କରାଚୀ, ୮ା୮ (ପି.ଟି.)- ଇଂଲଣ୍ଡ ବିପକ୍ଷ ୩ ମ୍ୟାଚ ବିଶିଷ୍ଟ ଟି୨୦ ସିରିଜ ଅଗଷ୍ଟ ୨୮ରୁ ସାଉଥାମ୍ପଟନରେ ଆରମ୍ଭ ହେବ। ଟି୨୦ ସ୍ପେଶାଲିଷ୍ଟ ସୋଏବ ମଲିକ ଅଗଷ୍ଟ ୧୫ରେ ଦଳ ସହିତ ଯୋଗ ଦେବେ। ତେବେ ଏହା ପୂର୍ବରୁ ତାଙ୍କୁ ଦୁଇଥର କୋଭିଡ୍-୧୯ ଟେଷ୍ଟରେ ଉତ୍ତୀର୍ଣ୍ଣ ହେବାକୁ ପଡ଼ିବ। ପାକିସ୍ତାନ କ୍ରିକେଟ ବୋର୍ଡ (ପିସିବି) ତରଫରୁ ଶୁକ୍ରବାର ସୂଚନା ଦିଆଯାଇଛି। ଇଂଲଣ୍ଡ ଓ ପାକିସ୍ତାନ ମଧ୍ୟରେ ଚାଲିଥିବା ଟେଷ୍ଟ ସିରିଜ ଶେଷ ହେବା ପରେ ଉଭୟ ଦଳ ୩ ମ୍ୟାଚ ବିଶିଷ୍ଟ ଅନ୍ତର୍ଜାତୀୟ ଟି୨୦ ସିରିଜ ଖେଳିବେ। ମାଞ୍ଚେଷ୍ଟରରେ ଅଗଷ୍ଟ ୨୮, ୩୦ ଓ ସେପ୍ଟେମ୍ବର ୧ରେ ଜୈବସୁରକ୍ଷିତ ପରିବେଶ ମଧ୍ୟରେ ଏହି ତିନୋଟି ମ୍ୟାଚ ଖେଳାଯିବ। ମଲିକ ୟୁଏଇରେ ତାଙ୍କ ପରିବାର ସହିତ କିଛି ସମୟ ବିତାଇବାକୁ ଚାହିଁଥିଲେ। ଇଂଲଣ୍ଡରେ ବିଳମ୍ବରେ ଦଳରେ ଯୋଗଦେବା ଲାଗି ପିସିବି ତାଙ୍କୁ ଅନୁମତି ଦେଇଥିଲା। ପାକିସ୍ତାନର ଏହି ପୂର୍ବତନ ଅଧିନାୟକ ଭାରତର ଟେନିସ ଷ୍ଟାର ସାନିଆ ମିର୍ଜାଙ୍କୁ ବିବାହ କରିଛନ୍ତି। ସେମାନଙ୍କର ବର୍ଷକର ଏକ ପୁତ୍ର ସନ୍ତାନ ରହିଛି। କୋଭିଡ୍-୧୯ ଦେଖାଦେବା ପରଠାରୁ ସେ ତାଙ୍କ ପରିବାରକୁ ଭେଟପାରି ନାହାନ୍ତି। ଅନ୍ୟପକ୍ଷରେ ସହକାରୀ କୋଚ୍ ଶାହିଦ ଆସଲାମ୍ ଅଗଷ୍ଟ ୮ରେ ମାଞ୍ଚେଷ୍ଟରକୁ ଫେରିବେ। ସେ ତାଙ୍କ ଭାଇଙ୍କ ଅନ୍ତ୍ୟେଷ୍ଟିକ୍ରିୟାରେ ଯୋଗଦାନ କରିବା ଲାଗି ଗତ ସପ୍ତାହରେ ଲାହୋର ଆସିଥିଲେ। ପାକିସ୍ତାନ କ୍ରିକେଟ ଦଳ ବର୍ତ୍ତମାନ ମାଞ୍ଚେଷ୍ଟରରେ ଇଂଲଣ୍ଡ ବିପକ୍ଷରେ ପ୍ରଥମ ଟେଷ୍ଟ ମ୍ୟାଚ ଖେଳୁଛି।
