ବଲିଉଡ୍ ବାଦ୍ଶାହ ଶାହରୁଖ୍ ଖାନ୍ ଆଜି ୫୫ ବର୍ଷରେ ପଦାର୍ପଣ କରିଛନ୍ତି। ଏହି ଅବସରରେ ପ୍ରଶଂସକମାନେ ତାଙ୍କୁ ଜନ୍ମଦିନ ଶୁଭେଚ୍ଛା ଜଣାଇଛନ୍ତି। ଶାହରୁଖ୍ କେବଳ ଅଭିନୟରେ ନୁହେଁ ପ୍ରେମରେ ମଧ୍ୟ ସଫଳ ହୋଇଛନ୍ତି। ଶାହରୁଖ ପିଲାଦିନର ବନ୍ଧୁ ଗୌରୀଙ୍କୁ ବିବାହ କରିଥିଲେ। ଦୁହିଁଙ୍କୁ ବଲିଉଡ୍ର ଆଦର୍ଶ ଦମ୍ପତି ବିବେଚନା କରାଯାଏ। ଗୌରୀଙ୍କୁ ପାଇବାକୁ ଶାହରୁଖ ଅନେକ ସଂଘର୍ଷ କରିଥିଲେ। ଦୁହେଁ ଭିନ୍ନ ସମ୍ପ୍ରଦାୟର ହୋଇଥିବାରୁ ବିବାହରେ ଅନେକ ସମସ୍ୟା ଦେଖାଯାଇଥିଲା। କିନ୍ତୁ କେହି କାହା ହାତ ଛାଡି ନ ଥିଲେ। ଏକ ସାକ୍ଷାତକାରରେ ଶାହରୁଖ କହିଥିଲେ ନୂଆଦିଲ୍ଲୀରେ ରହି କଳେଜ୍ରେ ପଢୁଥିବା ସମରେ ଗୌରୀ ତାଙ୍କୁ ଛାଡି ମୁମ୍ବାଇ ପଳାଇ ଆସିଥିଲେ। ତାଙ୍କୁ ଖୋଜିବା ପାଇଁ କିଛି ସାଙ୍ଗଙ୍କ ସହ ମୁମ୍ବାଇ ଆସିଥିଲେ। କିନ୍ତୁ ମୁମ୍ବାଇରେ ଗୌରୀଙ୍କ ଘର କେଉଁଠି ତାଙ୍କୁ ଜଣା ନ ଥିଲା। ତେଣୁ ତାଙ୍କୁ ମୁମ୍ବାଇ ସମୁଦ୍ର କୂଳରେ ଖୋଜି ବୁଲୁଥିଲେ। କାରଣ ଗୌରୀଙ୍କୁ ସୁଇମିଂ ବେଶ୍ ପସନ୍ଦ ଥିଲା। ସମୁଦ୍ର କୂଳରେ ଗୌରୀ ନ ମିଳିବାରୁ ଏକ ଟ୍ୟାକ୍ସି ଡ୍ରାଇଭର୍ଙ୍କ ସହ ତାଙ୍କର ଭେଟ ହୋଇଥିଲା। ଯେ କି ତାଙ୍କୁ ମୁମ୍ବାଇରେ ଗୋଟିଏ ନୁହେଁ ଅନେକ ସମୁଦ୍ର ଥିବା କଥା କହିଥିଲେ। ପାଖରେ ମାତ୍ର ୪୦୦ ଟଙ୍କା ଥିବାରୁ ସେହି ଟଙ୍କାରେ ଯେତେ ସମୁଦ୍ର କୂଳ ବୁଲି ହେବା ସେତେକି ବୁଲାଇ ଦେବାକୁ ଶାହରୁଖ ଡ୍ରାଇଭର୍କୁ କହିଥିଲେ। ଡ୍ରାଇଭର୍ ତାଙ୍କ କିଛି ସମୁଦ୍ର କୂଳ ବୁଲାଇଥିଲେ କିନ୍ତୁ ଗୌରୀ ମିଳି ନ ଥିଲେ। ପାଖରୁ ଟଙ୍କା ସରିଯିବାରୁ ସାଙ୍ଗମାନେ ଭୋକରେ ରାଗି ଯାଇଥିଲେ। କିନ୍ତୁ ଶାହରୁଖ ଆଶା ହରାଇ ନ ଥିଲେ। ସେ ଶେଷ ଥର ପାଇଁ ଆଉ ଏକ ସମୁଦ୍ର କୂଳକୁ ଯିବାକୁ କହିଥିଲେ। ଏହି ସମୟରେ ଶାହରୁଖ୍ ଜଣେ ଯୁବତୀଙ୍କ ପାଟି ଶୁଣି ତାଙ୍କୁ ଅନୁସରଣ କରଥିଲେ। ସେହି ଯୁବତୀ ଜଣଙ୍କ ଗୌରୀ ହିଁ ଥିଲେ। ଶାହରୁଖଙ୍କୁ ମୁମ୍ବାଇରେ ଦେଖ ସେ ଆଶ୍ଚର୍ଯ୍ୟ ହୋଇଯାଇଥିଲେ। ତୁମକୁ ଭେଟିବାକୁ ଆସିଥିଲି ବୋଲି ଏହାର ଉତ୍ତରରେ ଶାହରୁଖ କହିଥିଲେ। ଏହାପରେ ଉଭୟଙ୍କ ସମ୍ପର୍କ ବେଶ୍ ମଜଭୁତ ହୋଇଥିଲା।
