ବରଗଡ଼,୧୨।୯(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ସ୍କ୍ରବ୍ ଟାଇଫସ୍ ରୋଗ ଏବେ ଚର୍ଚ୍ଚାର ବିଷୟ ହୋଇଛି। ଜିଲାରେ ଏହି ରୋଗରେ ଆକ୍ରାନ୍ତ ଏବଂ ମୃତକଙ୍କ ସଂଖ୍ୟା ବଢ଼ି ଚାଲିଥିବା ସାଧାରଣରେ ଆଲୋଚନା ହେଉଛି। କେବଳ ସେତିକି ନୁହେଁ, ବୁଧବାର ଖୋଦ୍ ଜିଲା ମୁଖ୍ୟ ଚିକିତ୍ସାଧିକାରୀ (ସିଡିଏମ୍ଓ) ଡା. ନିରୁପମା ଷଡ଼ଙ୍ଗୀ ଗଣମାଧ୍ୟମ ସମ୍ମୁଖରେ ଜିଲାରେ ସ୍କ୍ରବ୍ ଟାଇଫସ୍ ରୋଗ ସମ୍ପର୍କରେ ସୂଚନା ଦେଇ କହିଥିଲେ, ସେପ୍ଟେମ୍ବର ୧୦ତାରିଖ ସୁଦ୍ଧା ୨୦ଜଣଙ୍କ ରକ୍ତ ନମୁନା ପରୀକ୍ଷା ହୋଇଥିଲା। ସେଥିରୁ ୩ଜଣ ସ୍କ୍ରବ୍ ଟାଇଫସ୍ ପଜିଟିଭ୍ ଚିହ୍ନଟ ହୋଇଥିଲେ ଏବଂ ସମସ୍ତେ ଘରେ ଚିକିତ୍ସିତ ହେଉଛନ୍ତି। ଅନ୍ୟପକ୍ଷେ ସେ ଆହୁରି କହିଥିଲେ, ଘରୋଇ ଡାକ୍ତରଖାନାରେ ୩ଜଣଙ୍କ ସ୍କ୍ରବ୍ ଟାଇଫସ୍ ଜନିତ ମୃତ୍ୟୁ ସମ୍ପର୍କରେ ସୂଚନା ପାଇ ଏଡିପିଏଚ୍ଓ ଏବଂ ଅନ୍ୟ ଜଣେ ତାର ଅନୁସନ୍ଧାନ ପାଇଁ ଯାଇଥିଲେ ଏବଂ ତାହା ସତ ବୋଲି ସିଡିଏମ୍ଓ ଡା. ଷଡ଼ଙ୍ଗୀ ଗଣମାଧ୍ୟମ ଆଗରେ କହିଥିଲେ। ସେ ସମ୍ପର୍କିତ ଖବର ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା।
କିନ୍ତୁ ମତ ରଖିବାର ଦିନକ ପରେ ସିଡିଏମ୍ଓ ଡା. ଷଡ଼ଙ୍ଗୀ ଗୁରୁବାର ଜିଲାର ସ୍କ୍ରବ୍ ଟାଇଫସ୍ ରୋଗର ସ୍ଥିତି ଉପରେ ନିଜ ମତ ବଦଳାଇଛନ୍ତି। ପୂର୍ବରୁ ସ୍କ୍ରବ୍ ଟାଇଫସ୍ରେ ୩ଜଣଙ୍କ ମୃତ୍ୟୁ ଘଟଣା ସତ ବୋଲି କହିଥିବା ବେଳେ ଏବେ ତାର ସତ୍ୟାସତ୍ୟ ନେଇ ଅନୁସନ୍ଧାନ ଚାଲୁଛି ବୋଲି ଏକ ପ୍ରେସ ବିବୃତିରେ ସିଡିଏମ୍ଓ ଡା. ଷଡ଼ଙ୍ଗୀ କହିଛନ୍ତି। ସେ କହିଛନ୍ତି, ଅଦ୍ୟାବଧି ବରଗଡ଼ ଜିଲାରେ ଜାନୁୟାରୀ ୨୪ରୁ ସେପ୍ଟେମ୍ବର ୧୦ତାରିଖ ପର୍ଯ୍ୟନ୍ତ ଆଲିସା ଆଇଜିଏମ (ଇଏଲଆଇଏସ୍ଏ ଆଇଜିଏମ୍) ପରୀକ୍ଷା ପଦ୍ଧତି ଦ୍ୱାରା ଜିଲାରେ ୧୦ଜଣ ସ୍କ୍ରବ୍ ଟାଇଫସ୍ ପଜିଟିଭ ଚିହ୍ନଟ ହୋଇଛନ୍ତି ଏବଂ ସମସ୍ତେ ସୁସ୍ଥ ଅଛନ୍ତି। ଇତିମଧ୍ୟରେ ଜିଲାରେ ୩ଜଣଙ୍କ ସ୍କ୍ରବ୍ ଟାଇଫସ୍ ଜନିତ ମୃତ୍ୟୁ ନେଇ ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଛି।
ସେମାନେ ହେଲେ ପଦ୍ମପୁରର ସାକ୍ଷୀ ପ୍ରଧାନ(୭୦), ଜମଲା କୁଧେରଖେର ଗ୍ରାମର ଶିଖା ରଣା(୧୬) ଏବଂ ଭୁକ୍ତା ବୁଙ୍ଗାପାଲିର ସରୋଜ ପ୍ରଧାନ(୪୨)। ବେସରକାରୀ ନର୍ସିଂହୋମ୍ରେ ସେମାନଙ୍କ ମୃତ୍ୟୁ ହୋଇଛି ଏବଂ ଜିଲା ଜନସ୍ବାସ୍ଥ୍ୟ ବିଭାଗ ତରଫରୁ ଏହାର ସତ୍ୟାସତ୍ୟ ଅନୁସନ୍ଧାନ ଚାଲୁଛି ବୋଲି ସିଡିଏମ୍ଓ ଡା. ଷଡ଼ଙ୍ଗୀ ପ୍ରେସ ବିବୃତିରେ ଉଲ୍ଲେଖ କରିଛନ୍ତି। ଏହାସହିତ ସ୍କ୍ରବ୍ ଟାଇଫସ୍ ରୋଗ ଚିହ୍ନଟ ପାଇଁ ଜିଲାର ସବୁ ବ୍ଲକ ସ୍ବାସ୍ଥ୍ୟକେନ୍ଦ୍ର ଏବଂ ଜିଲାରେ ରହିଥିବା ଜିଲା ଜନସ୍ବାସ୍ଥ୍ୟ ପରୀକ୍ଷାଗାରରେ ମାଗଣା ରକ୍ତ ନମୁନା ପରୀକ୍ଷା କରାଯାଉଛି। ସ୍କ୍ରବ୍ ଟାଇଫସ୍ ଆରୋଗ୍ୟସାଧ୍ୟ ହୋଇଥିବା ଯୋଗୁ ଏହି ରୋଗର ଲକ୍ଷଣ ଦେଖାଦେଲେ ସଠିକ୍ ଚିକିତ୍ସା କରିବା ପାଇଁ ସେ ପରାମର୍ଶ ଦେଇଛନ୍ତି। ଏ ନେଇ ଜିଲାରେ ସଚେତନତା ସୃଷ୍ଟି କରିବା ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ସେହିପରି ସ୍କ୍ରବ୍ ଟାଇଫସ୍ ରୋଗ ସନ୍ଦେହ ହେଲେ, ଏହାର ସତ୍ୟତା ପାଇଁ ଜିଲା ଜନସ୍ବାସ୍ଥ୍ୟ ପରୀକ୍ଷାଗାରକୁ ରୋଗୀଙ୍କ ରକ୍ତ ନମୁନା ପଠାଇବା ଏବଂ ବିନା ଅନୁସନ୍ଧାନରେ କୌଣସି ମୃତାହତଙ୍କୁ ସ୍କ୍ରବ୍ ଟାଇଫସ୍ ଜନିତ ମୃତ୍ୟୁ ବୋଲି ଘୋଷଣା ନ କରିବାକୁ ବେସରକାରୀ ସ୍ବାସ୍ଥ୍ୟ ଅନୁଷ୍ଠାନଗୁଡ଼ିକୁ ନିର୍ଦ୍ଦେଶ ଦିଆଯାଇଛି ବୋଲି ସିଡିଏମ୍ଓ ଡା. ଷଡ଼ଙ୍ଗୀ ପ୍ରେସ ବିବୃତିରେ ସୂଚନା ଦେଇଛନ୍ତି।
