ଜଗତସିଂହପୁର,୧୭ା୭(ପ୍ରମୋଦ କୁମାର ନାୟକ): ଜଗତ୍ସିଂହପୁର ଜିଲା ଆଳିପିଙ୍ଗଳ ନିକଟ ଦେବୀ ନଦୀର ଅପରପାର୍ଶ୍ୱ କେତକେଶ୍ୱର ଘାଟରେ ତିର୍ତ୍ତୋଲ ଥାନା ବିଦ୍ୟାଧରପୁର ଗ୍ରାମର ରମେଶ ପ୍ରଧାନଙ୍କ ପୁଅ ଭୋଳା (୧୪) ରବିବାର ଅପରାହ୍ନରେ ନଦୀରେ ବୁଡି ଯାଇଥିଲେ। ସ୍ଥାନୀୟ ଜନସାଧାରଣ ଓ ଅଗ୍ନିଶମ ବାହିନୀ କର୍ମଚାରୀମାନେ ବହୁ ଖୋଜାଖୋଜି କରି ପାଇ ନ ଥିଲେ। ତେବେ ଦୀର୍ଘ ୧୭ ଘଣ୍ଟା ପରେ ନାବାଳକ ଭୋଳାଙ୍କ ମୃତଦେହ ଉଦ୍ଧାର ହୋଇଛି। ଓଡ୍ରାଫ ଟିମ୍ ପକ୍ଷରୁ ପାଣିରେ ବୁଡି ଖୋଜାଖୋଜି କରାଗଲା ପରେ ସେ ବୁଡି ଯାଇଥିବା ସ୍ଥାନରୁ ଉଦ୍ଧାର କରାଯାଇଛି।
ମିଳିଥିବା ସୂଚନାନୁଯାୟୀ, ଭୋଳା ବୁଡି ଗଲାପରେ ଆଉ ଉପରକୁ ଉଠି ନ ଥିଲେ । ନଦୀରେ ବର୍ଷା ଜଳ ଥିଲେ ସୁଦ୍ଧା ଅଧିକ ପାଣି ନ ଥିଲା । କିନ୍ତୁ କେହି ଭୋଳା ବୁଡି ଯାଇଥିବା ସ୍ଥାନରେ ବୁଡି ଖୋଜିବାକୁ ଚେଷ୍ଟା କରି ନ ଥିଲେ। ତେବେ ତାଙ୍କର କିପରି ମୃତ୍ୟୁ ହେଲା ତାକୁ ନେଇ ନାନା କଥା ଆଲୋଚନା ହେଉଛି। କୁହାଯାଉଛି ଏହି ସ୍ଥାନରେ ବାଲି ଘାଟ ଥିବାରୁ ମେଶିନ୍ ସାହାଯ୍ୟରେ ବିଭିନ୍ନ ସ୍ଥାନରେ ବେଆଇନ ଭାବେ ବାଲି ଉତ୍ତୋଳନ ଯୋଗୁ ପୋଖରୀର ଭ୍ରମ ସୃଷ୍ଟି କରିଛି। ବର୍ଷା ଜଳ ପ୍ରବାହ ସମୟରେ ବାଲି ଖାଲ ଆଡକୁ ମାଡି ହାଲକା ଆବରଣ ସୃଷ୍ଟି କରିଛି । ଭୋଳା ଏହି ଧସା ବାଲିରେ ଗୋଡ଼ ପକାଇବା କ୍ଷଣି ଫସି ଯିବାର ଏଭଳି ଅଭାବନୀୟ ଘଟଣା ଘଟିଗଲା। ବାଲିରୁ ଉପରକୁ ଉଠି ନ ପାରି ଜୀବନ ଚାଲିଗଲା।
ସୂଚନାଯୋଗ, ଭୋଳାଙ୍କ ସମେତ ତାଙ୍କ ଗାଁର ଅନ୍ୟ ୪ ଜଣ ଗୋରେଖନାଥ ପୀଠରେ ଜଳାଭିଷେକ ପାଇଁ ଗତ ୧୭ ତାରିଖରେ କେତକେଶ୍ୱର ଘାଟରୁ ପାଣି ଉଠାଇବା ପାଇଁ ପହଞ୍ଚତ୍ଥିଲେ। ସେମାନଙ୍କ ମଧ୍ୟରୁ ଜଣେ ଭୋଗ ଆଣିବାକୁ ଯାଇଥିବା ବେଳେ ଅନ୍ୟ ୪ ଜଣ ନଦୀରେ ସ୍ନାନ କରିବାକୁ ପଶିଥିଲେ। କିନ୍ତୁ ବାଲିଘାଟ ଦ୍ୱାରା କରାଯାଇଥିବା ଖାଲରେ ପଶିଯିବାରୁ ଅଡୁଆରେ ପଡିଥିଲେ। ସୌଭାଗ୍ୟ ଉପସ୍ଥିତ ଅନ୍ୟ କାଉଡିଆମାନେ ୩ ଜଣଙ୍କୁ ଉଦ୍ଧାର କରିବାକୁ ସମର୍ଥ ହୋଇଥିବା ବେଳେ ଭୋଳା ପାଣିରେ ବୁଡି ଯାଇଥିଲେ।ଏହା ପରେ କାଉଡିଆମାନଙ୍କ ସମେତ ଅନ୍ୟ ଲୋକମାନେ ଖୋଜାଖୋଜି କରିଥିଲେ ସୁଦ୍ଧା ସନ୍ଧାନ କରିପାରି ନ ଥିଲେ। ତା ପରେ ଜଗତ୍ସିଂହପୁର ଅଗ୍ନିଶମ ବାହିନୀକୁ ଫୋନ୍ କରିବାରୁ ୬ ଜଣିଆ ଦଳ ଖୋଜାଖୋଜିରେ ଲାଗିଥିଲେ। ରାତି ହୋଇଯିବାରୁ ଭୋଳାଙ୍କୁ ଖୋଜିବାରେ ବାଧା ସୃଷ୍ଟି ହୋଇଥିଲା। ତେବେ ଉଦ୍ଧାର ୩ ଜଣଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
