ଭୁବନେଶ୍ୱର,୫ା୧୦: ଓଡ଼ିଶା ପୋଲିସ ସବ୍-ଇନ୍ସ୍ପେକ୍ଟର (ଏସ୍ଆଇ) ନିଯୁକ୍ତି ପରୀକ୍ଷା କେଳେଙ୍କାରୀ ମାମଲାରେ ରାଜ୍ୟ କ୍ରାଇମ୍ବ୍ରାଞ୍ଚ ରବିବାର ଭୁବନେଶ୍ୱରର ରଘୁନାଥପୁରସ୍ଥିତ ଏକ ନକଲି ଅନଲାଇନ ପରୀକ୍ଷା କେନ୍ଦ୍ରରେ ଚଢ଼ଉ କରିଛି। ଏହି କେନ୍ଦ୍ରରେ ନିଯୁକ୍ତି ପ୍ରକ୍ରିୟା ସହ ଜଡ଼ିତ ଅନୈତିକ କାରବାର ହେଉଥିବା ସୂଚନା ଆଧାରରେ ଏହି ଅଭିଯାନ ଚାଲିଥିଲା। କେନ୍ଦ୍ରର ମାଲିକାନା ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ, ଏବଂ ତଦନ୍ତ ଜାରି ରହିଛି।
କ୍ରାଇମ୍ବ୍ରାଞ୍ଚ ଡିଏସ୍ପି ରତ୍ନପ୍ରଭା ଶତପଥୀଙ୍କ ନେତୃତ୍ୱରେ ଚାଲିଥିବା ତଦନ୍ତରେ ଜଣାପଡ଼ିଛି ଯେ, ଏହି କେଳେଙ୍କାରୀର ମାଷ୍ଟରମାଇଣ୍ଡ ଶଙ୍କର ପୃଷ୍ଟି ଏହି କେନ୍ଦ୍ରକୁ ବାରମ୍ବାର ଆସି ପରୀକ୍ଷା ନିୟନ୍ତ୍ରଣରେ ଜଡ଼ିତ ଥିଲେ। ସୂତ୍ର ଅନୁଯାୟୀ, ଶଙ୍କର ବାଲେଶ୍ୱର, ପୁରୀ, ଗଜପତି, ବ୍ରହ୍ମପୁର, ଭୁବନେଶ୍ୱର, କଟକ ଓ ଭବାନୀପାଟଣାରେ ଏକାଧିକ ନକଲି ଅନଲାଇନ ପରୀକ୍ଷା କେନ୍ଦ୍ର ଚଳାଉଥିଲେ। ଏହି କେନ୍ଦ୍ରଗୁଡ଼ିକ ମଧ୍ୟରେ ବାଲେଶ୍ୱରର ଲକ୍ଷ୍ମୀ ନାରାୟଣ ଏକ୍ସାମ୍ ସେଣ୍ଟର, ପୁରୀର ଶ୍ରୀ ଜଗନ୍ନାଥ ଏକ୍ସାମ୍ ସେଣ୍ଟର, ଗଜପତି ପାରଳାଖେମୁଣ୍ଡିର ଶ୍ରୀ ଭେଙ୍କେଟେଶ୍ୱର ଏକ୍ସାମ୍ ସେଣ୍ଟର, ବ୍ରହ୍ମପୁରର କେଦାରନାଥ, ଆଦିଶକ୍ତି ଇନ୍ଫୋସିସ ଓ ତାରାତାରିଣୀ ଏକ୍ସାମ୍ ସେଣ୍ଟର, ଭୁବନେଶ୍ୱରର ମାଉଣ୍ଟ ଜୀ ଲିଟ୍ରା ସ୍କୁଲ ଓ ଶ୍ରୀ ଲିଙ୍ଗରାଜ ଇନ୍ଫୋସୋଲ, କଟକରେ ଦୁଇଟି ଓ ଭବାନୀପାଟଣାରେ ଦୁଇଟି ନୂଆ ଏକ୍ସାମ୍ ସେଣ୍ଟର ରହିଛି।
କ୍ରାଇମ୍ବ୍ରାଞ୍ଚ ଟିମ୍ ରଘୁନାଥପୁର କେନ୍ଦ୍ରରେ ଚଢ଼ଉ ପାଇଁ ଘରର ମାଲିକ ଚାବି ଆଣିବା ପର୍ଯ୍ୟନ୍ତ ଅପେକ୍ଷା କରିଥିଲା। ଚଢ଼ଉ ସମୟରେ କେନ୍ଦ୍ର ଭିତରେ ବ୍ୟବସ୍ଥାକୁ ବିଶୃଙ୍ଖଳା କରାଯାଇଥିବା ଜଣାପଡ଼ିଛି। ଏହା ପୂର୍ବରୁ କ୍ରାଇମ୍ବ୍ରାଞ୍ଚ ସିଲିକନ୍ ଟେକ୍ ଲ୍ୟାବ୍ ଓ ପଞ୍ଚସଫ୍ଟ ଅଫିସରୁ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରି ସେଗୁଡ଼ିକୁ ସିଲ୍ କରିଥିଲା।
ଏହି କେଳେଙ୍କାରୀରେ ପ୍ରଶ୍ନପତ୍ର ଲିକ୍ ଓ ଜାଲିଆତିର ଅଭିଯୋଗ ସାମ୍ନାକୁ ଆସିଛି। ଗତ ସେପ୍ଟେମ୍ବର ୨୯ରେ ବ୍ରହ୍ମପୁର ପୁଲିସ ୧୨୦ ପରୀକ୍ଷାର୍ଥୀଙ୍କୁ ଆନ୍ଧ୍ରପ୍ରଦେଶରୁ ଉଠାଇ ଆଣିଥିଲା, ଯେଉଁମାନେ ଶ୍ରୀକାକୁଲମରେ ପ୍ରଶ୍ନପତ୍ର ଓ ଉତ୍ତର ଅଭ୍ୟାସ କରୁଥିବା ଅଭିଯୋଗ ହୋଇଛି। ପରୀକ୍ଷାର୍ଥୀଙ୍କଠାରୁ ମୋଟା ଅଙ୍କର ଟଙ୍କା ନିଆଯାଇଥିବା ଚର୍ଚ୍ଚା ହେଉଛି। ଏହି ଘଟଣା ଯୋଗୁଁ ଅକ୍ଟୋବର ୫ ଓ ୬ ତାରିଖରେ ହେବାକୁ ଥିବା ଏସ୍ଆଇ ଲିଖିତ ପରୀକ୍ଷା ସ୍ଥଗିତ ରଖାଯାଇଛି। ଓଡ଼ିଶା ପୁଲିସ ରିକ୍ରୁଟମେଣ୍ଟ ବୋର୍ଡ (ଓପିଆର୍ବି) ପରବର୍ତ୍ତୀ ତାରିଖ ଘୋଷଣା କରିବ।
ତଦନ୍ତର ଦାୟିତ୍ୱ କ୍ରାଇମ୍ବ୍ରାଞ୍ଚ ଡିଏସ୍ପି ରତ୍ନପ୍ରଭା ଶତପଥୀଙ୍କୁ ଦିଆଯାଇଛି, ଯାହାଙ୍କୁ ଏସ୍ପି ଅନିଲ ବେଉରିଆ ସୁପରଭାଇଜ କରୁଛନ୍ତି। ଏହି କେଳେଙ୍କାରୀରେ ରାଜନେତା ଓ ବରିଷ୍ଠ ପୁଲିସ ଅଧିକାରୀଙ୍କ ସମ୍ପୃକ୍ତି ସନ୍ଦେହ ହେଉଛି। ମାଷ୍ଟରମାଇଣ୍ଡ ଶଙ୍କର ପୃଷ୍ଟି ଏବେ ବି ଫେରାର ଥିବା ବେଳେ, କ୍ରାଇମ୍ବ୍ରାଞ୍ଚ ଏହି ରାକେଟ୍ର ମୂଳ ପର୍ଯ୍ୟନ୍ତ ପହଞ୍ଚିବା ପାଇଁ ତୀବ୍ର ତଦନ୍ତ ଜାରି ରଖିଛି।
