ରିଷିଡ଼ା,୪ା୯(ସୁଶାନ୍ତ ମଲ୍ଲିକ): ସ୍ଥାନୀୟ ସରସ୍ବତୀ ଶିଶୁ ବିଦ୍ୟାମନ୍ଦିର ମାତୃରାମ ସୋହନ ଲାଲ ବିହାର ରିଷିଡ଼ା ପରିସରରେ ଶ୍ରୀକୃଷ୍ଣ ଜନ୍ମାଷ୍ଟମୀ ମହାସମାରୋହରେ ପାଳିତ ହୋଇଯାଇଛି। ଭଗବାନ ଶ୍ରୀକୃଷ୍ଣଙ୍କ ଜନ୍ମୋତ୍ସବକୁ ନେଇ ସମଗ୍ର ବିଦ୍ୟାଳୟ ପରିସରରେ ଆଧ୍ୟାତ୍ମିକ ତଥା ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା।
କାର୍ଯ୍ୟକ୍ରମର ଶୁଭାରମ୍ଭ ପ୍ରଦୀପ ପ୍ରଜ୍ଜ୍ୱଳନ ଓ ଶ୍ରୀକୃଷ୍ଣଙ୍କ ପୂଜାର୍ଚ୍ଚନା ମାଧ୍ୟମରେ କରାଯାଇଥିଲା। ଏହି ଅବସରରେ ବିଦ୍ୟାଳୟର ଛୋଟ ଛୋଟ ଭଉଣୀ-ଭାଇମାନେ ଶ୍ରୀକୃଷ୍ଣ, ରାଧା ଏବଂ ଗୋପାଳ ବେଶରେ ସଜ୍ଜିତ ହୋଇ ଉପସ୍ଥିତ ସମସ୍ତଙ୍କ ମନ ମୋହି ନେଇଥିଲେ। ବିଦ୍ୟାଳୟ ପକ୍ଷରୁ ଭଜନ ସମାରୋହ, ଶ୍ରୀକୃଷ୍ଣ ବେଶ ପ୍ରତିଯୋଗିତା ଏବଂ ପାରମ୍ପରିକ ହାଣ୍ଡିଭଙ୍ଗା (ଦହିହାଣ୍ଡି) ଉତ୍ସବ ଆୟୋଜିତ ହୋଇଥିଲା।
ସଭାରେ ପ୍ରଧାନ ଆଚାର୍ଯ୍ୟ ବସୁଦେବ ସେଲମାଙ୍କ ଅଧ୍ୟକ୍ଷତାରେ ମୁଖ୍ୟ ଅତିଥି ବିଶିଷ୍ଟ ଉଦ୍ୟୋଗପତି ଆଶିଷ କେଡ଼ିଆ ମୁଖ୍ୟବକ୍ତା ସୁବାସ ଚନ୍ଦ୍ର ପାଢ଼ୀ ଯୋଗଦେଇଥିବାବେଳେ ପ୍ରଧାନ ଆଚାର୍ଯ୍ୟ ସ୍ବାଗତ ଭାଷଣ ଦେଇଥିଲେ। ପୁରସ୍କାର ବିତରଣ ପରିଚାଳନାରେ ଦେବେନ୍ଦ୍ର ମହାନନ୍ଦ ଏବଂ ସଭା ପରିଚାଳନାରେ ବିଳାସିନୀ ରଣା ପରିଶେଷରେ ଧନ୍ୟବାଦ ଦେଇଥିଲେ। ପ୍ରସନ୍ନ ସାହୁ ଝିଲିରାଣୀ ବାଗ ଭଜନ ସଙ୍ଗୀତ ଗାୟନ କରିଥିଲେ। ଉପସ୍ଥିତ ଅତିଥି ତଥା ଗୁରୁଜୀ-ଗୁରୁମାମାନେ ଶ୍ରୀକୃଷ୍ଣଙ୍କ ଜୀବନ ଆଦର୍ଶ, ଧର୍ମ ପ୍ରତିଷ୍ଠା ଏବଂ ନୀତିଶିକ୍ଷା ସମ୍ପର୍କରେ ଛାତ୍ରୀଛାତ୍ରଙ୍କୁ ମାର୍ଗଦର୍ଶନ ପ୍ରଦାନ କରିଥିଲେ। ପରିଶେଷରେ ପ୍ରସାଦ ସେବନ ସହ କାର୍ଯ୍ୟକ୍ରମ ସାଙ୍ଗ ହୋଇଥିଲା। ଉକ୍ତ ଉତ୍ସବରେ ବିଦ୍ୟାଳୟର ପରିଚାଳନା ସମିତିର ସଦସ୍ୟବୃନ୍ଦ, ଆଚାର୍ଯ୍ୟା-ଆଚାର୍ଯ୍ୟ ଏବଂ ଅଭିଭାବକମାନେ ଉପସ୍ଥିତ ରହି ସହଯୋଗ କରିଥିଲେ।
