ବେଙ୍ଗାଲୁରୁ,୧ା୯: ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ମୈସୁରୁ ଗସ୍ତ ସମୟରେ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧାରାମୟାଙ୍କ ସହ ଏକ ହାଲୁକା ଓ ହସମଜା ଆଲୋଚନା କରିଥିଲେ। ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ୍ ସ୍ପିଚ୍ ଆଣ୍ଡ ହିଅରିଂ (AIISH)ର ଡାଇମଣ୍ଡ ଜୁବୁଲି ଉତ୍ସବରେ ସିଦ୍ଧାରମୟା ରାଷ୍ଟ୍ରପତିଙ୍କୁ ହସି ହସି ପଚାରିଥିଲେ, “ଆପଣ କନ୍ନଡ଼ ଜାଣନ୍ତି କି?” ରାଷ୍ଟ୍ରପତି ମୁର୍ମୁ ହସି ଉତ୍ତର ଦେଇଥିଲେ, “ମୁଁ କନ୍ନଡ଼ ଜାଣେ ନାହିଁ, କିନ୍ତୁ ମୁଁ ନିଶ୍ଚିତ ଏହା ଶିଖିବି।”
ଏହି ଘଟଣା ମୈସୁରୁ ବିମାନବନ୍ଦରରେ ରାଷ୍ଟ୍ରପତିଙ୍କୁ କର୍ଣ୍ଣାଟକ ରାଜ୍ୟପାଳ ଥାୱାରଚାନ୍ଦ ଗେହ୍ଲୋଟ ଓ ମୁଖ୍ୟମନ୍ତ୍ରୀ ସିଦ୍ଧାରାମୟା ସ୍ୱାଗତ କରିବା ପରେ ଘଟିଥିଲା। AIISH ଉତ୍ସବରେ କେନ୍ଦ୍ର ସ୍ୱାସ୍ଥ୍ୟ ରାଷ୍ଟ୍ରମନ୍ତ୍ରୀ ଅନୁପ୍ରିୟା ପଟେଲ, କର୍ଣ୍ଣାଟକ ସ୍ୱାସ୍ଥ୍ୟମନ୍ତ୍ରୀ ଦିନେଶ ଗୁଣ୍ଡୁ ରାଓ ଓ ଭାଜପା ଏମପି ତଥା ମୈସୁରୁ ରାଜପରିବାରର ଯଦୁବୀର ଓ୍ୱାଡ଼ିୟାର ଉପସ୍ଥିତ ଥିଲେ।
ସିଦ୍ଧାରାମୟା ତାଙ୍କ ସ୍ୱାଗତ ଭାଷଣ କନ୍ନଡ଼ରେ ଆରମ୍ଭ କରି ରାଷ୍ଟ୍ରପତିଙ୍କୁ ଏହି ପ୍ରଶ୍ନ ପଚାରିଥିଲେ। ରାଷ୍ଟ୍ରପତି ଉତ୍ତରରେ କହିଥିଲେ, “କନ୍ନଡ଼ ମୋର ମାତୃଭାଷା ନୁହେଁ, କିନ୍ତୁ ମୁଁ ଦେଶର ସମସ୍ତ ଭାଷା, ସଂସ୍କୃତି ଓ ପରମ୍ପରାକୁ ଗଭୀର ଭାବେ ସମ୍ମାନ କରେ। ମୁଁ ଚାହେଁ ସମସ୍ତେ ନିଜ ଭାଷା ଓ ସଂସ୍କୃତିକୁ ଜୀବନ୍ତ ରଖନ୍ତୁ। ମୁଁ ନିଶ୍ଚିତ କନ୍ନଡ଼ ଶିଖିବା ପାଇଁ ଚେଷ୍ଟା କରିବି।”
ଏହା ପୂର୍ବରୁ ସିଦ୍ଧାରାମୟା କହିଥିଲେ, “କର୍ଣ୍ଣାଟକରେ ରହୁଥିବା ସମସ୍ତେ କନ୍ନଡ଼ ଶିଖିବା ଉଚିତ।” ଏହି ମନ୍ତବ୍ୟ ବିରୋଧୀ ଦଳ ଓ ନେତାଙ୍କ ମଧ୍ୟରେ ବିକ୍ଷୋଭ ସୃଷ୍ଟି କରିଥିଲା। ତାଙ୍କ ପୂର୍ବ କାର୍ଯ୍ୟକାଳରେ ମଧ୍ୟ ସେ କନ୍ନଡ଼ ଭାଷାର ବ୍ୟାପକ ବ୍ୟବହାର ପାଇଁ ଜୋର ଦେଇଥିଲେ।
