ନୂଆଦିଲ୍ଲୀ,୨୧।୧୦: ଏସିଆ କପ୍ ୨୦୨୫ ବିଜେତା ଭାରତୀୟ କ୍ରିକେଟ୍ ଦଳକୁ ଟ୍ରଫି ମିଳିବା ନେଇ ବିବାଦ ଜାରି ରହିଛି। ବିସିସିଆଇ (BCCI) ପକ୍ଷରୁ ଚିଠି ଲେଖାଯାଇଥିଲେ ମଧ୍ୟ ଏସୀୟ କ୍ରିକେଟ୍ ପରିଷଦ (ACC) ର ସଭାପତି ତଥା ପାକିସ୍ତାନ କ୍ରିକେଟ୍ ବୋର୍ଡ (PCB) ଅଧ୍ୟକ୍ଷ ମୋହସିନ୍ ନକଭି ଟ୍ରଫି ହସ୍ତାନ୍ତର କରିବାକୁ ମନା କରିଦେଇଛନ୍ତି।
ଏସିଆ କପ୍ ଟ୍ରଫି ସଂଗ୍ରହ କରିବା ପାଇଁ ଭାରତୀୟ କ୍ରିକେଟ୍ ଦଳର ଜଣେ ଖେଳାଳିଙ୍କୁ ସିଧାସଳଖ ତାଙ୍କ ପାଖକୁ ପଠାଇବାକୁ ସେ ବିସିସିଆଇକୁ ପରାମର୍ଶ ଦେଇଛନ୍ତି। ଫାଇନାଲ୍ରେ ଭାରତ ଜିତିବା ପରେ ନକଭିଙ୍କ ବିବାଦୀୟ ସୋସିଆଲ୍ ମିଡିଆ ପୋଷ୍ଟକୁ ବିରୋଧ କରି ଭାରତୀୟ ଖେଳାଳିମାନେ ତାଙ୍କଠାରୁ ମେଡାଲ୍ ଓ ଟ୍ରଫି ଗ୍ରହଣ କରିନଥିଲେ। ଏହାପରେ ନକଭି ପୁରସ୍କାର ବିତରଣ ଉତ୍ସବକୁ ବନ୍ଦ କରି ଟ୍ରଫିକୁ ନେଇଯାଇଥିଲେ।
ସେ ବିସିସିଆଇକୁ ଲେଖିଥିବା ଚିଠିରେ କହିଛନ୍ତି ଯେ, ଏସିଆ କପ୍ ଟ୍ରଫି ଭାରତୀୟ ଦଳର, କିନ୍ତୁ ବିସିସିଆଇର କର୍ମକର୍ତ୍ତା ଓ ଖେଳାଳି ଆସି ତାହାକୁ ACC ସଭାପତିଙ୍କଠାରୁ ନିଅନ୍ତୁ। କ୍ରିକେଟକୁ ରାଜନୀତିକରଣ କରାଯିବା ଉଚିତ୍ ନୁହେଁ।
ବିସିସିଆଇର ଉପାଧ୍ୟକ୍ଷ ରାଜୀବ ଶୁକ୍ଳା ଏହି କାର୍ଯ୍ୟକୁ ନିନ୍ଦା କରିବା ସହ ତୁରନ୍ତ ଟ୍ରଫି ପ୍ରଦାନ କରିବାକୁ ଦାବି କରିଥିଲେ। ଏହି ବିବାଦରେ ଶ୍ରୀଲଙ୍କା ଓ ଆଫଗାନିସ୍ତାନ କ୍ରିକେଟ୍ ବୋର୍ଡ ମଧ୍ୟ ଭାରତକୁ ସମର୍ଥନ କରିଛନ୍ତି। ଟ୍ରଫି ବର୍ତ୍ତମାନ ACC ମୁଖ୍ୟାଳୟରେ ରହିଛି।
