ଭୁବନେଶ୍ୱର, ୧୫। ୮(ବ୍ୟୁରୋ):‘ମିସ୍ ଇଣ୍ଡିଆ ନୟନତାରା’ର ଅପୂର୍ବ ସଫଳତା ପରେ ଏସ୍ଜେ ପ୍ରଡକ୍ସନ ହାଉସ୍ ପକ୍ଷରୁ ଅନ୍ଲାଇନ୍ରେ ଚାଲିଥିବା ‘ମିସେସ୍ ଇଣ୍ଡିଆ ନୟନତାରା’ ପ୍ରତିଯୋଗିତାର ଗ୍ରାଣ୍ଡ୍ ଫିନାଲେ ଭୁବନେଶ୍ୱରଠାରେ ଅନୁଷ୍ଠିତ ହୋଇଯାଇଛି। କୋଲକାତାର ଶ୍ରଦ୍ଧା ଭଟ୍ଟାଚାର୍ଯ୍ୟ ‘ମିସେସ୍ ଇଣ୍ଡିଆ ନୟନତାର’ ଟାଇଟଲ୍ ହାସଲ କରିଛନ୍ତି। ସେହିପରି ଭୁବନେଶ୍ୱରର ମନୀଷା ରାଣୀ ଦାଶ ପ୍ରଥମ ଓ ବଲାଙ୍ଗୀର ସୟଦ ସୁମନ ଦ୍ୱିତୀୟ ରନର୍ସଅପ୍ ହୋଇଛନ୍ତି। ଏହି ପ୍ରତିଯୋଗିତାରେ ପ୍ରାୟ ୪୫୦ ଜଣ ପ୍ରତିଯୋଗୀ ଅଂଶଗ୍ରହଣ କରିଥିଲେ। ବ୍ୟକ୍ତିତ୍ୱ ବିକାଶ, ଯୋଗାଯୋଗ ଦକ୍ଷତା, ସୌନ୍ଦର୍ଯ୍ୟ, ମାନସିକ ଓ ଶାରୀରିକ କାର୍ଯ୍ୟ, ଆଚରଣ ପରିଚାଳନା, ଅନ୍ଲାଇନ୍ କ୍ଲାସ୍ ଓ ଗ୍ରୁମିଙ୍ଗ୍ ସହିତ ୩ ମାସର ଅନ୍ଲାଇନ୍ ଅଧିବେଶନ କରାଯାଇ ଗ୍ରାଣ୍ଡ୍ ଫିନାଲେ ପାଇଁ ଶ୍ର୍ରେଷ୍ଠ ୭ଜଣଙ୍କୁ ଚୟନ କରାଯାଇଥିଲା। ଏସ୍ଜେ ପ୍ରଡକ୍ସନର ଫାଉଣ୍ଡର ତଥା ପ୍ରତିଷ୍ଠିତ ନୃତ୍ୟଶିଳ୍ପୀ ଶାଶ୍ୱତ ଯୋଶୀ ସେମାନଙ୍କୁ ଯୋଗାଯୋଗ ଦକ୍ଷତା ଓ ଆଚରଣ ପରିଚାଳନା ଉପରେ ପ୍ରଶିକ୍ଷଣ ଦେଇଥିବାବେଳେ, ଚନ୍ଦନ ଦାସ ବ୍ୟକ୍ତିତ୍ୱ ବିକାଶ, ସାଗରିକା ମହାନ୍ତି ଶରୀର ଯତ୍ନ, ବିଭୁଦତ୍ତ ଦାସ ସାଧାରଣ ଜ୍ଞାନ ଓ ନୃତ୍ୟ, ଚିନ୍ମୟ ପ୍ରଧାନ କ୍ରୀଡା ଓ ବ୍ୟାୟାମ ସମ୍ପର୍କରେ ଟ୍ରେନିଂ ଦେଇଥିଲେ। ଫିନାଲେରେ ପ୍ରତିଯୋଗୀମାନେ ଡିଜାଇନର ଜିତ୍ ଜଗଜିତ୍ ଓ ନିକିତା ନାୟକଙ୍କ ପୋଷାକ ପରିଧାନ କରିଥିଲେ। ଏଥିସହ ଡିମ୍ପି ମହାପାତ୍ର ମେକଅପ୍ ଓ କେଶ ବିନ୍ୟାସ କରିଥିଲେ। ଉଦ୍ୟୋଗକାରୀ ବନସ୍ମିତା ପତି, ଶିକ୍ଷାବିତ୍ ବବିତା ପଟ୍ଟନାୟକ, ମଡେଲ୍ ତଥା ଅଭିନେତ୍ରୀ ଜାଗୃତି ରଥ ଓ ମିଡିଆ ପର୍ସନ ତପସ୍ବିନୀ ପଟ୍ଟନାୟକ ବିଚାରକ ରହିଥିଲେ। ପ୍ରତିଯୋଗିତାରେ ଅନ୍ୟ ୪ଜଣ ଫାଇନାଲିଷ୍ଟ ସୁଦୀପ୍ତା ରାଣୀ ବିଶ୍ୱାଳ, ନେହା ଅଗ୍ରଓ୍ବାଲ, ମୋନାଲିସା ପାଢୀ ଓ ଜ୍ୟୋତିରୂପା ଶତପଥୀଙ୍କୁ ଗ୍ଲାମର୍ସ ଲୁକ୍, ଫିଟନେସ୍ ଗର୍ଲ, ବ୍ୟକ୍ତିତ୍ୱ, ଫ୍ୟାଶନ୍ ଆଇକନ୍ ସବ୍ଟାଇଟଲ୍ ସହିତ ପୁରସ୍କୃତ କରାଯାଇଥିଲା। ଭବିଷ୍ୟତରେ ଏମାନେ ଅନ୍ତର୍ଜାତୀୟ ପ୍ଲାଟଫର୍ମରେ ଭାରତୀୟଙ୍କୁ ପ୍ରତିନିଧିତ୍ୱ କରି ଗର୍ବିତ କରିବେ। ଆଗାମୀ ଦିନରେ ଓଡ଼ିଶାକୁ ଭାରତର ଫ୍ୟାଶନ ରାଜଧାନୀ କରିବାର ଲକ୍ଷ୍ୟ ଥିବା ଶାଶ୍ୱତ କହିଛନ୍ତି।
