ଚଣ୍ଡିଗଡ଼,୨୧।୭: ପଞ୍ଜାବ ଲୋକପ୍ରିୟ ଗାୟକ ସିଦ୍ଧୁ ମୁସେୱାଲାଙ୍କ ହତ୍ୟାପରେ ବର୍ତ୍ତମାନ ତାଙ୍କ ପିତାଙ୍କୁ ହତ୍ୟା ଧମକ ଦିଆଯାଇଛି। ଏହି ଧମକ ସିଦ୍ଧୁ ମୁସେୱାଲାଙ୍କ ପିତା ବଲକୌର ସିଂଙ୍କୁ ଏକ ପୋଷ୍ଟ ଜରିଆରେ ଦିଆଯାଇଥିବା ଜଣାପଡ଼ିଛି। ଉକ୍ତ ଧମକପୂର୍ଣ୍ଣ ଚିଠିରେ ପରବର୍ତ୍ତୀ ନମ୍ବର ବାପାଙ୍କର ବୋଲି ଲେଖାଯାଇଛି। ସିଦ୍ଧୁ ମୁସେୱାଲାଙ୍କ ପିତାଙ୍କ ଅନୁଯାୟୀ, ଗାୟକଙ୍କ କିଛି ବନ୍ଧୁ ଇନ୍ଷ୍ଟାଗ୍ରାମରେ ପାକିସ୍ତାନରୁ ଏକ ପୋଷ୍ଟ କରାଯାଇଛି ବୋଲି ତାଙ୍କୁ କହିଥିଲେ। ଉକ୍ତ ପୋଷ୍ଟରେ ଏହି ଧମକ ଦିଆଯାଇଛି। ସୂଚନା ମୁତାବକ, ଇନ୍ଷ୍ଟାଗ୍ରାମରେ ଲେଖାଯାଇଛି ପରବର୍ତ୍ତୀ ନମ୍ବର ବାପାଙ୍କର। ଏହି ଧମକପୂର୍ଣ୍ଣ ବାର୍ତ୍ତା ବିଷୟରେ ମୁସେ ୱାଲାଙ୍କ ବାପା ପୋଲିସକୁ ସୂଚନା ଦେଇଛନ୍ତି। ଏନେଇ ପୋଲିସ ମାମଲା ରୁଜୁ କରିବା ସହ ଅଧିକ ତଦନ୍ତ ଚଳାଇଛି। ଅନ୍ୟପଟେ ପୂର୍ବରୁ ସିଦ୍ଧୁ ମୁସେୱାଲା ହତ୍ୟା ମାମଲା ନେଇ ଯେଉଁ ଅନୁସନ୍ଧାନ କରାଯାଇଛି, ତାହା କେବଳ ଗ୍ୟାଙ୍ଗଷ୍ଟର ଗୋଲ୍ଡି ବ୍ରାର ଏବଂ ଲରେନ୍ସ ବିଷ୍ଣୋଇଙ୍କ ମଧ୍ୟରେ ସୀମିତ ରହିଛି। କିନ୍ତୁ ବର୍ତ୍ତମାନ ଯଦି ସିଦ୍ଧୁ ମୁସେୱାଲାଙ୍କ ବାପାଙ୍କୁ ପାକିସ୍ତାନରୁ ହତ୍ୟା ଧମକ ମିଳିଛି, ତେବେ ପୁଲିସ ପାଇଁ ଏହି ମାମଲା ଜଟିଳ ହୋଇପାରେ। ତେବେ ମୁସେୱାଲାଙ୍କ ବାପାଙ୍କୁ କିଏ ଏଭଳି ଧମକ ଦେଇଛି ତାହା ବର୍ତ୍ତମାନ ଯାଏ ସ୍ପଷ୍ଟ ହୋଇନାହିଁ। ମୁସେୱାଲାଙ୍କ ବନ୍ଧୁମାନେ ଏହାକୁ ପାକିସ୍ତାନ ଲିଙ୍କ ବୋଲି କହୁଛନ୍ତି।
