ଲକ୍ଷ୍ନୌ,୧୧।୧୨: ଉତ୍ତରପ୍ରଦେଶର ସାହାରନପୁରରେ ଏକ ଅଭାବନୀୟ ଘଟଣା ଘଟିଛି। ଏଠାରେ ଜଣେ ଭାଇ ତାଙ୍କ ଭଉଣୀକୁ ଗୁଳି କରି ଘଟଣାସ୍ଥଳରୁ ଫେରାର ଥିବା ଅଭିଯୋଗ ହୋଇଛି। ମୋବାଇଲ ଫୋନ ବ୍ୟବହାରକୁ ନେଇ ଭାଇ ଓ ଭଉଣୀଙ୍କ ମଧ୍ୟରେ ଝଗଡ଼ା ହୋଇଥିଲା। ବିବାଦ ଏତେ ବଢିଗଲା ଯେ ଭାଇ ଭଉଣୀକୁ ହତ୍ୟା କରିଥିଲେ। ମା’ଙ୍କ ଅଭିଯୋଗ ଉପରେ ପୋଲିସ ଅଭିଯୁକ୍ତ ପୁଅ ବିରୋଧରେ ହତ୍ୟା ମାମଲା ରୁଜୁ କରି ତାଙ୍କୁ ଖୋଜିବା ଆରମ୍ଭ କରିଛି। ସୋମବାର ପୋଲିସ ଏହି ସୂଚନା ଦେଇଛି।
ସୂରନାଯୋଗ୍ୟ, ପ୍ରତ୍ୟେକ ଦିନ ଭଳି ମୁସ୍କାନ ତାଙ୍କ ଭାଇଙ୍କ ସହିତ ଘରେ ଥିଲେ। ସେ ତାଙ୍କ ମୋବାଇଲ ଫୋନ ବ୍ୟବହାର କରୁଥିଲେ। ଭାଇ ଆଦିତ୍ୟ ଫୋନ ବ୍ୟବହାର କରିବାକୁ ନେଇ ତାଙ୍କୁ ଗାଳି ଦେଇଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା। ବିବାଦ ଏତେ ବଢିଗଲା ଯେ ଆଦିତ୍ୟ ଏକ ପିସ୍ତଲ ବାହାର କରି ଭଉଣୀର ମୁଣ୍ଡରେ ଗୁଳି କରି ସେଠାରୁ ପଳାଇ ଯାଇଥିଲେ। ବନ୍ଧୁକ ଶବ୍ଦ ଶୁଣି ମା’ ଘର ଭିତରକୁ ଆସିଥିଲେ। ମୁସ୍କାନଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ତଳେ ପଡ଼ିଥିବାର ଦେଖିଥିଲେ। ମା’ଙ୍କ ଚିତ୍କାର ଶୁଣି ପଡୋଶୀ ଲୋକମାନେ ସାହାଯ୍ୟ କରିବାକୁ ଦୌଡ଼ିଯାଇ ମୁସ୍କାନଙ୍କୁ ଡାକ୍ତରଖାନା ନେଇଥିଲେ। ଏଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।
