କୁହାଯାଏ, କୁକୁର ହେଉଛି ସବୁଠାରୁ ବିଶ୍ୱସ୍ତ ପ୍ରାଣୀ ଏବଂ ମଣିଷର ସର୍ବୋତ୍ତମ ବନ୍ଧୁ। କିନ୍ତୁ ମଣିଷ ଏହା ବୁଝି ପାରେନା। ଏହି କାରଣରୁ ମଣିଷମାନେ ଅନେକ ଥର ନିଜ ଗୃହପାଳିତ ପଶୁମାନଙ୍କୁ ନିର୍ଯାତନା ଦେଇଥାନ୍ତି। ନିକଟରେ ଜଣେ ମହିଳା ଏମିତି କାର୍ଯ୍ୟ କରିଥିଲେ। ସେ ତାଙ୍କ ପୋଷା କୁକୁର ଉପରେ ଆକ୍ରମଣ କରିଥିଲେ। ଯାହା ଦେଖି ଲୋକେ ଆଶ୍ଚର୍ଯ୍ୟ ହୋଇଥିଲେ।
ଏକ ରିପୋର୍ଟ ଅନୁଯାୟୀ, ଫ୍ଲୋରିଡାରେ ରହୁଥିବା ୩୭ ବର୍ଷୀୟା ଜାମି ଲିନ୍ କୁଜାୱା ତାଙ୍କ ପୋଷା କୁକୁରକୁ ନିର୍ଯାତନା ଦେଇଥିବାରୁ ପୋଲିସ ତାଙ୍କୁ ଗିରଫ କରିଛି। ଜାମିଙ୍କର ୩ଟି ପୋଷା କୁକୁର ଥିଲେ। ଏଥିସହିତ ଗୋଟିଏ ବିଲେଇ, ଗୋଟିଏ ଶୁଆ ଏବଂ ଗୋଟିଏ ପକ୍ଷୀ ଥିଲେ। ତାଙ୍କ ପଡ଼ୋଶୀମାନେ ଗତ ମାସରେ ହର୍ନାଣ୍ଡୋ କାଉଣ୍ଟି ସରିଫ କାର୍ଯ୍ୟାଳୟରେ ଏକ ଅଭିଯୋଗ ଦାଖଲ କରି କହିଥିଲେ ଯେ, ଜାମି ତାଙ୍କ ପାଳିତ ପଶୁପକ୍ଷୀଙ୍କ ଉପରକୁ ଗୁଳି ଚଳାଉଛନ୍ତି।
୧୯ ଏପ୍ରିଲରେ ଯେତେବେଳେ ପଶୁ ନିୟନ୍ତ୍ରଣ ଅଧିକାରୀ ଜାମିଙ୍କ ଘରକୁ ଆସିଲେ, ସେତେବେଳେ ସେ ବିବି ଏୟାର ବନ୍ଧୁକ ବିଷୟରେ ପଚାରିଥିଲେ। ତାଙ୍କ ପାଖରେ ବନ୍ଧୁକ ଥିବା ସେ ସମ୍ପୂର୍ଣ୍ଣ ଭାବେ ଅସ୍ବୀକାର କରିଥିଲେ। ସେ କହିଥିଲେ, ତାଙ୍କ ତିନି କୁକୁରଙ୍କ ଶରୀରରେ ଦେଖାଯାଉଥିବା କ୍ଷତଗୁଡ଼ିକ ନିଜ ନିଜ ମଧ୍ୟରେ ଲଢ଼େଇ ପରେ ହୋଇଥିଲା। ଯେତେବେଳେ ମହିଳା ଜଣକ ନିଜ କୁକୁରମାନଙ୍କର ଟିକାକରଣ ବିବରଣୀ ମଧ୍ୟ ଦେଇପାରି ନ ଥିଲେ, ସେତେବେଳେ ବିଭାଗର ସନ୍ଦେହ ହୋଇଥିଲା। ଅଧିକାରୀମାନେ ତଦନ୍ତ ପାଇଁ ପୁନର୍ବାର ଆସିଲେ, ସେମାନେ ପୁନର୍ବାର କୁକୁରମାନଙ୍କ ଗୋଡ଼ରେ ତାଜା କ୍ଷତ ଦେଖିବାକୁ ପାଇଥିଲେ। ଯେତେବେଳେ ସେମାନେ ଯାଞ୍ଚ କରିବାକୁ ଚେଷ୍ଟା କଲେ, କୁକୁରମାନେ ଏତେ ଯନ୍ତ୍ରଣା ଅନୁଭବ କଲେ ଯେ ସେମାନଙ୍କୁ ପାଦ ଛୁଇଁବାକୁ ମଧ୍ୟ ଅନୁମତି ଦେଇ ନ ଥିଲେ। ଏହା ପରେ କୁକୁରମାନଙ୍କର ଏକ୍ସ-ରେ କରାଯାଇଥିଲା, ଯେଉଁଥିରେ ଦର୍ଶାଯାଇଥିଲା ଯେ, କୁକୁରମାନଙ୍କ ଦେହରେ ଗୁଳି ରହିଛି। ଗୋଟିଏ କୁକୁରର ଶରୀରରେ ୬୧ ବିବି ଅର୍ଥାତ୍ ୧୯ଟି ଗୁଳି ଥିଲା। ଦ୍ୱିତୀୟ କୁକୁରର ଶରୀରରେ ୭୧ ବିବି ପିଲେଟ ଏବଂ ୨୨ଟି ସୀସା ପିଲେଟ ରହିଥିଲା। ଯେତେବେଳେ ତାଙ୍କୁ ପଚରାଗଲା, ସେ କହିଥିଲେ କୁକୁରମାନେ ବାଡ଼ ପାର ହୋଇ ଅନ୍ୟ ପାର୍ଶ୍ୱକୁ ଯିବାକୁ ଚେଷ୍ଟା କଲାବେଳେ ସେ କୁକୁର ଉପରେ ଗୁଳି ଚଳାଇଥିଲେ। ଏହି ପାର୍ଥକ୍ୟ ପ୍ରକାଶ ପାଇବା ପରେ ଜାମିଙ୍କ ବିରୋଧରେ ପଶୁମାନଙ୍କ ଉପରେ ନିର୍ଯାତନା ମାମଲା ରୁଜୁ ହୋଇଛି। ବର୍ତ୍ତମାନ ଯଦି ଅଭିଯୋଗ ପ୍ରମାଣିତ ହୁଏ, ତେବେ ତାଙ୍କୁ ୫ ବର୍ଷ ଜେଲ ଦଣ୍ଡ ଏବଂ ୩୮ ଲକ୍ଷ ଟଙ୍କା ଜରିମାନା ଦେବାକୁ ପଡ଼ିବ।
