ଚଣ୍ଡିଖୋଲ,୬ା୬(ଡି.ଏନ.ଏ.): ଯାଜପୁର ଜିଲା ବାଲିଚନ୍ଦ୍ରପୁର ଥାନା ଅଞ୍ଚଳରେ କିଛିଦିନ ତଳେ ଜଣେ ସରକାରୀ କର୍ମଚାରୀଙ୍କୁ ଅପହରଣ କରାଯାଇଥିବାବେଳେ ଶନିବାର ରାତିରେ ଉକ୍ତ ଥାନା ଅଧୀନ ନଳିପୁର ସରପଞ୍ଚ ଓ ପ୍ରାକ୍ତନ ସମିତିସଭ୍ୟଙ୍କୁ ଅପହରଣ କରି ମୁଣ୍ଡ ଜାମିନ ରଖାଯାଇଥିଲା। ୫ଲକ୍ଷ ଟଙ୍କାଦେଲେ ସେମାନଙ୍କୁ ଛଡ଼ାଯିବ ବୋଲି ଅପହରଣକାରୀ ଦାବି କରିଥିଲେ। ତେବେ ୪ ଘଣ୍ଟା ପରେ ସ୍ଥାନୀୟ ଲୋକଙ୍କ ଉଦ୍ୟମରେ ସେମାନେ ମୁକୁଳିଛନ୍ତି। ଏହି ଘଟଣାରେ ପୋଲିସ ଅପହରଣକାରୀଙ୍କୁ ରବିବାର ଅଟକ ରଖିଛି। ତାଙ୍କ ନିକଟରୁ ଏକ ବନ୍ଧୁକ, ୬ଜୀବନ୍ତ ଗୁଳି, ଗୋଟିଏ ଖଣ୍ଡା ଓ ଦୁଇଟି ଭୁଜାଲି ଜବତ କରାଯାଇଛି।
ସୂଚନା ଅନୁସାରେ, ନଳିପୁର ସରପଞ୍ଚ ସେକ୍ ଅବଦୁଲ ଗନି ଓ ପୂର୍ବତନ ସମିତିସଭ୍ୟ ସେକ୍ ଅବଦୁଲ ମଜିଦ ଚାରିନଙ୍ଗଳ ବଜାରରୁ ଘରକୁ ଫେରୁଥିବାବେଳେ କେନାଲ ବନ୍ଧ ନିକଟରେ ସେମାନଙ୍କୁ ସେକ୍ ମହେମୁଦ ନିଜ ଘରକୁ ଡାକିଥିଲେ। ତେବେ ପଞ୍ଚାୟତ ସମ୍ପର୍କରେ କୌଣସି ଆଲୋଚନା ପାଇଁ ଡାକିଥିବା ଆଶାକରି ଉଭୟ ତାଙ୍କ ଘରକୁ ଯାଇଥିଲେ। ମହେମୁଦ ସେମାନଙ୍କୁ ଘରେ ବସାଇବା ପରେ କବାଟ ବନ୍ଦ କରି ଦେଇଥିଲେ। ଏହାପରେ ବନ୍ଧୁକ ଦେଖାଇ ଭୟଭୀତ କରି ନିସ୍ତୁକ ମାଡ଼ ମାରିବା ସହ ସେମାନଙ୍କ ମୋବାଇଲ ଛଡ଼ାଇ ନେଇଥିଲେ। ଏପରି କି ୫ ଲକ୍ଷ ଟଙ୍କା ନ ଦେଲେ ତୁମକୁ ଛାଡ଼ିବି ନାହଁି ବୋଲି ଧମକ ଦେଇଥିଲେ। ଘରକୁ ଫେରିବା ଡେରିହେବା ଦେଖି ଉଭୟଙ୍କ ପରିବାର ଲୋକେ ଖୋଜାଖୋଜି ଆରମ୍ଭ କରିଥିତ୍ଲେ। ତେବେ ମହେମୁଦଙ୍କ ଘର ଆଗରେ ସେମାନଙ୍କ ମୋଟରସାଇକେଲ ଦେଖି ପରିବାର ଲୋକଙ୍କ ସମେତ ସ୍ଥାନୀୟ ଲୋକେ ସେଠାରେ ରୁଣ୍ଡ ହୋଇଥିଲେ। ମହେମୁଦ ଏହା ଦେଖି ଦୁହଁିକୁ ଛାଡ଼ି ଦେଇଥିଲେ। ଏନେଇ ସେକ୍ ମଜିଦ ଥାନାରେ ଅଭିଯୋଗ କରିବା ପରେ ପୋଲିସ ମହେମୁଦଙ୍କୁ ଚାରିନଙ୍ଗଳରୁ କାବୁ କରିଛି। ତେବେ ପୋଲିସ ମହେମୁଦଙ୍କ ଜଣେ ସହଯୋଗୀ ଘରେ ଚଢ଼ାଉ କରିଥିଲେ ମଧ୍ୟ ସେ ଫୋରର ହୋଇଯାଇଛନ୍ତି। ଏନେଇ ଥାନା ନଂ.୨୧୨/୨୨ରେ ଏକ ମାମଲା ରୁଜୁ ହୋଇଛି ବୋଲି ଥାନାଧିକାରୀ ରମାକାନ୍ତ ମୁଦୁଲି ସୂଚନା ଦେଇଛନ୍ତି।
