ପରଜଙ୍ଗ, ୧୯।୧୧(ଡି.ଏନ୍.ଏ.): ସରପଞ୍ଚଙ୍କ ୨ ଭାଇ, ଭାଉଜ, ଶ୍ୱଶୁର, ଶାଳୀ ସମସ୍ତେ ମିଶି କରୁଛନ୍ତି ମାଟି କାମ। ଏ ବାବଦକୁ ସେମାନେ ସରକାରଙ୍କଠାରୁ ମଜୁରି ମଧ୍ୟ ନେଇଛନ୍ତି। ସରକାରୀ ଓ୍ବେବ୍ସାଇଟ୍ରୁ ମିଳିଥିବା ଏଭଳି ତଥ୍ୟ ଏବେ ଢେଙ୍କାନାଳ ଜିଲା ପରଜଙ୍ଗ ବ୍ଲକ କଙ୍କିଳି ପଞ୍ଚାୟତରେ ଚାଲିଥିବା ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ର ବାସ୍ତବ ଚିତ୍ରକୁ ପଦାକୁ ଆଣିଛି। ସ୍ଥାନୀୟ ଶ୍ରମିକଙ୍କୁ ଅଣଦେଖା କରି ରାତିଅଧିଆ ମେଶିନରେ କାମ କରାଯାଇ ସରକାରୀ ତହବିଲ୍ରୁ ଅର୍ଥ ହଡ଼ପ କରାଯାଉଥିବା ଅଭିଯୋଗ ଆସିବା ଏବଂ ବ୍ଲକ ପ୍ରଶାସନ ପକ୍ଷରୁ ଏହାର ତଦନ୍ତ କରାଯିବ ବୋଲି ସ୍ପଷ୍ଟ କରାଯିବା ପରେ ଏହାକୁ ନେଇ ହରଡ଼ଘଣାରେ ପଡ଼ିଛନ୍ତି ସ୍ଥାନୀୟ ଜନପ୍ରତିନିଧି ଏବଂ ବିଭାଗୀୟ ଅଧିକାରୀ।
ଅଭିଯୋଗ ଅନୁଯାୟୀ, କଙ୍କିଳି ପଞ୍ଚାୟତର ଛପୁଟିଆରୁ କୁସୁମୁଗୋଠ ମୁଣ୍ଡା ସାହିକୁ ସଂଯୋଗ କରୁଥିବା ମାଟି ରାସ୍ତାର ଉନ୍ନୀତକରଣ ଲାଗି ୨୦୨୨-୨୩ ଆର୍ଥିକ ବର୍ଷରେ ଏମ୍ଜିଏନ୍ଆର୍ଜିଏସ୍ରେ ଅନ୍ତର୍ଭୁକ୍ତ କରାଯାଇଥିଲା। ଏଥିଲାଗି ୧୦ ଲକ୍ଷ ଟଙ୍କାର ବ୍ୟୟ ଅଟକଳ ହୋଇଥିବା ବେଳେ କାମ ଜାରି ରହିଛି। ଏହି କାର୍ଯ୍ୟରେ ୧ ଲକ୍ଷ ୯୨ ହଜାର ଟଙ୍କାର ବିଲ୍ ହୋଇଥିବାବେଳେ ନଭେମ୍ବର ୧୨ରୁ ୧୮ ତାରିଖ ଯାଏ ୪୨ ଶ୍ରମିକ ନିୟୋଜିତ ଥିବା ବିଭାଗୀୟ ଓ୍ବେବ୍ସାଇଟ୍ରେ ଉଲ୍ଲେଖ କରାଯାଇଛି। ସବୁଠାରୁ ବଡ଼କଥା ସମ୍ପୃକ୍ତ ଶ୍ରମିକଙ୍କ ମଧ୍ୟରେ ଅଛନ୍ତି ସରପଞ୍ଚ ମକର ଚାନ୍ଦ ସାହୁଙ୍କ ୨ ଭାଇ, ଭାଉଜ, ଶ୍ୱଶୁର ଏବଂ ଶାଳୀ। ହେଲେ ସ୍ଥାନୀୟ ଲୋକଙ୍କ କହିବା କଥା, ଉକ୍ତ ମାଟି ରାସ୍ତା କାମରେ କୌଣସି ଶ୍ରମିକ ନିୟୋଜିତ ହୋଇନାହାନ୍ତି। ରାତିଅଧିଆ ମେଶିନ୍ ଲଗାଇ କାମ ହେଉଛି। ଏ ସଂକ୍ରାନ୍ତରେ ବିଭାଗୀୟ କନିଷ୍ଠ ଯନ୍ତ୍ରୀ, ଏପିଓ, ବିଡିଓଙ୍କ ନିକଟରେ ଅଭିଯୋଗ ହୋଇଥିଲା। ଏହାପରେ ବିଡିଓ, କନିଷ୍ଠ ଯନ୍ତ୍ରୀ ଏବଂ ପିଇଓ ଘଟଣାସ୍ଥଳ ପରିଦର୍ଶନ କରିଥିଲେ। ତେବେ ସେତେବେଳକୁ କୌଣସି ଶ୍ରମିକ ଉପସ୍ଥିତ ନ ଥିବା ଦେଖିବାକୁ ମିଳିଥିଲା। କନିଷ୍ଠ ଯନ୍ତ୍ରୀଙ୍କ ବିନା ଏଷ୍ଟିମେଟ୍ରେ କିପରି କାମ ହେଉଛି ବୋଲି ଅଧିକାରୀମାନେ ସରପଞ୍ଚଙ୍କୁ ପ୍ରଶ୍ନ କରିଥିଲେ। ଏହି ସମୟରେ ମେଶିନରେ କାମ ହେଉଥିବା ସରପଞ୍ଚ ସେହି ସମୟରେ ସ୍ବୀକାର କରିଥିଲେ। ତେବେ ରାସ୍ତାକାମରେ ହେଉଥିବା ଅନିୟମିତତା ସମ୍ପର୍କରେ ଶୁକ୍ରବାର ପୁନର୍ବାର ଅଭିଯୋଗ ହେବାପରେ ସେ ମତ ବଦଳାଇଛନ୍ତି। ସେ କହିଛନ୍ତି, ରାସ୍ତା କାମର ତଦାରଖ ସେ ନିଜେ କରୁଛନ୍ତି। ମେଟ୍ଙ୍କ ଉପସ୍ଥିତିରେ ଶ୍ରମିକମାନେ କାମ କରୁଛନ୍ତି। ମେଶିନ ଲଗାଇ କାମ ହେଉ ନ ଥିବା ସେ ସ୍ପଷ୍ଟୀକରଣରେ କହିଛନ୍ତି।
ଅନ୍ୟପଟେ ଅଭିଯୋଗ ପରେ ବ୍ଲକ ପ୍ରଶାସନ ତତ୍ପର ହୋଇଉଠିଛି। ଅଭିଯୋଗର ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଡିଓ ସଂଗ୍ରାମ କିଶୋର ଭୋଳ ସୂଚନା ଦେଇଛନ୍ତି।
