ଭୁବନେଶ୍ୱର,୧୬।୬: ମୌସୁମୀରେ ପ୍ରତିବନ୍ଧକ ସାଜୁଛି କି ଏଲ ନି ନୋ? କେବଳ ରାଜ୍ୟ ନୁହେଁ ସାରା ଦେଶରେ ଏଭଳି ସ୍ଥିତି ।ଏବେ ବି ଦିନରେ ଖରା ଗରମ ସାଙ୍ଗକୁ ଗୁଳୁଗୁଳି ଲାଗି ରହିଛି । ଦିନର ତାପମାତ୍ରା ଯଦିଓ ସାମାନ୍ୟ ହ୍ରାସ ପାଇଛି । ହେଲେ ଗୁଳୁଗୁଳି ଅଣାୟତ୍ତ କରୁଛି । ତେବେ ଏଭଳି ପରିସ୍ଥିତିରେ ଜୁନ ୧୮ ତାରିଖରେ କିଭଳି ସ୍କୁଲ ଖୋଲିବ ତାହାକୁ ନେଇ ଚିନ୍ତାରେ ଅଭିଭାବକ । କାରଣ ପ୍ରବଳ ଖରା ସାଙ୍ଗକୁ ଗୁଳୁଗୁଳି ଲାଗି ରହିଥିବାରୁ ଛୋଟ ପିଲାମାନେ କିଭଳି ସ୍କୁଲ ଯିବେ ତାହା ବଡ଼ ପ୍ରଶ୍ନ ।
ଗତକାଲି ସ୍କୁଲ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ତ ଗଣ୍ଡ ଗଣମାଧ୍ୟମକୁ ସୂଚନା ଦେଇ କହିଥିଲେ ଯେ, ରଜ ପରେ ଖୋଲିବ ସ୍କୁଲ । ଆସନ୍ତା ଜୁନ ୧୮ ତାରିଖରେ ରାଜ୍ୟରେ ଖୋଲିବ ସ୍କୁଲ ।ଗଣଶିକ୍ଷା ମନ୍ତ୍ରୀ କହିଥିଲେ, ଆଗାମୀ ଦିନରେ ଯଦି ତାପମାତ୍ରା ଅସ୍ୱାଭାବିକ ଭାବେ ବୃଦ୍ଧି ପାଏ କିମ୍ବା ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟ ଉପରେ କୌଣସି ପ୍ରଭାବ ପଡ଼ିବାର ଆଶଙ୍କା ଦେଖାଦିଏ, ତେବେ ସରକାର ପରିସ୍ଥିତିକୁ ସମୀକ୍ଷା କରି ନୂଆ ନିଷ୍ପତ୍ତି ନେଇପାରନ୍ତି। ଉଲ୍ଲେଖଯୋଗ୍ୟ ଯେ, ଗ୍ରୀଷ୍ମପ୍ରବାହ ଓ ପ୍ରବଳ ଖରାକୁ ଦୃଷ୍ଟିରେ ରଖି ରାଜ୍ୟ ସରକାର ପୂର୍ବରୁ ସ୍କୁଲ ଛୁଟିକୁ ବଢ଼ାଇଥିଲେ । ବର୍ତ୍ତମାନ ଜୁନ ୧୮ ତାରିଖ ସ୍କୁଲ ଖୋଲିବ କି ନାହିଁ ତାହା ଉପରେ ନଜର ରହିଛି ।
