ଚଣ୍ଡିଗଡ,୨୧।୭।ପଞ୍ଜାବ କଂଗ୍ରେସର ସଙ୍କଟ ମଧ୍ୟରେ ଦଳର ନବନିଯୁକ୍ତ ସଭାପତି ନବଜୋତ ସିଂ ସିଦ୍ଧୁ ବୁଧବାର ଅମୃତସରରେ ପ୍ରଥମ ବୈଠକ ଡାକିଥିଲେ। ଏହାପୂର୍ବରୁ ସିଦ୍ଧୁ କଂଗ୍ରେସ ମନ୍ତ୍ରୀ, ବିଧାୟକ ତଥା ରାଜ୍ୟର ବରିଷ୍ଠ ନେତାଙ୍କ ସହ ପୁନଃସମନ୍ବୟ ଅଭିଯାନରେ ଜଡିତ ଥିଲେ। ଏଭଳି ପରିସ୍ଥିତିରେ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂଙ୍କ କ୍ୟାମ୍ପରେ ସମର୍ଥକଙ୍କ ସଂଖ୍ୟା ହ୍ରାସ ପାଉଥିବା ଜଣାପଡିଛି। ରାଜ୍ୟର ଅଧିକାଂଶ ମନ୍ତ୍ରୀ ଓ ବିଧାୟକମାନେ ସିଦ୍ଧୁଙ୍କ ନିଯୁକ୍ତି ଉପରେ ହାଇକମାଣ୍ଡଙ୍କ ନିଷ୍ପତ୍ତିକୁ ଠିକ କହିଛନ୍ତି। ତେବେ ଦଳର କିଛି ନେତା ଏବେ ମଧ୍ୟ ନୀରବ ଅଛନ୍ତି। ସିଦ୍ଧୁଙ୍କ ନିଯୁକ୍ତି ସମ୍ପର୍କରେ ସେ କୌଣସି ମନ୍ତବ୍ୟ ଦେଇନାହାଁନ୍ତି। ଗତ ଚାରି ଦିନ ମଧ୍ୟରେ ସିଦ୍ଧୁଙ୍କ ଆନ୍ଦୋଳନ ଏବଂ କ୍ୟାପଟେନଙ୍କ ନୀରବତା ସ୍ପଷ୍ଟ କରିଛି ଯେ ପଞ୍ଜାବରେ କଂଗ୍ରେସରେ ଫାଟ ସୃଷ୍ଟି ହୋଇଛି। ସିଦ୍ଧୁ ତାଙ୍କ ସପକ୍ଷରେ ସମଗ୍ର ଦଳକୁ ଏକଜୁଟ କରିବାକୁ ଚେଷ୍ଟା କରୁଥିବାବେଳେ କ୍ଷମା ମାଗିବାର ସର୍ତ୍ତ ପୂରଣ ନହେବା ପର୍ଯ୍ୟନ୍ତ କ୍ୟାପଟେନ କୌଣସି ପରିସ୍ଥିତିରେ ହାଇ କମାଣ୍ଡର ନିଷ୍ପତ୍ତି ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି ବୋଲି ଜଣାପଡିଛି।
