ମୁମ୍ବାଇ,୨୨।୨: ଭାରତୀୟ ଦଳର ବୋଲିଂ କୋଚ୍ ଭାବେ ପୂର୍ବତନ ଭାରତୀୟ ପେସର ଅଜିତ୍ ଅଗରକରଙ୍କୁ ନିଯୁକ୍ତ କରାଯାଉ ବୋଲି ସିନିୟର ଖେଳାଳି ଚାହୁଁଛନ୍ତି। ଏବେ ଟିମ୍ ଇଣ୍ଡିଆର ବୋଲିଂ କୋଚ୍ ଦାୟିତ୍ୱରେ ଅଛନ୍ତି ପୂର୍ବତନ ଭାରତୀୟ ପେସର ପାରସ ମାମବ୍ରେ।
୧୯୯୮ରେ ପଦାର୍ପଣ କରିଥିବା ଅଗରକର ୨୮ ଟେଷ୍ଟ, ୧୯୧ ଦିନିକିଆ ଓ ୪ ଟି୨୦ ମ୍ୟାଚ୍ ଖେଳିଥିଲେ। ୨୦୦୭ରେ ଅନ୍ତର୍ଜାତୀୟ କ୍ରିକେଟକୁ ଅଲବିଦା କରିଥିବା ଏହି ପେସରଙ୍କ ନାମରେ ୫୮ ଟେଷ୍ଟ, ୨୮୮ ଦିନିକଆ ଓ ୩ ଟି୨୦ ଉଇକେଟ ରହିଛି। ୪୪ ବର୍ଷୀୟ ଅଗରକର ଗତ ବର୍ଷ ଜାତୀୟ ମୁଖ୍ୟ ଚୟନକର୍ତ୍ତା ପଦବୀ ପାଇଁ ପ୍ରବଳ ଦାବି ଦାର ଥିଲେ। ସେ ଏବେ ଟିଭି କମେଣ୍ଟଟେଟର ଦାୟିତ୍ୱରେ ଅଛନ୍ତି।
“ଭାରତୀୟ କ୍ରିକେଟ ଦଳରେ ନିଷ୍ପତ୍ତି ନେଉଥିବା ସିନିୟର ଖେଳାଳି ଅଗରକରଙ୍କ ଭଳି ଅଭିଜ୍ଞ କୋଚ୍ ଚାହୁଁଛନ୍ତି। ୨୦୨୩ ବିଶ୍ୱକପ୍ ପର୍ଯ୍ୟନ୍ତ ସେ ପେସ ବୋଲରଙ୍କ ମାର୍ଗଦର୍ଶନ କରିବେ। ମାମବ୍ରେ ଜଣେ ଭଲ ବୋଲିଂ କୋଚ୍। ସେ ଜାତୀୟ କ୍ରିକେଟ ଏକାଡେମୀ(ଏନ୍ସିଏ)ରେ ଭାରତ ଏ, ୧୯ ବର୍ଷରୁ କମ୍ ଭାତରୀୟ ଦଳର ବୋଲରଙ୍କ ଦାୟିତ୍ୱ ନେଇପାରିବେ” ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି।
