଟେ। ବିଭିନ୍ନ ପର୍ଯ୍ୟଟନସ୍ଥଳୀରେ ପର୍ଯ୍ୟଟକ ଶୀତର ମଜା ନେବାସହ ବଣଭୋଜି କରିଥାନ୍ତି। ମାତ୍ର ଏବେବି ଜିଲାର ବହୁ ପର୍ଯ୍ୟଟନସ୍ଥଳୀ ଅବହେଳିତ ଅବସ୍ଥାରେ ରହିଛି। ସେଥି ମଧ୍ୟରୁ ଜିଲାର ପ୍ରବେଶ ପଥ ଖଜୁରିପଡା ବ୍ଲକର ସିଦିଙ୍ଗି ଘାଇ ଅନ୍ୟତମ। ବିଭିନ୍ନ ସ୍ଥାନରୁ ଆସୁଥିବା ପର୍ଯ୍ୟଟକମାନେ ଏଠାରେ ବଣଭୋଜି କରିବାକୁ ବେଶୀ ପସନ୍ଦ କରନ୍ତି। ଡ଼୍ୟାମ ହୁଡାରେ ଛିଡ଼ା ହୋଇ ଶୀତୁଆ ସକାଳ ସହ ସୂର୍ଯ୍ୟୋଦୟର ଭରପୁର ମଜା ନେଇଥାନ୍ତି ପର୍ଯ୍ୟଟକ। ବିସ୍ତୀର୍ଣ୍ଣ ଜଳାରାଶି ସହ ଘଞ୍ଚ ଜଙ୍ଗଲ ଓ ପାହାଡ ପର୍ଯ୍ୟଟକଙ୍କୁ ଟାଣିଆଣିଥାଏ ଏହି ସ୍ଥାନକୁ।
କିନ୍ତୁ ବଡ଼ ଦୁଃଖ ଓ ପରିତାପର ବିଷୟ ଏଠାକୁ ଯିବାକୁ ଭଲ ରାସ୍ତାଟିଏ ନାହିଁ। ଏଥିସହ ମହିଳା ମାନଙ୍କ ପାଇଁ ଶୌଚାଳୟ କିମ୍ବା ବଣଭୋଜି ପାଇଁ ପିଣ୍ଡି ସହ ପାନୀୟ ଜଳ ଓ ଅନ୍ୟାନ୍ୟ ବ୍ୟବସ୍ଥା ମଧ୍ୟ ନାହିଁ। କିନ୍ତୁ ଏହା ମାନଚିତ୍ରରେ ପର୍ଯ୍ୟଟନ ସ୍ଥଳୀର ମାନ୍ୟତା ପାଇଛି। ଏହି ସ୍ଥାନକୁ ଯିବାକୁ ହେଲେ ଖାଲଖମା ଭର୍ତ୍ତି ପିଚୁ ରାସ୍ତା ଦେଇ ଯିବାକୁ ପଡ଼େ। ସେହିପରି ଏହି ସ୍ଥାନରେ ସୁରକ୍ଷା ଦୃଷ୍ଟିରୁ ପ୍ରଶାସନ ତରଫରୁ କୌଣସି ବ୍ୟବସ୍ଥା ନାହିଁ। ବିଭିନ୍ନ ସମୟରେ ଅଘଟଣ ଘଟିବାର ମଧ୍ୟ ନଜିର ରହିଛି।
ପ୍ରକାଶଥାଉକି, ୨୦୧୯ ଜାନୁୟାରୀ ୨ରେ କେତେଜଣ ଯୁବତୀ ଯୁବକ ବଣ ଭୋଜି କରିବାକୁ ଆସିଥିବାବେଳେ ଦୁର୍ଘଟଣା ଘଟିଥିଲା। ଡ଼୍ୟାମ୍ ଭିତରେ ଅହୁଲା ଡଙ୍ଗାରେ ସେମାନେ ବୁଲୁଥିବା ବେଳେ କୌଣସି କାରଣରୁ ଡଙ୍ଗାଟି ଓଲଟି ପଡିଥିଲା ଓ ଜଣେ ଯୁବତୀଙ୍କ ମୃତ୍ୟୁ ଘଟିଥିଲା। ଏଭଳି ଦୁର୍ଘଟଣା ଏବଂ ଡ଼୍ୟାମର ସମସ୍ୟାକୁ ନେଇ ବାରମ୍ବାର ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପରେ ମଧ୍ୟ ଜିଲା ପ୍ରଶାସନ ଦୃଷ୍ଟି ଦେଉନାହିଁ। ଡ୍ୟାମ ହୁଡାରେ ଗାଡ଼ି ଚଳାଚଳ ପାଇଁ ପ୍ରଶାସନ ପକ୍ଷରୁ ବାରଣ କରାଯାଇଥିବା ସତ୍ତ୍ୱେ କେହି ଆକଟ କରୁ ନଥିବାରୁ ଗାଡି ଚଳାଚଳ କରୁଛି। ଅର୍ଥନେଇ ହୁଡାକୁ ଗାଡି ଛଡା ଯାଉଥିବାମଧ୍ୟ ପର୍ଯ୍ୟଟକମାନେ କହୁଛନ୍ତି। ହୁଡାରେ ମାଟି ଧୋଇ ନଯିବା ପାଇଁ ଘାସ ଲଗାଯାଇଥିବାବେଳେ ଗୋରୁ ଚରି ନଷ୍ଟ କରିଦେଉଛନ୍ତି। ତେଣୁ ଜିଲା ପ୍ରଶାସନ ଏବଂ ପର୍ଯ୍ୟଟନ ବିଭାଗ ଏଥିପ୍ରତି ଦୃଷ୍ଟି ଦେଇ ଏହି ପର୍ଯ୍ୟଟନ ସ୍ଥଳୀର ବିକାଶ ଏବଂ ସୁରକ୍ଷା ବ୍ୟବସ୍ଥା ଓ ଗମନାଗମନ ବ୍ୟବସ୍ଥା କରିବା ପାଇଁ ପର୍ଯ୍ୟଟକ ଓ ଅଞ୍ଚଳବାସୀ ଦାବି କରିଛନ୍ତି।
(ବୈଦ୍ୟନାଥ ବେହେରା)
