ଭୁବନେଶ୍ୱର,୭।୧୦: ଓଡ଼ିଶାରେ ପୋଲିସ ସବ-ଇନ୍ସପେକ୍ଟର (ଏସ୍ଆଇ) ନିଯୁକ୍ତି ପରୀକ୍ଷାରେ ହୋଇଥିବା ଦୁର୍ନୀତି ଓ ଅନିୟମିତତାକୁ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗମ୍ଭୀର ଚିନ୍ତା ପ୍ରକଟ କରିଛନ୍ତି। ଏହି ଘୋଟାଲାରେ ସମ୍ପୃକ୍ତ ଅପରାଧୀଙ୍କୁ କଠୋର ଦଣ୍ଡ ଦେବାକୁ ସେ ନିର୍ଦେଶ ଦେଇଛନ୍ତି। ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି ଯେ, ଏହି ଦୁର୍ନୀତିରେ ଲିପ୍ତ ମୁଖ୍ୟ ଅପରାଧୀଙ୍କୁ କୌଣସି ସ୍ଥାନରେ ଲୁଚିଲେ ମଧ୍ୟ ଖୋଜାଯାଇ ଗିରଫ କରାଯିବ।
ମୁଖ୍ୟମନ୍ତ୍ରୀ କହିଛନ୍ତି, “ପୂର୍ବତନ ସରକାର ସମୟରେ ନିଯୁକ୍ତି ପରୀକ୍ଷାରେ ଦୁର୍ନୀତି ସମ୍ପର୍କିତ ଖବର ପ୍ରକାଶ ପାଉଥିଲେ ମଧ୍ୟ ତାହାକୁ ଚାପି ଦିଆଯାଉଥିଲା। ଅନେକ ପରୀକ୍ଷାର୍ଥୀ ଅସାଧୁ ଉପାୟ ଅବଲମ୍ବନ କରି ସରକାରୀ ଚାକିରି ହାସଲ କରୁଥିଲେ। କିନ୍ତୁ ଆମର ଭାଜପା ସରକାର ଏଭଳି ଅନୀତିକୁ ପ୍ରଶ୍ରୟ ଦେବେ ନାହିଁ। ଅସାଧୁ ବ୍ୟକ୍ତିଙ୍କୁ କୌଣସି ସୁରକ୍ଷା ଦିଆଯିବ ନାହିଁ।”
ସେ ଆହୁରି କହିଛନ୍ତି ଯେ, ଭାଜପା ସରକାର କ୍ଷମତାକୁ ଆସିବା ପରେ ନିଯୁକ୍ତି ପ୍ରକ୍ରିୟାରେ ସ୍ୱଚ୍ଛତା ଓ ନିରପେକ୍ଷତା ଆଣିବା ପାଇଁ କଡ଼ା ନିୟମ ପ୍ରଣୟନ କରିଛନ୍ତି। ଏହାକୁ ସୁନିଶ୍ଚିତ କରିବା ପାଇଁ ସରକାର ଏକ ସ୍ୱତନ୍ତ୍ର ସ୍ଟାଣ୍ଡାର୍ଡ ଅପରେଟିଂ ପ୍ରୋସିଜର (SOP) ଜାରି କରିଛନ୍ତି, ଯାହା ନିଯୁକ୍ତି ପରୀକ୍ଷା ପରିଚାଳନାରେ ସ୍ୱଚ୍ଛତା ଓ ନିରାପତ୍ତା ବଜାୟ ରଖିବାକୁ ନିର୍ଦେଶ ଦେଇଛି। ଏହାସହ, ଆଇନରେ ଶୂନ୍ୟ ସହନଶୀଳତା ନୀତି ଗ୍ରହଣ କରାଯାଇଛି, ଯାହା ଅନୁଯାୟୀ ଦୁର୍ନୀତିରେ ଲିପ୍ତ ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ।
କିଛି ଦିନ ତଳେ ଏସ୍ଆଇ ପରୀକ୍ଷା ସମ୍ପର୍କିତ ଦୁର୍ନୀତି ଖବର ସାମ୍ନାକୁ ଆସିବା ପରେ ସରକାର ଏହାକୁ ଗମ୍ଭୀରତାର ସହ ଗ୍ରହଣ କରିଛନ୍ତି। ମୁଖ୍ୟମନ୍ତ୍ରୀ ନିର୍ଦେଶ ଦେଇଛନ୍ତି ଯେ, ଏହି ଘୋଟାଲାରେ ସମ୍ପୃକ୍ତ କାହାରିକୁ ଛଡ଼ାଯିବ ନାହିଁ। ସମସ୍ତ ଅପରାଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ କ୍ରାଇମ୍ ବ୍ରାଞ୍ଚ୍ ଓ ଅନ୍ୟାନ୍ୟ ତଦନ୍ତ ସଂସ୍ଥାକୁ ନିର୍ଦେଶ ଦିଆଯାଇଛି। ମୁଖ୍ୟମନ୍ତ୍ରୀ ଜୋର ଦେଇ କହିଛନ୍ତି, “ଏହି ଦୁର୍ନୀତିରେ ମୁଖ୍ୟ ଅପରାଧୀମାନେ ଯେଉଁଠି ଲୁଚିଥାଉନ୍ତୁ ନା କାହିଁକି, ପାତାଳରେ ବି ଲୁଚିଲେ ସେମାନଙ୍କୁ ଖୋଜି ବାହାର କରାଯିବ ଓ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ।”
ଏହି ଘୋଟାଲାରେ ପୂର୍ବତନ ଡିଆଇଜି କୁଳମଣି ବେହେରାଙ୍କ ପୁଅ ଅମୀୟ ବେହେରାଙ୍କ ଗିରଫ ହେବା ସହ ଅନେକ ବରିଷ୍ଠ ପୋଲିସ ଅଧିକାରୀଙ୍କ ସମ୍ପୃକ୍ତି ନେଇ ଅଭିଯୋଗ ଉଠିଛି। ଏହାସହ ମୁଖ୍ୟ ଅଭିଯୁକ୍ତ ଶଙ୍କର ପୃଷ୍ଟିଙ୍କର ରାଜନୈତିକ ସମ୍ପର୍କ ଓ ବରିଷ୍ଠ ଅଧିକାରୀଙ୍କ ସହ ଯୋଗସୂତ୍ର ମଧ୍ୟ ତଦନ୍ତରେ ସାମ୍ନାକୁ ଆସିଛି। ସରକାର ଏହି ମାମଲାରେ ସ୍ୱଚ୍ଛ ଓ ନିରପେକ୍ଷ ତଦନ୍ତ ପାଇଁ କଡ଼ା ନିର୍ଦେଶ ଦେଇଛନ୍ତି, ଯାହା ରାଜ୍ୟର ନିଯୁକ୍ତି ପ୍ରକ୍ରିୟାରେ ବିଶ୍ୱାସନୀୟତା ଫେରାଇ ଆଣିବାକୁ ଲକ୍ଷ୍ୟ ରଖିଛି।
ଏହାସହ, ସରକାର ଆଗାମୀ ନିଯୁକ୍ତି ପରୀକ୍ଷାଗୁଡ଼ିକୁ ଅଧିକ ସୁରକ୍ଷିତ ଓ ସ୍ୱଚ୍ଛ ଢଙ୍ଗରେ ପରିଚାଳନା କରିବା ପାଇଁ ପଦକ୍ଷେପ ନେଉଛନ୍ତି। ଏହା ମାଧ୍ୟମରେ ରାଜ୍ୟରେ ମେଧାବୀ ଓ ଯୋଗ୍ୟ ପ୍ରାର୍ଥୀମାନଙ୍କୁ ନିଷ୍ଠାପୂର୍ଣ୍ଣ ଭାବେ ଚାକିରି ପାଇବାରେ ସୁଯୋଗ ମିଳିବ ବୋଲି ମୁଖ୍ୟମନ୍ତ୍ରୀ ଆଶା ବ୍ୟକ୍ତ କରିଛନ୍ତି।
ନିଯୁକ୍ତି ପ୍ରକ୍ରିୟାକୁ ସ୍ୱଚ୍ଛ ଓ ନିରପେକ୍ଷ କରି ଦୁର୍ନୀତି ବିରୋଧରେ ଆମ ସରକାର ଶୂନ୍ୟ ସହନଶୀଳତା ନୀତି ଆପଣେଇଛନ୍ତି । pic.twitter.com/fVi3DxfIVT
— Mohan Charan Majhi (@MohanMOdisha) October 7, 2025
