କାବୁଲ, ୮।୮(ଆଇଏଏନ୍ଏସ୍): ସପ୍ତାହେ ବ୍ୟାପୀ ସଂଘର୍ଷ ପରେ ତାଲିବାନ ଆତଙ୍କବାଦୀମାନେ ଶନିବାର ଆଫଗାନିସ୍ତାନର ଉତ୍ତର ଭାଗରେ ଅବସ୍ଥିତ ଜଜାନ୍ ପ୍ରଦେଶର ରାଜଧାନୀ ଶେବେରଗାନ୍କୁ ନିଜ ଦଖଲକୁ ନେଇଛନ୍ତି। ସୂତ୍ର ଅନୁଯାୟୀ ସୁରକ୍ଷା ବଳ କେବଳ ଖ୍ବାଜା ଡାକୋ ଜିଲାର ପ୍ରାଦେଶିକ ବିମାନବନ୍ଦରରେ ସୀମିତ ରହିଛି। ଦୁଇ ଦିନ ମଧ୍ୟରେ ତାଲିବାନ ଦଖଲକୁ ଯିବାରେ ଶେବେରଗାନ୍ ଦ୍ୱିତୀୟ ପ୍ରାଦେଶିକ ରାଜଧାନୀ। ଶୁକ୍ରବାର ସେମାନେ ନିମ୍ରୁଜ୍ ପ୍ରଦେଶର ରାଜଧାନୀ ଜରଞ୍ଜ ସହରକୁ ଦଖଲ କରିଥିଲେ। ଆଫଗାନିସ୍ତାନରୁ ଆମେରିକା ଓ ନାଟୋ ସୈନ୍ୟ ପ୍ରତ୍ୟାହାର ଜାରି ରହିଥିବାବେଳେ ଆତଙ୍କବାଦୀମାନେ ଅନେକ ସୀମାନ୍ତ ଅଞ୍ଚଳକୁ କବ୍ଜା କରିସାରିଲେଣି। ଜଜାନ ପ୍ରଦେଶର ସୁରକ୍ଷା ସ୍ଥିତି ଉପରେ ସରକାର ଉପଯୁକ୍ତ ଧ୍ୟାନ ନ ଦେବାରୁ ଏହାର ରାଜଧାନୀ ଆତଙ୍କବାଦୀଙ୍କ କବଳକୁ ଗଲା ବୋଲି ସେଠାର ଏମ୍ପିମାନେ ଅଭିଯୋଗ କରିଛନ୍ତି।
ଗୁରୁବାରଠାରୁ ଶେବେରଗାନ୍ରେ ଆଫଗାନ ସୈନ୍ୟ ଏବଂ ତାଲିବାନ ଆତଙ୍କବାଦୀଙ୍କ ମଧ୍ୟରେ ଘମାଘୋଟ ଲଢ଼େଇ ଲାଗି ରହିଥିଲା। ଶୁକ୍ରବାର ତାଲିବାନ ପ୍ରାଦେଶିକ ରାଜ୍ୟପାଳଙ୍କ ବାସଭବନକୁ ଅକ୍ତିଆର କରିଥିଲେ ମଧ୍ୟ ସେନା ଏହାକୁ ସେମାନଙ୍କଠାରୁ ଫେରାଇ ଆଣିବାରେ ସକ୍ଷମ ହୋଇଥିଲା। ଏହା ପରେ ପୁଣିଥରେ ଆତଙ୍କବାଦୀମାନେ ଉକ୍ତ କମ୍ପାଉଣ୍ଡ ସମେତ ମ୍ୟୁନିସିପାଲିଟି ବିଲ୍ଡିଂକୁ ଦଖଲକୁ ନେଇଥିଲେ। ଶେବେରଗାନ୍ ତାଲିବାନ ଅକ୍ତିଆରକୁ ଯିବା ପରେ ଉକ୍ତ ରାଜ୍ୟରେ ୧୫ ଗଣମାଧ୍ୟମ ସଂସ୍ଥା, ଟିଭି ଷ୍ଟେଶନ ଏବଂ ରେଡିଓ ନେଟଓ୍ବର୍କ ବନ୍ଦ ହୋଇଯାଇଛି। ଅନ୍ୟପକ୍ଷରେ ଆଫଗାନ ସେନା ପକ୍ଷରୁ କାର୍ଯ୍ୟାନୁଷ୍ଠାନ ଜାରି ରହିଛି, ଖୁବ୍ଶୀଘ୍ର ରାଜଧାନୀ ସ୍ଥିତି ସ୍ବାଭାବିକ ହେବ ବୋଲି ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ଶନିବାର ରାଷ୍ଟ୍ରପତି ଅଶ୍ରଫ୍ ଘନି ପୂର୍ବତନ ଉପରାଷ୍ଟ୍ରପତି ମାର୍ଶାଲ ଅବଦୁଲ ରଶିଦ୍ ଦୋସ୍ତୁମ୍ଙ୍କୁ ଭେଟି ଦେଶର ସୁରକ୍ଷା ସ୍ଥିତି ସମ୍ପର୍କରେ ଆଲୋଚନା କରିଥିଲେ। ଆଫଗାନ ସୈନ୍ୟବାହିନୀକୁ ସମସ୍ତ ସହଯୋଗ ଯୋଗାଇଦେବା ଲାଗି ଦୋସ୍ତୁମ୍ ପ୍ରତିଶ୍ରୁତି ଦେଇଥିଲେ। କମାଣ୍ଡର ଅଲି ସର୍ଓ୍ବରଙ୍କ ନେତୃତ୍ୱରେ ଜୁନବିଶ୍ଙ୍କ ଅନୁଗତ ୧୫୦ ଜଣ ସଦସ୍ୟ ଶନିବାର ସକାଳେ ଶେବେରଗାନରେ ପହଞ୍ଚତ୍ଥିଲେ ବୋଲି ପୂର୍ବତନ ଉପରାଷ୍ଟ୍ରପତି ଦୋସ୍ତୁମ୍ଙ୍କ ସହଯୋଗୀ ସୟେଦ ଶାମସୁଦ୍ଦିନ୍ ସଦାତ୍ କହିଛନ୍ତି। ଜଜାନ୍ରେ ତାଲିବାନ ବିରୋଧୀ ଲଢ଼େଇରେ ପବ୍ଲିକ ଅପ୍ରାଇଜିଂ ଫୋର୍ସର ନେତୃତ୍ୱ ନେଇଥିଲେ ହୋସ୍ତୁମ୍ଙ୍କ ପୁଅ ୟାର୍ ମହମ୍ମଦ ଦୋସ୍ତୁମ। ଏଥିସହିତ ସ୍ବତନ୍ତ୍ର ବାହିନୀର କେତେଜଣ ସଦସ୍ୟ ମଧ୍ୟ ସଂଘର୍ଷରେ ସାମିଲ ହୋଇଥିଲେ।
