ଆରଡ଼ି,୪।୬,(ଡି.ଏନ୍.ଏ.): ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡ଼ିରେ ଶନିବାର ମଧ୍ୟରାତ୍ରରେ ଲୋକାଚାରରେ ଦେବଦେବ ମହାଦେବ ଶୈଳସୁତା ମାତା ପାର୍ବତୀଙ୍କୁ ବିବାହ କରିବେ । ଏହି ଉପଲକ୍ଷେ ପୂର୍ବାହ୍ନ ୧୧ଟାରେ ଏକ ବର୍ଣ୍ଣାଢ୍ୟ ଶୋଭାଯାତ୍ରାରେ କନ୍ୟାପିତା ଚନ୍ଦ୍ରମଣି ପାଢୀଙ୍କ ଘରୁ ବରଧରା ବାହାରି ବଜାର ପରିକ୍ରମା କରି ବରପିତା ଦୁଷ୍ମନ୍ତ ପାଢୀଙ୍କ ଘରେ ପହଞ୍ଚିଥିଲା । ଷଣ୍ଢ ଲଢେଇ, ଘୋଡାନାଚ, ଦୁଲ୍ଦୁଲି ବାଦ୍ୟ, ଢୋଲ, ଯୋଡି ମହୁରୀ ଆଦି ବାଦ୍ୟରେ ଆରଡ଼ି ପ୍ରକମ୍ପିତ ହୋଇଥିଲା । ସେବାୟତମାନେ ପ୍ରଭୁ ହନୁମାନଙ୍କ ବିଗ୍ରହକୁ ବରଧରା ବେଶରେ ସଜାଇ ବିମାନରେ ପଦାର୍ପଣ କରିଥିଲେ । କରୋନା ମହାମାରୀ ଯୋଗୁ ପୀଠରେ ଲଗାତର ୨ ବର୍ଷ ଧରି ଶିବ ବିବାହ ଶୋଭାଯାତ୍ରା ଉପରେ ପ୍ରଶାସନିକ କଟକଣା ଲଗାଯାଇଥିଲା । ଚଳିତ ବର୍ଷ କଟକଣା କୋହଳ ହୋଇଥିବାରୁ ଶ୍ରଦ୍ଧାଳୁଙ୍କ ଭିଡ ପରିଲକ୍ଷିତ ହୋଇଥିଲା । ପୀଠରେ ଭିଡ ନିୟନ୍ତ୍ରଣ ପାଇଁ ବ୍ୟାପକ ପୋଲିସ ବ୍ୟବସ୍ଥା ଗ୍ରହଣ କରାଯାଇଥିଲା ।
