ବାଙ୍କୀ, ୨୪/୮ (ଶୁଭେନ୍ଦୁ ମହାପାତ୍ର): ଅସୁରକ୍ଷିତ ବସ୍ରେ ସ୍କୁଲ ଛାତ୍ରଛାତ୍ରୀଙ୍କୁ ଯାତାୟାତ କରାଯାଉଥିବା ଅଭିଯୋଗରେ କଟକ ପରିବହନ ବିଭାଗ ବାଙ୍କୀ ଅଞ୍ଚଳରୁ ୩ଟି ଗାଡ଼ି ଜବତ କରିଛି। ଜବତ ଗାଡ଼ିଗୁଡ଼ିକର ଫିଟନେସ୍ ଓ ବୀମା ନଥିବା ଜଣାପଡ଼ିଛି।
ସୂଚନା ଅନୁସାରେ, ଡମପଡ଼ା ବ୍ଲକ ଅନ୍ତର୍ଗତ ଗୋବିନ୍ଦପୁର ଆଦର୍ଶ ବିଦ୍ୟାଳୟରେ ଛାତ୍ରୀଛାତ୍ରଙ୍କ ଯାତାୟାତ ପାଇଁ ‘ଆଦିତ୍ୟ’ ନାମରେ ଦୁଇଟି ଘରୋଇ ବସ୍ ନିୟୋଜିତ ହୋଇଥିଲା। ତେବେ ଏହି ବସ୍ଗୁଡ଼ିକ ଆବଶ୍ୟକ କାଗଜପତ୍ର ବିନା ଚଳାଚଳ କରୁଥିବା ଅଭିଯୋଗ ହୋଇଥିଲା।ଖବର ପାଇ କଟକ ପରିବହନ ବିଭାଗର ଅଧିକାରୀମାନେ ଆଜି ଜାତମୁଣ୍ଡିଆ ଛକ ନିକଟରେ ଚଢ଼ାଉ କରି ଦୁଇଟି ବସ୍କୁ ଜବତ କରିଥିଲେ। ପରେ ବସ୍ ଦୁଇଟିକୁ ବାଙ୍କୀ ଥାନାକୁ ନିଆଯାଇଥିଲା। ଏହାସହ ଅନ୍ୟ ଏକ ଗାଡ଼ି ମଧ୍ୟ ଜବତ ହୋଇଥିବା ଜଣାପଡ଼ିଛି।
ସମସ୍ତ ଆବଶ୍ୟକ ଦସ୍ତାବିଜ ଯାଞ୍ଚ କରାଯିବା ପରେ ନିୟମ ଅନୁଯାୟୀ ଜରିମାନା ଆଦାୟ ସହ ଆବଶ୍ୟକ ଆଇନଗତ ପଦକ୍ଷେପ ନିଆଯିବ ବୋଲି କଟକ ପରିବହନ ବିଭାଗର ଇନ୍ସପେକ୍ଟର ରଞ୍ଜନ କୁମାର ଦୋରା କହିଛନ୍ତି।
ସୂଚନା ଅନୁସାରେ, ଏହି ବସ୍ଗୁଡ଼ିକ ପୂର୍ବରୁ ମଧ୍ୟ ନିୟମ ଉଲ୍ଲଂଘନ କରିଥିବା ଅଭିଯୋଗ ରହିଛି। ଗତବର୍ଷ ଡିସେମ୍ବର ମାସରେ ମଧ୍ୟ ଏହି ବସ୍ଗୁଡ଼ିକୁ ଜବତ କରାଯାଇ ବାଙ୍କୀ ଥାନାରେ ଅଟକ ରଖାଯାଇଥିଲା। ସ୍କୁଲ ଛାତ୍ରୀଛାତ୍ରଙ୍କ ସୁରକ୍ଷିତ ଯାତାୟାତକୁ ନେଇ ପରିବହନ ବିଭାଗର ଏଭଳି ଚଢ଼ାଉକୁ ସ୍ଥାନୀୟ ଅଭିଭାବକମାନେ ସ୍ୱାଗତ କରିଛନ୍ତି।
Dharitri – Odisha’s No.1 Odia Daily