ବ୍ରହ୍ମପୁର ଅଫିସ,୧୭ା୩: ବଡ଼ବଜାର ଥାନା ଅଧୀନ ଫାଷ୍ଟଗେଟ୍ ସ୍ଥିତ ଛେଳିକଟା ଘର ସମ୍ମୁଖରେ ଛିଡ଼ା ହୋଇଥିବା ଏକ ମାଲବାହୀ ଟ୍ରକରେ କେତେକ ଦୁର୍ବୃତ୍ତ ନିଆଁ ଲଗାଇ ଦେଇଥିବା ଅଭିଯୋଗ ହୋଇଛି। ଏ ନେଇ ଡ୍ରାଇଭର୍ ପ୍ରଦୀପ କୁମାର (୩୧) ବଡ଼ବଜାର ଥାନାରେ ଅଭିଯୋଗ କରିଛନ୍ତି। ଏନେଇ ପୋଲିସ ଏକ ମାମଲା(ନଂ.୭୯/୨୩) ରୁଜୁ କରି ସ୍ଥାନୀୟ ଲୋକଙ୍କୁ ପଚରାଉଚରା କରୁଛି।
ପ୍ରକାଶ ଯେ, ଉତ୍ତରପ୍ରଦେଶରୁ ଏକ ଟ୍ରକ୍ (ୟୁପି୭୫ଏମ୍-୬୬୩୬) ଗତ ୧୫ତାରିଖ ରାତି ପ୍ରାୟ ୧ଟାରେ ଚୁଡ଼ି, କାଚ, ପ୍ଲାଷ୍ଟିକ୍ ଆଦି ସାମଗ୍ରୀ ଆଣି ବ୍ରହ୍ମପୁରରେ ପହଞ୍ଚି ଥିଲା। ଟ୍ରକ୍ଟି ଆସିକା ରୋଡ ଛେଳିକଟା ଘର ସମ୍ମୁଖରେ ରହିଥିଲା। ଦୁଇ ଜଣ ବ୍ୟବସାୟୀ ସେମାନଙ୍କ ବରାଦ ସାମଗ୍ରୀ ଉକ୍ତ ଟ୍ରକରୁ ନେଇଯାଇଥିବା ବେଳେ ଅନ୍ୟ ଜଣେ ବ୍ୟବସାୟୀଙ୍କ ସାମଗ୍ରୀ ଟ୍ରକରେ ରହିଥିଲା। ଅନ୍ୟ ବ୍ୟବସାୟୀ ଜଣଙ୍କ ନ ଆସିବାରୁ ଟ୍ରକ୍ ଚାଳକ ପ୍ରଦୀପ ଉକ୍ତ ଟ୍ରକଟିକୁ ରାସ୍ତା କଡ଼଼ରେ ପାର୍କିଂ କରି ଆଗପଟ ସିଟରେ ଶୋଇପଡ଼ିଥିଲେ। ବିଳମ୍ବିତ ରାତିରେ ପୋଲିସ ପିସିଆର୍ ଭ୍ୟାନ୍ ଟ୍ରକ ନିକଟକୁ ଆସି ଡ୍ରାଇଭରଙ୍କୁ ଡାକିବା ସହ ତାଙ୍କ ଟ୍ରକରେ ନିଆଁ ଲାଗିଯାଇଥିବା ସୂଚନା ଦେଇଥିଲା। ପରେ ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ। କିନ୍ତୁ ଟ୍ରକରେ ଥିବା ପ୍ରାୟ ୫ଲକ୍ଷ ଟଙ୍କାର ସାମଗ୍ରୀ ପୋଡ଼ି ନଷ୍ଟ ହେବା ସହ ଟ୍ରକଟି ଜଳିଯାଇଥିବା ନେଇ ଡ୍ରାଇଭର ପ୍ରଦୀପ ଥାନାରେ ଏତଲା ଦେଇଛନ୍ତି।
