ନୂଆଦିଲ୍ଲୀ,୨୬ା୧୧: ବଳାତ୍କାର ଆଇନର ଅପବ୍ୟବହାରକୁ ଦୃଷ୍ଟିରେ ରଖି ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି। କୋର୍ଟ କହିଛନ୍ତି ଯେ ଦୁଇ ଜଣ ସାବାଳକଙ୍କ ମଧ୍ୟରେ ସମ୍ମତିକ୍ରମେ ହୋଇଥିବା ସମ୍ପର୍କ ଭାଙ୍ଗିଗଲେ, ଏହାକୁ ଅପରାଧ ଭାବରେ ବିବେଚନା କରାଯାଇ ପାରିବ ନାହିଁ ଏବଂ ପୁରୁଷ ବିରୋଧରେ ବଳାତ୍କାର ମାମଲା ଲାଗୁ ହୋଇପାରିବ ନାହିଁ।
ଜଷ୍ଟିସ୍ ବିଭି ନାଗରତ୍ନା ଏବଂ ଜଷ୍ଟିସ୍ ଆର୍ ମହାଦେବନ୍ଙ୍କୁ ନେଇ ଗଠିତ ଖଣ୍ଡପୀଠ ଜଣେ ଓକିଲଙ୍କ ବିରୋଧରେ ଦାୟର ହୋଇଥିବା ବଳାତ୍କାର ମାମଲାକୁ ଖାରଜ କରି କହିଛନ୍ତି, “ଏହି କୋର୍ଟ ଅନେକ ଥର ଲକ୍ଷ୍ୟ କରିଛନ୍ତି ଯେ ବିଫଳ କିମ୍ବା ଭାଙ୍ଗିଯାଇଥିବା ସମ୍ପର୍କକୁ ଅପରାଧର ରୂପ ଦିଆଯାଉଛି। ବଳାତ୍କାର ଭଳି ସର୍ବୋଚ୍ଚ ଅପରାଧକୁ କେବଳ ସେହି ମାମଲାଗୁଡ଼ିକରେ ଲାଗୁ କରାଯିବା ଉଚିତ୍ ଯେଉଁଠାରେ ପ୍ରକୃତ ଯୌନ ହିଂସା, ବାଧ୍ୟବାଧକତା, କିମ୍ବା ମୁକ୍ତ ସମ୍ମତିର ଅଭାବ ଥାଏ।”
ଜଣେ ମହିଳାଙ୍କୁ ବାରମ୍ବାର ବିବାହର ମିଥ୍ୟା ପ୍ରତିଶ୍ରୁତି ଦେଇ ବଳାତ୍କାର କରିଥିବା ଅଭିଯୋଗରେ ଜଣେ ଓକିଲଙ୍କ ବିରୋଧରେ ଏଫଆଇଆର ଖାରଜ କରିବାକୁ ମନା କରିଦେଇଥିବା ବମ୍ବେ ହାଇକୋର୍ଟଙ୍କ ଆଦେଶକୁ ସୁପ୍ରିମକୋର୍ଟ ଖାରଜ କରିଛନ୍ତି। କୋର୍ଟ ଏହି ସିଦ୍ଧାନ୍ତରେ ପହଞ୍ଚିଛନ୍ତି ଯେ ଏହି ସମ୍ପର୍କ ସ୍ୱେଚ୍ଛାକୃତ ଥିଲା ଏବଂ ତିନି ବର୍ଷ ଧରି ଚାଲିଥିବାବେଳେ ମହିଳା ଜଣକ କେବେବି ସମ୍ମତିର ଅଭାବ ନେଇ ଅଭିଯୋଗ କରି ନଥିଲେ।
ଖଣ୍ଡପୀଠ କହିଛନ୍ତି, “ପ୍ରତ୍ୟେକ ତିକ୍ତ ସମ୍ପର୍କକୁ ବଳାତ୍କାର ଅପରାଧରେ ପରିଣତ କରିବା ଦ୍ୱାରା କେବଳ ଅପରାଧର ଗମ୍ଭୀରତା କମ୍ ହୁଏ ନାହିଁ, ବରଂ ଅଭିଯୁକ୍ତଙ୍କୁ ମଧ୍ୟ ଅପୂରଣୀୟ କଳଙ୍କ ଏବଂ ଗୁରୁତର ଅନ୍ୟାୟର ସାମ୍ନା କରିବାକୁ ପଡ଼େ। ଏଭଳି କାର୍ଯ୍ୟ ଅପରାଧିକ ନ୍ୟାୟ ବ୍ୟବସ୍ଥାର ଅପବ୍ୟବହାରକୁ ଦର୍ଶାଏ ଏବଂ ଏହା ନିନ୍ଦନୀୟ।”
ଜଷ୍ଟିସ୍ ନାଗରତ୍ନା ତାଙ୍କ ରାୟରେ କହିଛନ୍ତି, “ଆଇନ ସେହି ପ୍ରକୃତ ମାମଲା ପ୍ରତି ସମ୍ବେଦନଶୀଳ ରହିବା ଉଚିତ ଯେଉଁଠାରେ ବିଶ୍ୱାସ ଭାଙ୍ଗିଛି ଏବଂ ମର୍ଯ୍ୟାଦା ଉଲ୍ଲଂଘନ ହୋଇଛି, ନଚେତ୍ ଆଇପିସିର ଧାରା ୩୭୬ ର ସୁରକ୍ଷା ପରିସର ପ୍ରକୃତରେ ପୀଡ଼ିତଙ୍କ ପାଇଁ କେବଳ ଏକ ଔପଚାରିକତାରେ ପରିଣତ ହେବ।”
