ଭୋପାଳ, ୨୯।୯ : ମଧ୍ୟପ୍ରଦେଶର ପଞ୍ଚାୟତ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ରାମଖେଲାୱନ ପଟେଲଙ୍କ ଜଣେ ସରକାରୀ ଅଫିସରଙ୍କୁ ଧମକ ଦେଉଥିବା ଅଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଅଡିଓରେ ମନ୍ତ୍ରୀ ରାମଖେଲାୱନ ଖୋଲାଖୋଲି ଭାବେ ସରକାରୀ କର୍ମଚାରୀଙ୍କୁ ଧମକ ଦେଇଛନ୍ତି ଏବଂ କହିଛନ୍ତି ଯଦି ରାଜି ନ ହୁଅନ୍ତି ତେବେ ଓଲଟା ଲଟକାଇ ଦେବି।
ଏହି ମାମଲାରେ ଅମରପାଟନର ଖାଦ୍ୟ ସୁରକ୍ଷା ଅଧିକାରୀ ନୀରଜ ବିଶ୍ୱକର୍ମା ଅଭିଯୋଗ କରିଛନ୍ତି ଯେ ତାଙ୍କୁ ମାଡ ଦିଆଯାଇଛି। ସଞ୍ଚାଳକ ଏବଂ ତାଙ୍କ ସହଯୋଗୀମାନେ ତାଙ୍କୁଅପହରଣ କରିବାକୁ ଚେଷ୍ଟା କରିଥିଲେ। ଅଭିଯୋଗ କରିବା ପାଇଁ ପୋଲିସ ଷ୍ଟେଶନରେ ପହଞ୍ଚିବା ପରେ ତାଙ୍କୁ ୫ ଘଣ୍ଟା ବସାଇ ରଖାଯାଇଥିଲା ଏବଂ ଏଫଆଇଆର ପଞ୍ଜୀକୃତ ହୋଇ ନଥିଲା। ବିଶ୍ୱକର୍ମା କହିଛନ୍ତି ଯେ ସେ ଦୁଇଜଣ ବ୍ୟବସାୟୀଙ୍କର ଅଭିଯୋଗ ତଥ୍ୟ ସଂଗ୍ରହ କରିଥିଲେ। ଏହା ପରେ ତାଙ୍କୁ ଲାଞ୍ଚ ଯଚା ଯାଇଥିଲା। ସେ ଲାଞ୍ଚ ଗ୍ରହଣ କରିବାକୁ ମନା କରିବା ପରେ ମନ୍ତ୍ରୀଙ୍କ ନିକଟକୁ ଏକ କଲ ଆସିଥିବା ଅଭିଯୋଗ ହୋଇଛି।
ଏନେଇ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ବାନଙ୍କ ସରକାର ଅଡୁଆରେ ପଡିଛନ୍ତି। ଏହି ପ୍ରସଙ୍ଗରେ ବିରୋଧୀ ଦଳ ସରକାରଙ୍କୁ ଘେରିବା ଆରମ୍ଭ କରିଛନ୍ତି।
ବିଶ୍ୱକର୍ମାଙ୍କ ଅନୁଯାୟୀ, ସରକାରଙ୍କ ମନ୍ତ୍ରୀମାନେ କାର୍ଯ୍ୟାନୁଷ୍ଠାନ ଗ୍ରହଣ ନକରିବାରୁ ଅଧିକାରୀମାନଙ୍କୁ ଧମକ ଦେଉଛନ୍ତି। ଏଥି ସହିତ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ବୁଧବାର ଶପୁର ଜିଲାର ଜିଲା ଯୋଗାଣ ଅଧିକାରୀଙ୍କୁ ନିଲମ୍ବିତ କରିଛନ୍ତି। ଏକ ସପ୍ତାହ ମଧ୍ୟରେ ଅବହେଳା ପ୍ରଦର୍ଶନ କରୁଥିବା ଜିଲା ଯୋଗାଣ ଅଧିକାରୀଙ୍କୁ ନିଲମ୍ବନ କରିବା ମୁଖ୍ୟମନ୍ତ୍ରୀଙ୍କ ଏହା ହେଉଛି ତୃତୀୟ କାର୍ଯ୍ୟାନୁଷ୍ଠାନ।
ସୂଚନାଯୋଗ୍ୟ, ରାମଖେଲାୱନ ପଟେଲ ସତନାର ଅମରପାଟନ ବିଧାନସଭା ଆସନରୁ ଜିତି ମନ୍ତ୍ରୀ ହୋଇଛନ୍ତି।
