ଦାରିଙ୍ଗବାଡ଼ି,୧୨।୭(ଡି.ଏନ୍.ଏ.): କରୋନା ସଂକ୍ରମଣକୁ ପ୍ରତିହତ କରିବା ପାଇଁ ଜିଲାପ୍ରଶାସନର ନିର୍ଦ୍ଦେଶକ୍ରମେ କନ୍ଧମାଳ ଜିଲା ପ୍ରତି ଶନିବାର ଏବଂ ରବିବାର ଦୁଇଦିନ ଧରି ଶଟଡାଉନ ଘୋଷଣା କରାଯାଇଛି । ଏହା ମାସର ଶେଷ ଶନିବାର, ରବିବାର ପର୍ଯ୍ୟନ୍ତ ପାଳନ ପାଇଁ ନିର୍ଦ୍ଦେଶ ରହିଛି । ଚଳିତ ସପ୍ତାହ ଦ୍ୱିତୀୟ ଥର ପାଇଁ ଏହି ଶଟଡାଉନକୁ ପାଳନ କରାଯାଇଛି । ଶଟଡାଉନ ଯୋଗୁ ଦାରିଙ୍ଗବାଡ଼ି ଆଇଆଇସି କୌଶିକ ମାଝିଙ୍କ ନେତୃତ୍ୱରେ ବିଭିନ୍ନ ଅଞ୍ଚଳରେ ଜୋରଦାର ପାଟ୍ରୋଲିଂ କରାଯିବା ସହ ବିଭିନ୍ନ ଛକ ଗୁଡ଼ିକରେ ପୋଲିସ ମୁତୟନ କରାଯାଇଛି । ଯାଞ୍ଚ ସମୟରେ ଅମାନିଆଙ୍କଠାରୁ ଜରିମାନା ଆଦାୟ ହୋଇଛି। ତେବେ କିଛି ଅମାନିଆ ପ୍ରଶାସନର ଆଖିରେ ଧୁଳି ଦେଇ ବେଧଡ଼କ ବ୍ୟବସାୟ କରୁଥିବାରୁ ସ୍ଥାନୀୟ ଲୋକଙ୍କ ଚିନ୍ତା ବଢ଼ିଛି । ଏ ନେଇ ଦାରିଙ୍ଗବାଡ଼ିରେ ଜନଅସନ୍ତୋଷ ବୃଦ୍ଧି ପାଇଛି।
