ଇସଲାମବାଦ,୯।୫: ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ପାକିସ୍ତାନ ସଂସଦରେ ଜଣେ ଏମପି ବିସ୍ଫୋରକ ବୟାନ ଦେଇଛନ୍ତି। ଯାହା ଏବେ ସାରା ବିଶ୍ୱରେ ଚହଳ ପକାଇଛି। ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରିଫଙ୍କୁ ‘କାପୁରୁଷ’ ଓ ‘ଶୃଗାଳ’ ବୋଲି ଆଖ୍ୟା ଦେଇ ଜଣେ ଏମପି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱକୁ ପ୍ରଶଂସା କରିଛନ୍ତି। ଏହି ଘଟଣା ପାକିସ୍ତାନର ରାଜନୀତି ଓ ସାମରିକ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି।
ପାକିସ୍ତାନ ସଂସଦରେ ଏମପି ଜଣକ କହିଛନ୍ତି, ଶେହବାଜ ସରିଫ ନରେନ୍ଦ୍ର ମୋଦିଙ୍କ ନାମ ନେବାକୁ ଭୟ କରୁଛନ୍ତି। ଆମର ସୈନ୍ୟବାହିନୀ ଏକ ସିଂହ ଦ୍ୱାରା ନୁହେଁ, ଶୃଗାଳ ଦ୍ୱାରା ଚାଲୁଛିି। ଆମର ସୈନ୍ୟମାନେ ମନୋବଳ ହରାଇଛନ୍ତି। ଭାରତର ‘ଅପରେଶନ ସିନ୍ଦୂର’ ଅଧୀନରେ ପାକିସ୍ତାନ ଓ ପାକିସ୍ତାନ ଅଧିକୃତ କଶ୍ମୀରରେ ଆତଙ୍କବାଦୀ ଶିବିର ଉପରେ କରାଯାଇଥିବା ଆକ୍ରମଣକୁ ମଜବୁତ ନେତୃତ୍ୱର ଉଦାହରଣ ଭାବେ ଉଲ୍ଲେଖ କରିଛନ୍ତି। ସେ ମୋଦିଙ୍କ ନିଷ୍ପତ୍ତି ଓ ଭାରତୀୟ ସୈନ୍ୟବାହିନୀର କାର୍ଯ୍ୟଦକ୍ଷତାର ପ୍ରଶଂସା କରି କହିଛନ୍ତି ଯେ ପାକିସ୍ତାନର ନେତୃତ୍ୱ ଏହାର ତୁଳନାରେ ଦୁର୍ବଳ ଓ ନିଷ୍କ୍ରିୟ।
ଏହି ବୟାନ ଏପରି ସମୟରେ ଆସିଛି ଯେତେବେଳେ ପହଲଗାମ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ଘଟିବା ପରେ ଭାରତ-ପାକିସ୍ତାନ ମଧ୍ୟରେ ଉତ୍ତେଜନା ଚରମରେ ରହିଛି। ଭାରତ ଏହାର ପ୍ରତିଶୋଧ ଭାବେ ‘ଅପରେଶନ ସନ୍ଦୂର’ ଜରିଆରେ ପାକିସ୍ତାନରେ ଥିବା ଆତଙ୍କବାଦୀ ଶିବିର ଉପରେ ମିସାଇଲ ଆକ୍ରମଣ କରିଛି, ଯାହାକୁ ଶେହବାଜ ଶରିଫ ‘ଯୁଦ୍ଧର କାର୍ଯ୍ୟ’ ବୋଲି ଅଭିହିତ କରି ତୀବ୍ର ପ୍ରତିକ୍ରିୟା ଦେଇଛନ୍ତି। ଏହି ପରିପ୍ରେକ୍ଷୀରେ ଜଣେ ପାକିସ୍ତାନୀ ଏମପିଙ୍କ ମୋଦୀଙ୍କ ପ୍ରଶଂସା ଓ ନିଜ ପ୍ରଧାନମନ୍ତ୍ରୀଙ୍କୁ ‘ବୁଜଦିଲ’ (କାପୁରୁଷ) ବୋଲି କହିବା ପାକିସ୍ତାନରେ ରାଜନୈତିକ ଓ ସାମାଜିକ ମହଲରେ ବ୍ୟାପକ ଆଲୋଚନାର ବିଷୟ ହୋଇଛି।
ଏହି ଏମପିଙ୍କ ଏପରିି ବୟାନ ପାକିସ୍ତାନର ଅଭ୍ୟନ୍ତରୀଣ ରାଜନୈତିକ ଓ ସାମରିକ ସଙ୍କଟକୁ ଆହୁରି ଉଜାଗର କରିଛି। ସେ ଦାବି କରିଛନ୍ତି ଯେ ପାକିସ୍ତାନ ସୈନ୍ୟବାହିନୀର ମନୋବଳ ଭାଙ୍ଗିଛି ଏବଂ ନେତୃତ୍ୱର ଅଭାବ ଯୋଗୁଁ ଦେଶ ଭାରତର ଆକ୍ରମଣାତ୍ମକ ନୀତି ସାମନାରେ ଦୁର୍ବଳ ହୋଇପଡ଼ିଛି। ଏହା ସହିତ, ଏମପିଜଣକ ମୋଦୀଙ୍କ ନେତୃତ୍ୱକୁ ‘ଦୃଢ଼ ଓ ନିଷ୍ପତ୍ତିମୂଳକ’ ବୋଲି ବର୍ଣ୍ଣନା କରି ପାକିସ୍ତାନ ସରକାରଙ୍କ ନିଷ୍କ୍ରିୟତା ଉପରେ ପ୍ରଶ୍ନ ଉଠାଇଛନ୍ତି।
