ବାରିପଦା ଅଫିସ, ୨୪ା୧-ଆତ୍ମବିଶ୍ୱାସ, ଆନ୍ତରିକତା ଓ କଠିନ ପରିଶ୍ରମ ମାଧ୍ୟମରେ ସ୍ବାବଲମ୍ବୀ ହୋଇପାରଛନ୍ତି ଜଣେ ମହିଳା। ସୋସିଆଲ ମିଡିଆରେ ମନ ପସନ୍ଦର ସାମଗ୍ରୀକୁ ଉପସ୍ଥାପନା କରି ସେ ବେଶ୍ ରୋଜଗାରକ୍ଷମ ହୋଇପାରିଛନ୍ତି। ଏହା ଦ୍ୱାରା ସେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ବେଳେ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି। ଦୁର୍ଦ୍ଦିନ ସମୟରେ ରୋଜଗାରର ମାଧ୍ୟମ ଖୋଲି ପରିବାର ମୁଁହରେ ହସ ଫୁଟାଇ ପାରିଥିବା ଏହି ସଫଳ ମହିଳା ହେଲେ ମୟୂରଭଞ୍ଜ ଜିଲା ବାରିପଦାର ମୁର୍ଗାବାଡ଼ିସ୍ଥିତ ସୁନୀତା ମରିଆଲ(ଡଲୋନ)।
ପଶ୍ଚିମବଙ୍ଗ ରାଜ୍ୟ ଝାଡ଼ଗ୍ରାମ ଅଞ୍ଚଳରେ ରହୁଥିବା ଡଲୋନା ଓଡ଼ିଶାରେ ବିବାହ କରିଥିଲେ। ହସଖୁସିରେ ରହୁଥିବା ତାଙ୍କ ପରିବାର ପାଇଁ ମହାମାରୀ ଦେଇଥିଲା ତାଡ଼ନା। ଏହି ସମୟରେ ସ୍ବାମୀ ଦିଲ୍ଲୀପଙ୍କ ରୋଜଗାରରେ ପଡ଼ିଲା ଭଟ୍ଟା। ପିଲାଟି ଦିନରୁ ଡଲୋନଙ୍କ ବିଭିନ୍ନ ଡିଜାଇନର ପୋଷାକ ପ୍ରତି ରୁଚି ଥିଲା। ସୁନ୍ଦର ଡିଜାଇନରର ପୋଷାକ, ଶାଢ଼ିି ଏବଂ ଇମିଟେଶନ ଗହଣା ପରିଧାନ କରୁଥିବା ବେଳେ ସାହିପଡ଼ିଶାଙ୍କ ଆକର୍ଷଣ ସାଜୁଥିଲେ। କ୍ରମେ ସାଙ୍ଗସାଥି ଓ ଆତ୍ମୀୟ ସ୍ବଜନଙ୍କ ପାଇଁ କୋଲକାତାରୁ ପସନ୍ଦଯୋଗ୍ୟ ଗାର୍ମେଣ୍ଟ ସଂଗ୍ରହ କରି ଯୋଗାଉଥିଲେ। ତେବେ ସ୍ବାମୀଙ୍କ ସହଯୋଗରେ ସେ ବିଭିନ୍ନ ଡିଜାଇନ୍ର ପୋଷାକ ସହିତ ଇମିଟେଶନ ଗହଣା ବିକ୍ରିି କରିବାକୁ ମନବଳାଇଥିଲେ। ପ୍ରଥମେ ଫେସବୁକ୍ ଫ୍ରେଣ୍ଡଙ୍କ ସହିତ ଲାଇଭ୍ ଭିଡିଓ ମାଧ୍ୟମରେ ବିଭିନ୍ନ ସାମଗ୍ରୀ ଉପସ୍ଥାପନ କଲେ। ଏହାର ଚାହିଦା ବୃଦ୍ଧି ପାଇବାରୁ ସାଙ୍ଗସାଥିମାନେ ବିଭିନ୍ନ ସାମଗ୍ରୀ କିଣିବାକୁ ଅର୍ଡର କରିବା ଆରମ୍ଭ କଲେ। ଯୁବତୀ ଓ ମହିଳାଙ୍କ ଅର୍ଡର ମୁତାବକ ସାମଗ୍ରୀକୁ ପାର୍ଶଲ ଯୋଗେ ଘରକୁ ପଠାଇଲେ ଡଲୋନ। ଧିରେ ଧିରେ ସୋସିଆଲ ମିଡିଆରେ ତାଙ୍କର ଚର୍ଚ୍ଚା ଜୋର ଧରିବାରୁ ଫେସ୍ବୁକ, ହ୍ବାଟସଆପ୍, ଇନ୍ଷ୍ଟାଗ୍ରାମ ମାଧ୍ୟମରେ ହଜାର ହଜାର ମହିଳା ଏବେ ତାଙ୍କ ସହିତ ଯୋଡ଼ି ହୋଇଛନ୍ତି। ସପ୍ତାହକୁ ଦୁଇଥର ଅନ୍ଲାଇନ ମାଧ୍ୟମରେ ଶାଢ଼ି, ଇମିଟେଶନ, ଲେହେଙ୍ଗା, କୁର୍ତ୍ତି, ଦୁପଟ୍ଟା, ବେଡ୍ସିଟ, ସ୍କ୍ରିନ ସହିତ ବିଭିନ୍ନ ଉପକରଣ ପ୍ରଦର୍ଶନ କରିଥାନ୍ତି ଡଲୋନ। ବାହାଘର, ବ୍ରତଘର, ପୂଜାପାର୍ବଣ, ମହୋତ୍ସବ ଆଦିରେ ଅର୍ଡର ନେଇ ଓଡ଼ିଶା ସମେତ ପଡ଼ୋଶୀ ରାଜ୍ୟ ଝାଡ଼ଖଣ୍ଡ, ଛତିଶଗଡ଼, ପଶ୍ଚିମବଙ୍ଗ, ମେଦିନପୁର, ଖଡ଼ଗପୁର ଆଦି ଅଞ୍ଚଳକୁ ପାର୍ସଲ ଯୋଗେ ପଠାଇ ଅନ୍ଲାଇନ ମାଧ୍ୟମରେ ଅର୍ଥ ସଂଗ୍ରହ କରିପାରୁଛନ୍ତିି। ବାରିପଦା ସହରରୁ ମିଳୁଥିବା ଅର୍ଡରକୁ ନିଶୁଳ୍କ ଭାବେ ଘରେ ପହଞ୍ଚାଇ ଦେଉଛନ୍ତି। ଏହା ଦ୍ୱାରା ତାଙ୍କୁ ଆତ୍ମସନ୍ତୋଷ ମିଳିବା ସହିତ ଦୁଇ ମହିଳା କର୍ମଚାରୀଙ୍କୁ ମଧ୍ୟ ସେ ରୋଜଗାର ଯୋଗାଇ ଦେଇପାରିଛନ୍ତି। ଘରେ ବସି ସମୟକୁ ଅପଚୟ ନ କରି ୟୁଟ୍ୟୁବ୍ ଓ ଇଣ୍ଟରନେଟ୍ ମାଧ୍ୟମରେ ମହିଳାମାନେ ସ୍ବାବଲମ୍ବୀ ହୋଇପାରିବେ ବୋଲି ଡଲୋନ କହିିଛନ୍ତି।
