ନୂଆଦିଲ୍ଲୀ,୧୬ ।୯: ଉଜବେକିସ୍ତାନର ସମରକନ୍ଦରେ ଆରମ୍ଭ ହୋଇଛି ସାଂଘାଇ ସହଯୋଗ ସଂଗଠନ(ଏସସିଓ) ଶିଖର ସମ୍ମିଳନୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ସମ୍ମିଳନୀରେ ଯୋଗ ଦେବାକୁ ଉଜବେକିସ୍ତାନ ପହଞ୍ଚିଛନ୍ତି । ଏବେ ଏହାର ଫଟୋକୁ ନେଇ ଭାରତରେ ରାଜନୀତି ଆରମ୍ଭ ହୋଇଯାଇଛି । ସମ୍ମିଳନୀ ପୂର୍ବରୁ ସମସ୍ତ ରାଷ୍ଟ୍ରାଧ୍ୟକ୍ଷଙ୍କ ସହ ଜାରି ହାଇଥିବା ପ୍ରଧାନମନ୍ତ୍ରୀ ମୋଦିଙ୍କ ଗ୍ରୁପ ଫଟୋକୁ ନେଇ କଂଗ୍ରେସ ମୋଦିଙ୍କୁ ଟାର୍ଗେଟ କରିଛି ।
ସୂଚନାଯୋଗ୍ୟ, ଫଟୋରେ ମୋଦି ଗୋଟିଏ ପଟରେ ଠିଆ ହୋଇଥିବା ନଜର ଆସିଛି । ଅନ୍ୟ ପଟରେ ପାକିସ୍ତାନ ପ୍ରଧାନ ମନ୍ତ୍ରୀ ଶହବାଜ ଶରିଫ ଠିଆ ହୋଇଥିବା ଦେଖାଯାଇଛି । ଏହାକୁ ନେଇ କଂଗ୍ରେସ ନେତା ଗୌରବ ଗୋଗୋଇ ରାଜନୀତି ଆରମ୍ଭ କରିଦେଇଛନ୍ତି । ଏକ ଟୁଇଟରେ ଗୋଗୋଇ କହିଛନ୍ତି, ପ୍ରଧାନମନ୍ତ୍ରୀ ମୋଦି ଓ ବୈଦେଶିକ ମନ୍ତ୍ରଣାଳୟର ଖରାପ ଆରମ୍ଭ । ଗୋଟିଏ ପଟରେ ମୋଦି ଠିଆ ହୋଇଥିବା ବେଳେ ଅନ୍ୟପଟରେ ପାକିସ୍ତାନ ରହିଛି । ମୋତେ ନାଲି ଆଖି ନୁହେଁ ବରଂ ବନ୍ଦ ଆଖି ଦେଖାଯାଉଛି ।
ଏହାର କଡା ଜବାବ ଦେଇଛି ଭାରତୀୟ ଜନତା ପାର୍ଟି(ଭାଜପା) । ଭାଜପା ପ୍ରବକ୍ତା ଶହଜାଦ ପୁନାୱାଲା ଟୁଇଟ କରି ପୂର୍ବରୁ ହୋଇଥିବା ଜି-୨୦ ବୈଠକର ଏକ ଫଟୋ ଶେୟାର କରିଛନ୍ତି । ଯେଉଁଥିରେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ଦ୍ୱିତୀୟ ଲାଇନରେ ମୁଣ୍ଡ ନୁଆଁଇ ଠିଆ ହୋଇଥିବା ଦେଖାଯାଇଛି । କଂଗ୍ରେସକୁ ଟାର୍ଗେଟ କରି ପୁନାୱାଲା କହିଛନ୍ତି । ପ୍ରାୟୋଜିତ ଦେଶ ଦ୍ୱାରା ସ୍ଥିର ହୋଇଥିବା ପ୍ରୋଟୋକଲକୁ ନେଇ ରାଜନୀତି କରିବା ଅପରିପକ୍ୱତାର ନିଦର୍ଶନ । ସେ ଆହୁରି ମଧ୍ୟ କହିଛନ୍ତି, କ’ଣ ରାହୁଲ ଗାନ୍ଧୀ ଚାଇନା ସହ ଏମଓୟୁ ସାଇନ କରିବା ସମୟରେ ଅବା ଡୋକଲାମ ମାମଲାରେ ଚାଇନା ରାଷ୍ଟ୍ରଦୂତଙ୍କ ସହ ଚାଇନିଜ ଖାଇବା ସମୟରେ ‘ଲାଲ ଆଖି’ ଦେଖାଇଥିଲେ ।
