ଗାଲେ,୨୪।୧(ଏପି): ସ୍ଥାନୀୟ ଗାଲେ ଅନ୍ତର୍ଜାତୀୟ ଷ୍ଟାଡିୟମରେ ଚାଲିଥିବା ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଘରୋଇ ଶ୍ରୀଲଙ୍କା ଟସ୍ ଜିତି ପ୍ରଥମ ଇନିଂସରେ ୧୩୯.୩ ଓଭରରେ ୩୮୧ ରନକରି ଅଲଆଉଟ ହୋଇଛି। ଜବାବରେ ପ୍ରଥମ ଇନିଂସ ଆରମ୍ଭ କରି ଇଂଲଣ୍ଡ ଦୁଇ ଓପନରଙ୍କୁ ହରାଇ ପ୍ରାରମ୍ଭିକ ଝଟକା ଖାଇଥିଲା। ତେବେ ଅଧିନାୟକ ଜୋ ରୁଟ୍ ଓ ଜନୀ ବେୟାରଷ୍ଟୋଙ୍କ ଲଢୁଆ ବ୍ୟାଟିଂ ବଳରେ ସ୍ଥିତି ସମ୍ଭାଳିଛନ୍ତି। ଶନିବାର ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ଇଂଲଣ୍ଡ ପ୍ରଥମ ଇନିଂସରେ ୩୦ ଓଭରରେ ୨ ଉଇକେଟ ହରାଇ ୯୮ ରନ ସଂଗ୍ରହ କରିଛି। ଫଳରେ ଇଂଲଣ୍ଡ ୮ ଉଇକେଟ ହାତରେ ଥାଇ ୨୮୩ ରନ ପଛରେ ପଡିଛି। ଷ୍ଟମ୍ପ ଅପସାରଣ ବେଳକୁ ରୁଟ୍ ୬୭ (୭୭ ବଲ, ୧୦ ଚୌକା) ଓ ବେୟାରଷ୍ଟୋ ୨୪ ରନକରି ଅପରାଜିତ ରହିଛନ୍ତି। ଦୁଇ ଓପନର ଜ୍ୟାକ କ୍ରଲି ୫ ଓ ଡୋମ୍ ସିବ୍ଲି ଖାତା ଖୋଲିବା ପୂର୍ବରୁ ସ୍ଲୋ ବାମହାତୀ ଅର୍ଥୋଡକ୍ସ ବୋଲର ଲାସିଥ ଏମ୍ବୁଲଡେନିୟାଙ୍କ ଦ୍ୱାରା ଆଉଟ ହୋଇଛନ୍ତି। କ୍ରଲି ଲାହିରୁ ଥିରିମାନେଙ୍କୁ କ୍ୟାଚ୍ ଦେଇଥିବା ବେଳେ ସିବ୍ଲି ଏଲ୍ବିଡବ୍ଲ୍ୟୁ ହୋଇ ପ୍ୟାଭିଲିୟନ ଫେରିଥିଲେ।
ଅସମାପ୍ତ ପ୍ରଥମ ଇନିଂସ ସ୍କୋର ୨୨୯/୪ ରୁ ଖେଳ ଆରମ୍ଭ କରି ଶ୍ରୀଲଙ୍କା ଶନିବାର ଅଲଆଉଟ ହୋଇଥିଲା। ଓଭରନାଇଟ ବ୍ୟାଟ୍ସମ୍ୟାନ ଆଞ୍ଜେଲୋ ମାଥ୍ୟୁସ ୧୦୭ ରନରୁ ଖେଳ ଆରମ୍ଭ କରି ଆଉ ମାତ୍ର ୩ ରନ ଅଧିକ ସଂଗ୍ରହ କରି ୧୧୦ ରନ କରି ଆଉଟ ହୋଇଥିଲେ। ତେବେ ଉଇକେଟକିପର ବ୍ୟାଟ୍ସମ୍ୟାନ ନିରୋଶାନ ଡିକ୍ଓ୍ବେଲା ୧୯ ରନରୁ ଖେଳ ଆରମ୍ଭ କରି ୯୨ ରନର ଲଢୁଆ ଇନିଂସ ଖେଳି ଆଉଟ ହୋଇଥିଲେ। ଦିଲରୁଓ୍ବାନ ପେରେରା ୬୭ ରନର ଅର୍ଦ୍ଧଶତକୀୟ ପାଳି ଖେଳି ଆଉଟ ହୋଇଥିବା ବେଳେ ଅନ୍ୟମାନେ ବିଫଳ ହୋଇଥିଲେ। ରମେଶ ମେଣ୍ଡିସ୍ ଓ ସୁରଙ୍ଗା ଲାକମଲ ଖାତା ଖୋଲିପାରି ନ ଥିଲେ। ଅସିଥା ଫର୍ଣ୍ଣାଣ୍ଡୋ ବିନା ସ୍କୋରରେ ଅପରାଜିତ ରହିଥିଲେ। ସେହିପରି ଏମ୍ବୁଲଡେନିୟା ୭ ରନ କରି ଆଉଟ ହୋଇଥିଲେ। ପୂର୍ବରୁ ଅଧିନାୟକ ଦୀନେଶ ଚାଣ୍ଡିମଲ ୫୨ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ସେହିପରି ଓପନର ଲାହିରୁ ଥିରିମାନେ ଆଉଟ ହେବା ପୂର୍ବରୁ ୪୩ ରନ ସଂଗ୍ରହ କରିଥିଲେ। ବୋଲିଂରେ ଇଂଲଣ୍ଡ ତରଫରୁ ଜେମ୍ସ ଆଣ୍ଡରସନ ସର୍ବାଧିକ ୬, ମାର୍କ ଉଡ୍ ୩, ସାମ କୁରାନ ୧ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଶ୍ରୀଲଙ୍କା ପ୍ରଥମ ଇନିଂସ- ୧୩୯.୩ ଓଭରରେ ୩୮୧ରେ ଅଲଆଉଟ
(ମାଥ୍ୟୁସ୍- ୧୧୦, ଡିକ୍ଓ୍ବେଲା- ୯୨, ଚାଣ୍ଡିମଲ- ୫୨, ପେରେରା- ୬୭, ଆଣ୍ଡରସନ- ୬/୪୦, ଉଡ- ୩/୮୪, ସାମ କୁରାନ- ୧/୬୦)।
ଇଂଲଣ୍ଡ ପ୍ରଥମ ଇନିଂସ- ୩୦ ଓଭରରେ ୯୮/୨
(ରୁଟ୍- ୬୭*, ବେୟାରଷ୍ଟୋ- ୨୪, ଏମ୍ବୁଲଡେନିୟା- ୨/୩୩)।
