ରାଞ୍ଚି,୧୦।୧୦: ରାଞ୍ଚିରେ ରୋମାଞ୍ଚକର ମୁକାବିଲାରେ ୨୪୯ ରନ କରି ମଧ୍ୟ ପରାଜୟର ସାମ୍ନା କରିଛି ଟିମ ଇଣ୍ଡିଆ। ୱେଷ୍ଟଇଣ୍ଡିଜ ୨୫୦ ରନ୍ର ବିଶାଳ ଲକ୍ଷ୍ୟକୁ ସଫଳତାର ସହ ପିଛା କରି ଟି-୨୦ କ୍ରିକେଟ୍ରେ ନିଜର ଶକ୍ତି ପ୍ରଦର୍ଶନ କରିଛି। କାରିବୀୟ ବ୍ୟାଟରମାନେ ଭାରତୀୟ ବୋଲରଙ୍କୁ ନିର୍ଧୁମ ପ୍ରହାର କରି ମୋଟ ୨୦ଟି ଛକା ମାରିଥିଲେ। ଫଳରେ ବିଶାଳ ସ୍କୋର କରି ମଧ୍ୟ ତାହାକୁ ରକ୍ଷା କରିବାରେ ବିଫଳ ହୋଇଥିଲା ଭାରତ।
ଏହି ରନ୍ ଚେଜ୍ ୱେଷ୍ଟଇଣ୍ଡିଜ ପାଇଁ ଟି-୨୦ ଅନ୍ତର୍ଜାତୀୟ କ୍ରିକେଟ୍ରେ ସର୍ବବୃହତ୍ତମ ରନ୍ ଚେଜ୍ ହୋଇଥିବା ବେଳେ ସମଗ୍ର ଟି-୨୦ ଅନ୍ତର୍ଜାତୀୟ ଇତିହାସରେ ଏହା ଦ୍ୱିତୀୟ ସର୍ବବୃହତ୍ତମ ରନ୍ ଚେଜ ବୋଲି ରିପୋର୍ଟରେ ଉଲ୍ଲେଖ ରହିଛି।
ତେବେ ଏତେ ବଡ଼ ସ୍କୋର କରିବା ପରେ ମଧ୍ୟ ଭାରତ କାହିଁକି ହାରିଲା? ଆସନ୍ତୁ ଜାଣିବା ପରାଜୟର ୩ଟି ପ୍ରମୁଖ କାରଣ।
କାକର ଯୋଗୁ ବୋଲରଙ୍କ ବିଗିଡ଼ିଲା ଲୟ
ମ୍ୟାଚ୍ରେ ଟସ ଏକ ବଡ଼ ଭୂମିକା ନେଇଥିବା କୁହାଯାଉଛି। ଦ୍ୱିତୀୟ ଇନିଂସରେ କାକର ଭାରତୀୟ ବୋଲରଙ୍କ ପାଇଁ ବଡ଼ ସମସ୍ୟା ପାଲଟିଥିଲା। ବଲ ଓଦା ହୋଇଯିବାରୁ ବୋଲରମାନେ ଠିକ ଭାବେ ଗ୍ରିପ କରିପାରି ନଥିଲେ। ଏହାର ପ୍ରଭାବ ସ୍ପିନରଙ୍କ ପ୍ରଦର୍ଶନରେ ସ୍ପଷ୍ଟ ଦେଖିବାକୁ ମିଳିଥିଲା। ଅକ୍ଷର ପଟେଲ, କୁଲଦୀପ ଯାଦବ ଓ ନମନ ଧୀରଙ୍କୁ ୱେଷ୍ଟଇଣ୍ଡିଜ ବ୍ୟାଟରମାନେ ଜୋରଦାର ଆକ୍ରମଣ କରିଥିଲେ। ଏହି ତିନି ଜଣ ସ୍ପିନର ମିଳିତ ଭାବେ ୯.୩ ଓଭରରେ ୧୪୧ ରନ ବ୍ୟୟ କରିଥିଲେ। କାକର କାରଣରୁ ଦ୍ରୁତ ବୋଲରମାନେ ମଧ୍ୟ ଠିକ ଲେନ୍ଥରେ ବୋଲିଂ କରିବାକୁ ସଂଘର୍ଷ କରିଥିଲେ।
ରୋଷ୍ଟନ ଚେଜ୍ଙ୍କ ଚମତ୍କାର ବୋଲିଂ
ଭାରତୀୟ ଇନିଂସର ଗୋଟିଏ ସମୟରେ ଟିମ ଇଣ୍ଡିଆ ୧୦ ଓଭରରେ ୧୨୭ ରନ କରିସାରିଥିଲା। ପ୍ରତ୍ୟେକ ଓଭରରେ ବଡ଼ ସ୍କୋର ହେଉଥିବାରୁ ଭାରତ ୨୭୦ରୁ ୨୭୫ ରନ ପର୍ଯ୍ୟନ୍ତ ପହଞ୍ଚିବ ବୋଲି ଆଶା କରାଯାଉଥିଲା। କିନ୍ତୁ ମଧ୍ୟ ଓଭରରେ ରୋଷ୍ଟନ ଚେଜ ଭାରତର ରନ୍ ଗତିରେ ବ୍ରେକ ଲଗାଇଥିଲେ। ସେ ୪ ଓଭରରେ ମାତ୍ର ୨୪ ରନ ଦେଇ ୩ଟି ଉଇକେଟ ନେଇଥିଲେ। ତାଙ୍କର ଏହି ପ୍ରଭାବଶାଳୀ ସ୍ପେଲ ଯୋଗୁ ଭାରତ ବଡ଼ ସ୍କୋର ଆଡ଼କୁ ଆଗେଇ ପାରି ନ ଥିଲା। ପିଚ୍ରେ ରନ ସଂଗ୍ରହର ଗତି ଦେଖିଲେ ଭାରତ ଆଉ ୨୦ରୁ ୩୦ ରନ ଅଧିକ କରିଥିଲେ ମ୍ୟାଚ୍ର ଫଳାଫଳ ଅଲଗା ହୋଇପାରିଥାନ୍ତା।
ମୟଙ୍କ ଯାଦବଙ୍କୁ ଆଉ ଗୋଟିଏ ଓଭର ଦିଆଗଲାନି କାହିଁକି?
ଭାରତର ଯୁବ ଦ୍ରୁତ ବୋଲର ମୟଙ୍କ ଯାଦବ ଏହି ମ୍ୟାଚ୍ରେ ପ୍ରଭାବଶାଳୀ ପ୍ରଦର୍ଶନ କରିଥିଲେ। ସେ ୩ ଓଭର ବୋଲିଂ କରି ୩ଟି ଉଇକେଟ ନେଇଥିଲେ। ତାଙ୍କ ବୋଲିଂରେ ଉଇକେଟ ନେବାର କ୍ଷମତା ସ୍ପଷ୍ଟ ଦେଖାଯାଇଥିଲା। ୧୩ରୁ ୧୪ ଓଭର ମଧ୍ୟରେ ୱେଷ୍ଟଇଣ୍ଡିଜ୍ର ବିଜୟ ସମ୍ଭାବନା ବଢ଼ୁଥିବା ବେଳେ ଭାରତକୁ ଏକ ବଡ଼ ନିଷ୍ପତ୍ତି ନେବାର ଆବଶ୍ୟକତା ଥିଲା। ଏପରି ସ୍ଥିତିରେ ମୟଙ୍କଙ୍କୁ ପୁଣି ବୋଲିଂ ଦିଆଯାଇଥିଲେ ସେ ଉଇକେଟ ନେଇ ମ୍ୟାଚ୍ର ମୋଡ଼ ବଦଳାଇ ପାରିଥାନ୍ତେ ବୋଲି ଚର୍ଚ୍ଚା ହେଉଛି। ତେବେ ଅଧିନାୟକଙ୍କ ରଣନୀତି ଏବଂ ବୋଲରଙ୍କ ବ୍ୟବହାର ନେଇ ଏବେ ପ୍ରଶ୍ନ ଉଠିଛି।