ପୁରୀ ଅଫିସ, ୯ା୨: ହିନ୍ଦୁଙ୍କ ଚାରିଧାମ ମଧ୍ୟରେ ପୁରୀ ଅନ୍ୟତମ ଶ୍ରେଷ୍ଠ ଧାମ। ରାଜ୍ୟ ସରକାର ପୁରୀ ସହରକୁ ବିଶ୍ୱ ଐତିହ୍ୟ ସହର ଭାବେ ଗଢି ତୋଳିବା ନିମନ୍ତେ ପ୍ରୟାସ ଜାରି ରଖିଛନ୍ତି। ସେହିପରି ଜିଲା ପ୍ରଶାସନ ସ୍ବଚ୍ଛ ପୁରୀ ଗର୍ବ ଆମରି ସ୍ଲୋଗାନ ଦେଇ ପରିଷ୍କାର ପରିଚ୍ଛନ୍ନତା ପ୍ରତି ଗୁରୁତ୍ୱ ଦେଉଛି। ମାତ୍ର ସରକାରଙ୍କ ଯୋଜନା ଏବଂ ପ୍ରଚାର ପ୍ରସାରଠାରୁ ବହୁ ଦୂରରେ ପୁରୀ ସହର ଥିବା ପରି ମନେ ହେଉଛି। କାରଣ ଶ୍ରୀମନ୍ଦିରଠାରୁ ଅଳ୍ପ ଦୂର କାକୁଡ଼ିଖାଇ ଆଚାରୀ ମଠ ପାଖରେ ବୁଢ଼ୀ’ମା ଠାକୁରାଣୀଙ୍କ ମନ୍ଦିର ସମ୍ମୁଖ ରାସ୍ତାରେ କିଛି ଦିନ ହେବ ନଳା ପାଣି ଭାସୁଛି। ଫଳରେ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେବା ସହ ଦୁର୍ଗନ୍ଧରେ ନାକ ଫାଟି ପଡୁଛି। ରାସ୍ତା ଉପରେବିଭିନ୍ନ ମଇଳା ଓ ଅପରିଷ୍କାର ଭାସୁଛି। ସ୍ଥାନୀୟ ବାସିନ୍ଦା ଯାତାୟାତ ପାଇଁ ସମସ୍ୟାର ସମ୍ମୁଖୀନ ହେଉଛନ୍ତି। ସେହିପରି ଉକ୍ତ ରାସ୍ତା ବଡ଼ଦାଣ୍ଡକୁ ସଂଯୋଗ କରିଛି। ଏହା ଏକ ପ୍ରମୁଖ ରାସ୍ତା ହୋଇଥିବାରୁ ପ୍ରତିଦିନ ବିଭିନ୍ନ ଯାନବାହନ ଓ ଲୋକେ ଚଳାଚଳ କରିଥାନ୍ତି। ଏପରିକି ଉକ୍ତ ରାସ୍ତା ଦେଇ ଶ୍ରଦ୍ଧାଳୁମାନେ ତୀର୍ଥ ପୁଷ୍କରଣୀ ଶ୍ୱେତଗଙ୍ଗା, ଦକ୍ଷିଣକାଳି ମନ୍ଦିର, ବେଳାଭୂମି, ସ୍ବର୍ଗଦ୍ୱାରକୁ ଯାଇଥାନ୍ତି। ସେହିପରି ଶ୍ରୀମନ୍ଦିରକୁ ମଧ୍ୟ ଏହି ବାଟ ଦେଇ ଅନେକ ଶ୍ରଦ୍ଧାଳୁ ଯାଇଥାନ୍ତି। ତେବେ ରାସ୍ତାରେ ନଳାପାଣି, ମଇଳା ଆଦି ଭାସୁଥିବାରୁ ଯାତ୍ରୀମାନେ ଅସନ୍ତୋଷ ପ୍ରକାଶ କରୁଥିବା ଦେଖିବାକୁ ମିଳୁଛି। ପର୍ଯ୍ୟଟକମାନେ ନକାରାମତ୍କ ଭାବନା ନେଇ ଫେରୁଛନ୍ତି। ଏହାସତ୍ତ୍ୱେ ଏଥିପ୍ରତି ପ୍ରଶାସନର ନଜର ପଡୁନାହିଁ। ଏନେଇ ଶ୍ରଜଗନ୍ନାଥ ଭକ୍ତ ପରିଷଦର ଅଧ୍ୟକ୍ଷ ସୂର୍ଯ୍ୟନାରାୟଣ ରଥ କହିଛନ୍ତି, ସରକାରଙ୍କ ପକ୍ଷରୁ ଶ୍ରୀମନ୍ଦିର ଚାରିପାଖରେ ନିର୍ମାଣ କାର୍ଯ୍ୟ ଚାଲିଛି। ପୁରୀ ସହରକୁ ସରକାର ଐତିହ୍ୟ ସହର ଭାବରେ ଗଢି ତୋଳିବା ପାଇଁ ଚେଷ୍ଟା ଚଳାଇଛନ୍ତି। ମାତ୍ର ପୁରୀବାସୀଙ୍କ ସମେତ ଏଠାକୁ ଆସୁଥିବା ଭକ୍ତ ଓ ପର୍ଯ୍ୟଟକମାନେ ଯମ ଯନ୍ତ୍ରଣା ଭୋଗୁଛନ୍ତି। ବ୍ରାହ୍ମଣ ଓ ସେବାୟତ ବୁଲି ବୁଲି ମନ୍ଦିରକୁ ଯାଉଛନ୍ତି। ଲୋକଙ୍କ ଯିବାଆସିବା ପାଇଁ ପ୍ରଶାସନ କୌଣସି ସ୍ବତନ୍ତ୍ର ବ୍ୟବସ୍ଥା କରୁନାହିଁ। ଠିକାଦାରଙ୍କ ମନମୁଖୀ କାର୍ଯ୍ୟ ପାଇଁ ଭକ୍ତଙ୍କ ମାନବିକ ଅଧିକାର କ୍ଷୁର୍ଣ୍ଣ ହେଉଛି। ତେଣୁ ପ୍ରଶାସନ ସମସ୍ୟାକୁ ଦୃଷ୍ଟିରେ ରଖି ତ୍ୱରିତ ପଦକ୍ଷେପ ନେବା ଉଚିତ ବୋଲି ରଥ କହିଛନ୍ତି।
