ମୁମ୍ବାଇ,୨୮ା୨: ସ୍ମୃତି ମନ୍ଧାନାଙ୍କ ସହିତ ନିଜର ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ ମଧ୍ୟ ପରବର୍ତ୍ତୀ ସମୟରେ ଭାରତୀୟ ଦଳରୁ ବାଦ ପଡିଥିଲେ। ବିବାହ କରି ଗୋଟିଏ ସନ୍ତାନର ମା’ ହୋଇ ସାରିଥିବା ବେଳେ ସ୍ନେହା ଦୀପ୍ତିଙ୍କୁ ମିଳିଛି କ୍ୟାରିୟରରେ ଦ୍ୱିତୀୟ ସୁଯୋଗ। ଓମେନ୍ସ ପ୍ରିମିୟର ଲିଗ୍ରେ ଦୀପ୍ତିଙ୍କୁ ୩୦ ଲକ୍ଷ ଟଙ୍କାରେ କିଣିଛି ଦିଲ୍ଲୀ କ୍ୟାପିଟାଲ୍ସ। କ୍ୟାରିୟର ସଜାଡିବାକୁ ମଉକା ମିଳିଥିବା ବେଳେ ଭାରତୀୟ ଦଳରେ ସ୍ଥାନ ପାଇବା ପାଇଁ ଦୀପ୍ତିଙ୍କ ପାଖରେ ରହିଛି ସୁବର୍ଣ୍ଣ ସୁଯୋଗ। ଆନ୍ଧ୍ରପ୍ରଦେଶର ଦୀପ୍ତି ୨୦୧୩ରେ ଭାରତ ପାଇଁ ପଦାର୍ପଣ କରିଥିଲେ। ଭାରତୀୟ ଦଳରେ ନିଜ ସ୍ଥାନ ପକ୍କା କରିବା ପୂର୍ବରୁ ମାତ୍ର ଦୁଇଟି ଟି୨୦ ଓ ଗୋଟିଏ ଦିନିକିଆରେ ତାଙ୍କୁ ସୁଯୋଗ ମିଳିଥିଲା। ଟିମ୍ ଇଣ୍ଡିଆରୁ ବାଦ ପଡିବା ପରେ ସେ ନିୟମିତ ଭାବେ ଆନ୍ଧ୍ର ପକ୍ଷରୁ ଖେଳୁଥିଲେ। ଓମେନ୍ସ ପ୍ରିମିୟର ଲିଗ୍ରେ ୨୬ ବର୍ଷୀୟା ଦୀପ୍ତିଙ୍କ ପାଇଁ ଆଣି ଦେଇଛି ବଡ ସୁଯୋଗ। ନଭେମ୍ବର ୨୦୨୧ରେ ଶେଷ ଥର ପାଇଁ କ୍ରିକେଟ ଖେଳିଥିବା ବେଳେ ମାତୃତ୍ୱ କାରଣରୁ କ୍ରିକେଟରୁ ଦୂରେଇ ରହିଛନ୍ତି। ତେବେ ମହିଳା ଆଇପିଏଲରେ ଏକ ପ୍ରୟାସ କରିବାକୁ ଦୀପ୍ତି ଇଚ୍ଛା ଜାହିର କରିଥିଲେ।
ଦୁଇ ବର୍ଷର ଝିଅ କ୍ରିଭାକୁ ଛାଡି ଆସିବା ମୋ ପାଇଁ ଅତ୍ୟନ୍ତ କଷ୍ଟସାଧ୍ୟ ରହିଥିଲା। ଟିମ୍ ହୋଟେଲକୁ ଆସିବା ପୂର୍ବରୁ ଝିଅ କାନ୍ଦୁଥିଲା ଏବଂ ଆସିବା ପାଇଁ ମୋର ଇଚ୍ଛା ମଧ୍ୟ ନଥିଲା। ଉଭୟ କ୍ରିକେଟ ଏବଂ ପରିବାର ମୋ ପାଇଁ ସମାନ ଭାବରେ ଗୁରୁତ୍ୱପୂର୍ଣ୍ଣ। ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଜାରି କରାଯାଇଥିବା ଏକ ଭିଡିଓରେ ଏଭଳି କହିଛନ୍ତି ଦୀପ୍ତି। ତେବେ ଝିଅର ଯତ୍ନ ନେବା ପାଇଁ ସ୍ବାମୀଙ୍କ ଆଶ୍ୱାସନା ମତେ ପ୍ରେରଣା ଦେଇଥିଲା। ଯଦି ମୁଁ ଓମେନ୍ସ ପ୍ରିମିୟର ଲିଗ୍ରେ ଭଲ ପ୍ରଦର୍ଶନ କରୁଛି ତାହେଲେ ଲକ୍ଷ ଲକ୍ଷ ମହିଳାଙ୍କ ପାଇଁ ପ୍ରେରଣା ହୋଇ ପାରିବି ବୋଲି ସେ କହିଛନ୍ତି। ପୂର୍ବତନ ସାଥୀ ଖେଳାଳି ସ୍ମୃତି ମନ୍ଧାନାଙ୍କ ପରି କୋଟି କୋଟି ଟଙ୍କାରେ ପ୍ୟାକେଜ ମିଳିନଥିଲେ ମଧ୍ୟ କ୍ରିକେଟ ପଡିଆକୁ ଫେରିବା ନେଇ ମୁଁ ଖୁସି ବୋଲି କହିଛନ୍ତି ସ୍ନେହା ଦୀପ୍ତି।
