ନୂଆଦିଲ୍ଲୀ,୨୬।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୩୭ ତମ ପ୍ରଗତି(ପ୍ରୋଟେକ୍ଟିଭ୍ ଗଭର୍ନାସ୍ ଆଣ୍ଡ୍ ଟାଇମ୍ଲି ଇମ୍ପ୍ଲିମେଣ୍ଟେଶନ) ବୈଠକରେ ଯୋଗଦେଇ ସରକାରୀ ବାବୁଙ୍କ ଉପରେ ବର୍ଷିଛନ୍ତି। ପ୍ରଧାନମନ୍ତ୍ରୀଙ୍କ ରାଗ ଦେଖି ସରକାରୀ ବାବୁ ଛାନିଆ ହୋଇଯାଇଛନ୍ତି। ସେମାନଙ୍କ ମନରେ ଏବେ ଛନକା ପଶିଛି। ବୈଠକରେ ପ୍ରଧାନମନ୍ତ୍ରୀ ୮ଟି ପରିଯୋଜନାର ସମୀକ୍ଷା କରିଛନ୍ତି। ଠିକ୍ ସମୟରେ କାର୍ଯ୍ୟ ସମ୍ପାଦିତ ହେଉ ନ ଥିବା ଜାଣିବା ପରେ ପ୍ରଧାନମନ୍ତ୍ରୀ ରାଗିଯାଇଥିଲେ। ଖାମଖିଆଲି ଅଧିକାରୀଙ୍କ ତାଲିକା ପ୍ରସ୍ତୁତ କରିବାକୁ ସେ କ୍ୟାବିନେଟ୍ ସଚିବ ରାଜୀବ ଗୌବାଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ପରେ ପରିଯୋଜନାର କାମରେ ଆଶାଜନକ ବୃଦ୍ଧି ଦେଖିବାକୁ ମିଳିଛି। ପ୍ରତି ପରିଯୋଜନା ପାଇଁ ଅଲଗା ଅଲଗା ଡୋଜିୟର ପ୍ରସ୍ତୁତ କରିବାକୁ ସେ ଗୌବାଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ଅବସରରେ ପ୍ରତି ରାଜ୍ୟର ସଚିବଙ୍କୁ ଅକ୍ସିଜେନ୍ ପ୍ଲାଣ୍ଟ୍ ସ୍ଥାପନ କାର୍ଯ୍ୟ ଶୀଘ୍ର ଶେଷ କରିବାକୁ କହିଛନ୍ତି। ଯାହାଦ୍ୱାରା ପ୍ରତି ବେଡ୍ରେ ପର୍ଯ୍ୟାପ୍ତ ମାତ୍ରାରେ ଅକ୍ସିଜେନ୍ ଉପଲବ୍ଧ କରାଯାଇ ପାରିବ। ପରିଯୋଜନାରେ ବିଳମ୍ବ ହେତୁ ରେଳ ପ୍ରକଳ୍ପର ମୂଲ୍ୟ ତିନି ଗୁଣ ବୃଦ୍ଧି ପାଇଥିବା ଶୁଣି ପ୍ରଧାନମନ୍ତ୍ରୀ କ୍ରୋଧିତ ହୋଇଥିଲେ। ସେହିଭଳି ପଶ୍ଚିମାଞ୍ଚଳ ଉତ୍ସର୍ଗୀକୃତ ମାଲ ପରିବହନ କରିଡର(ଡବ୍ଲୁଡିଏଫ୍ସି) ଫ୍ଲାଗସିପ ପ୍ରୋଜେକ୍ଟ ମଧ୍ୟ ଅଟକି ଯାଇଛି। ପ୍ରକଳ୍ପଗୁଡ଼ିକର ବିଳମ୍ବ ପାଇଁ ଦାୟିତ୍ୱ ନିର୍ବାହ କରିବାକୁ ପ୍ରଧାନମନ୍ତ୍ରୀ ପୂର୍ବରୁ ସରକାରୀ ବିଭାଗକୁ ନିର୍ଦ୍ଦେଶ ଦେଇଥିଲେ। ଅନୁଷ୍ଠିତ ପ୍ରଗତି ବୈଠକରେ ପ୍ରଧାନମନ୍ତ୍ରୀ କହିଛନ୍ତି ଯେ, ପ୍ରକଳ୍ପର ବିଳମ୍ବ ପାଇଁ କେନ୍ଦ୍ର ଓ ରାଜ୍ୟ ସରକାରୀ ବିଭାଗ ଦାୟୀ ରହିବେ। ରିପୋର୍ଟରେ ଉଲ୍ଲେଖ କରାଯାଇଛି ଯେ ଭିତ୍ତିଭୂମି କ୍ଷେତ୍ରରେ ୪୮୩ଟି ପ୍ରକଳ୍ପରେ ପ୍ରତିଟି ପିଛା ୧୫୦ କୋଟିରୁ ଅଧିକ ନିବେଶ କରାଯାଇଛି। ଏହାର ମୋଟ ନିବେଶ ପରିମାଣ ଆନୁମାନିକ ମୂଲ୍ୟ ତୁଳନାରେ ୪.୪୩ ଲକ୍ଷ କୋଟିରୁ ଅଧିକ ବୃଦ୍ଧି ଘଟିଛି। ପ୍ରକଳ୍ପ ସମାପ୍ତିରେ ବିଳମ୍ବ ଏବଂ ଅନ୍ୟାନ୍ୟ କାରଣ ହେତୁ ଖର୍ଚ୍ଚ ଅଧିକ ହୋଇଛି। ପରିସଂଖ୍ୟାନ ଏବଂ କାର୍ଯ୍ୟକ୍ରମ କ୍ରିୟାନ୍ବୟନ ମନ୍ତ୍ରଣାଳୟ ପକ୍ଷରୁ ୧୫୦ କୋଟି କିମ୍ବା ତା’ଠାରୁ ଅଧିକ ମୂଲ୍ୟର ଭିତ୍ତିଭୂମି କ୍ଷେତ୍ର ପ୍ରକଳ୍ପଗୁଡ଼ିକର ତଦାରଖ କରିଥାନ୍ତି। ମନ୍ତ୍ରଣାଳୟର ଜୁଲାଇ ୨୦୨୧ ରିପୋର୍ଟରେ କୁହାଯାଇଛି ଯେ ୧,୭୮୧ ଟି ପ୍ରକଳ୍ପ ମଧ୍ୟରୁ ୪୮୩ରେ ଖଚ୍ଚ ବଢ଼ିଛି। ସେହିପରି ୫୦୪ଟି ପ୍ରକଳ୍ପ ବିଳମ୍ବରେ ଚାଲିଛି।
ସୂଚନାଯୋଗ୍ୟ, ଅଧିକାରୀମାନଙ୍କୁ ଉତ୍ତରଦାୟୀ କରିବା ଏବଂ ଦୁର୍ନୀତି ଯାଞ୍ଚ କରିବା ପାଇଁ ପ୍ରଧାନମନ୍ତ୍ରୀ ମାର୍ଚ୍ଚ ୨୦୧୫ରେ ପ୍ରଗତି ପୋର୍ଟାଲ ଆରମ୍ଭ କରିଥିଲେ। ଏହା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ), କେନ୍ଦ୍ର ସରକାରଙ୍କ ସଚିବ ଏବଂ ରାଜ୍ୟ ସରକାରଙ୍କ ମୁଖ୍ୟ ସଚିବମାନଙ୍କ ମଧ୍ୟରେ ସମନ୍ବୟ ରକ୍ଷା ପାଇଁ ବ୍ୟବହୃତହୋଇଥାଏ। ପ୍ରଧାନମନ୍ତ୍ରୀ ପ୍ରତ୍ୟେକ ମାସର ଚତୁର୍ଥ ବୁଧବାର ବୈଠକ କରି ମନୋନୀତ ପ୍ରକଳ୍ପର ସମୀକ୍ଷା କରିଥାନ୍ତି।
