ଢେଙ୍କାନାଳ,୨୫।୬(ରତନ ନାୟାର)ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ସଦାଶିବପୁର ପଞ୍ଚାୟତର ସରପଞ୍ଚ ଧରିତ୍ରୀ ମଲ୍ଲିକଙ୍କ କାର୍ଯ୍ୟକୁଶଳତା ତାଙ୍କୁ ଅନ୍ୟମାନଙ୍କଠାରୁ ଭିନ୍ନ କରିଛି। ଏକଦା ଆଇନ ବ୍ୟବସାୟରେ ଭାଗ୍ୟ ପରଖିବାକୁ ମନସ୍ଥ କରିଥିବା ଏହି ଉଚ୍ଚଶିକ୍ଷିତା ମହିଳା ସମୟକ୍ରମେ ରାଜନୀତିରେ ପାଦ ଥାପିଛନ୍ତି। ଦାୟିତ୍ୱ ନେବାର ପ୍ରଥମ ଦିନରୁ ଜଣେ ସଚେତନ ଜନପ୍ରତିନିଧି ଭାବେ ସେବାକୁ ଜୀବନର ଧର୍ମ ଭାବେ ଗ୍ରହଣ କରିଛନ୍ତି। ଏଥିରେ ତାଙ୍କୁ ସନ୍ତୁଷ୍ଟି ମିଳୁଥିବା କହିଛନ୍ତି ଧରିତ୍ରୀ।
ଧରିତ୍ରୀଙ୍କ ଶିକ୍ଷାଗତ ଯୋଗ୍ୟତା ଏଲ୍ଏଲ୍ବି। ୨୦୧୭ରେ ସଦାଶିବପୁର ସମିତିସଭ୍ୟା ଭାବେ ନିର୍ବାଚିତ ହୋଇଥିବାବେଳେ ୨୦୨୨ରେ ତାଙ୍କୁ ଭୋଟର ସରପଞ୍ଚ ଭାବେ ବିଜୟୀ କରାଇଛନ୍ତି। ୯ଟି ଗ୍ରାମକୁ ନେଇ ଗଠିତ ସଦାଶିବପୁର ପଞ୍ଚାୟତର ଭୌଗୋଳିକ ସ୍ଥିତି ବଡ଼ ବିଚିତ୍ର। ପଶାସିଂହ ଗ୍ରାମ ପଞ୍ଚାୟତ ସଦରଠାରୁ ଦୂରରେ ଅବସ୍ଥିତ। ଏଠାକୁ ଯିବାକୁ ହେଲେ ଅନ୍ୟ ୨ଟି ପଞ୍ଚାୟତ ପାର୍ ହେବାକୁ ପଡ଼େ। ଫଳରେ ଭତ୍ତା ଯୋଜନାରେ ସାମିଲ ହୋଇଥିବା ଅସହାୟ ବୃଦ୍ଧାବୃଦ୍ଧ, ମହିଳା, ଦିବ୍ୟାଙ୍ଗ ବଡ଼ ଅସୁବିଧାରେ ପଡୁଛନ୍ତି। ଏହି ସମସ୍ୟାକୁ ହୃଦୟଙ୍ଗମ କରିଛନ୍ତି ଧରିତ୍ରୀ। ପ୍ରତିମାସ ଭତ୍ତା ତାରିଖରେ ନିର୍ବାହୀ ଅଧିକାରୀଙ୍କ ସହ ପଶାସିଂହ ଗ୍ରାମକୁ ଯାଇ ହିତାଧିକାରୀଙ୍କ ହାତରେ ଭତ୍ତା ଟଙ୍କା ଧରାଇ ଦେଇ ଆସନ୍ତି ସରପଞ୍ଚ। କେବଳ ଏତିକି ନୁହେଁ, ସେମାନେ କେତେ ଟଙ୍କା ପାଉଛନ୍ତି ତାହା ମଧ୍ୟ ବୁଝାଇ ଦେଉଛନ୍ତି। ଏଥିସହ ଲୋକଙ୍କ ସମସ୍ୟା ଶୁଣି ଏହାର ସମାଧାନ ଲାଗି ଉଦ୍ୟମ କରୁଛନ୍ତି। ପଶାସିଂହ ଗ୍ରାମକୁ ସବୁଦିନଆ ରାସ୍ତା ନାହିଁ। ରେଳଧାରଣା କଡ଼ରେ ଥିବା ଏହି ଗ୍ରାମ ରାସ୍ତାର ଉନ୍ନତୀକରଣ ଲାଗି ସେ ରେଲଓ୍ବେ କର୍ତ୍ତୃପକ୍ଷଙ୍କ ସହ ଆଲୋଚନା କରିଛନ୍ତି। ହାତୀ ଉପଦ୍ରବରୁ ଧନଜୀବନକୁ ସୁରକ୍ଷିତ ରଖିବା ଲାଗି ସେ ପାଟ୍ରୋଲିଂ ଦାୟିତ୍ୱରେ ଥିବା ବନ କର୍ମଚାରୀଙ୍କ ସହ ସମନ୍ବୟ ରଖି କାମ କରୁଛନ୍ତି। ହାତୀଙ୍କ ଉପସ୍ଥିତି ସମ୍ପର୍କରେ ଲୋକଙ୍କୁ ନିୟମିତ ସଚେତନ କରାଉଛନ୍ତି। ଏହାକୁ ବାଦ୍ଦେଲେ ଅସହାୟଙ୍କୁ ସହାୟତା, ଚାରା ରୋପଣ ଭଳି ଅନେକ କାର୍ଯ୍ୟ କରୁଛନ୍ତି। ରାଜନୀତିରୁ ଊର୍ଦ୍ଧ୍ୱକୁ ଉଠି ସମସ୍ତଙ୍କ ସହଯୋଗରେ ପଞ୍ଚାୟତର ବିକାଶ କରିବା ତାଙ୍କର ଏକମାତ୍ର ଉଦ୍ଦେଶ୍ୟ। ଲୋକଙ୍କ ବିଶ୍ୱାସ ଜିତିବା ଲକ୍ଷ୍ୟରେ ସେ ଆଗକୁ ବଢୁଛନ୍ତି। ଏଥିରେ ଆନନ୍ଦ ପାଆନ୍ତି ବୋଲି ଧରିତ୍ରୀ ନିଜ ପ୍ରତିକ୍ରିୟାରେ କହିଛନ୍ତି। ସୂଚନାଯୋଗ୍ୟ, ଧରିତ୍ରୀଙ୍କ ସ୍ବାମୀ ରାକେଶ ମଲ୍ଲିକ ଜଣେ ବ୍ୟବସାୟୀ। ଏକମାତ୍ର ପୁଅ ଯୁକ୍ତ ୨ ବିଜ୍ଞାନରେ ପଢୁଛନ୍ତି।
