ବିହାରର ଜଣେ ବ୍ୟକ୍ତି ମହିନ୍ଦ୍ରା ସ୍କର୍ପିଓର ଡିଜାଇନ୍ରେ ଘର ଛାତ ଉପରେ ଏକ ପାଣିଟାଙ୍କି ତିଆରି କରିଛନ୍ତି। ଯାହାକୁ ଦେଖିଲେ ଆଖି ଲାଖିଯିବ। ଭାଗଲପୁରର ଇଣ୍ଟସାର ଆଲାମ ଏହି ପାଣି ଟାଙ୍କି ନିର୍ମାଣରେ ଆଗ୍ରାର ଶ୍ରମିକମାନଙ୍କୁ ସ୍ବତନ୍ତ୍ର ଭାବେ ନିଯୁକ୍ତି ଦେଇଥିଲେ। ଫଟୋରେ ଦେଖିବାକୁ ମିଳିଛି ସ୍କର୍ପିଓ ଡିଜାଇନର ପାଣିଟାଙ୍କି ଛାତ ଉପରେ ଶୋଭାବର୍ଦ୍ଧନ କରୁଛି। ଯେମିତି ଲାଗୁଛି ଅସଲ ସ୍କର୍ପିଓ ଗାଡ଼ି ଛାତ ଉପରେ ରଖାଯାଇଛି। ଏହି ପାଣି ଟାଙ୍କିରେ ଇଣ୍ଟସାରଙ୍କ ଗାଡ଼ି ନମ୍ବର ବି.ଆର. ୧୦୭୮୬ ଲେଖାଯାଇଛି। ଇଣ୍ଟସାର କୁହନ୍ତି, ଏହି ଟାଙ୍କିରୁ ଘରର ୪ ବଖରାକୁ ପାଣିର କନେକ୍ସନ ରହିଛି।
ଏହା ଦେଖି ମହିନ୍ଦ୍ରା ଗ୍ରୁପ୍ର ଚେୟାରମ୍ୟାନ ଆନନ୍ଦ ମହିନ୍ଦ୍ରା ଏହି ପାଣିଟାଙ୍କିର ଫଟୋକୁ ସୋସିଆଲ ମିଡିଆରେ ଶେୟାର କରିଛନ୍ତି। ଏଥିରେ କ୍ୟାପଶନ ଲେଖିଛନ୍ତି, ଏହାକୁ ମୁଁ ରାଇଜ୍ ଷ୍ଟୋରୀ ବୋଲି କହୁଛି। ସ୍କର୍ପିଓ ଛାତ ଉପରକୁ ଉଠିଲାଣି। ମାଲିକଙ୍କୁ ନମସ୍କାର ଏବଂ ଢେରସାରା ପ୍ରଶଂସା। ତାଙ୍କର ପ୍ରଥମ କାର୍କୁ ଏତେ ସ୍ନେହ ଦେଇ ଆଲାମ ତିଆରି କରିଥିବାରୁ ତାଙ୍କୁ ସଲାମ କରୁଛି।
ସେହିପରି ଆଲାମ କୁହନ୍ତି, ସେ ମହିନ୍ଦ୍ରାର ଏହି ସ୍କର୍ପିଓ ପାଣି ଟାଙ୍କି ତିଆରି କରିବାରେ ୨.୫ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। ଏପରିକି ଟାଙ୍କି କାମ କରୁଥିବା ରାଜମିସ୍ତ୍ରୀଙ୍କୁ ଦୈନିକ ୧୨୦୦ ଟଙ୍କା ମଜୁରୀ ସେ ଦେଉଥିଲେ। ଏହି ଫଟୋ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେଉଥିବା ବେଳେ ଲୋକେ ଭିନ୍ନ ଭିନ୍ନ ପ୍ରତିକ୍ରିୟା ଦେଉଛନ୍ତି।
