ନବରଙ୍ଗପୁର,୩।୮(ବି.ପ୍ର.): ଅଭାବ ଅନାଟନରେ ମାଆ ବାପା ଦାଦନ ଖଟି ଯାହା ରୋଜଗାର କରୁଥିଲେ ସେଥିରେ ପରିବାର ଚଳୁଥିଲା। ରୋଗରେ ମାଆବାପାଙ୍କ ମୃତ୍ୟୁ ଘଟିଲା। ଅସହାୟ ହୋଇଗଲେ ୫ ଭାଇ ଭଉଣୀ। ରାଜ୍ୟ ସରକାରଙ୍କ ଯୋଜନା ଓ ଜିଲା ପ୍ରଶାସନ ସହାୟତାର ହାତ ବଢ଼ାଇଲେ। ଅସହାୟ ଛାତ୍ରୀ ସରୋଜିନୀ ହରିଜନ ପାଠପଢି ଚାକିରୀ କରିବା ସହ ଆଜି ଅନ୍ୟଙ୍କ ପାଇଁ ପ୍ରେରଣା ସାଜିଛନ୍ତି। ଚାକିରି କରି ରୋଜଗାରକ୍ଷମ ହୋଇଥିବା ଏଭଳି ସରୋଜିନୀ ତାଙ୍କ ବଡ଼ ଭଉଣୀ, ପ୍ରଶାସନ ଓ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି।
ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ଅଧୀନ ପରଜାକାମଟା ଗାଁର ଗୋବର୍ଦ୍ଧନ ହରିଜନ ଓ କମଳାଙ୍କ ଝିଅ ସରୋଜିନୀ। ଭାଇଭଉଣୀ ହୋଇ ସେମାନେ ୫ଜଣ। ବଡ଼ ଦୁଇ ଭଉଣୀ ମିତୁଳା ଓ ରିନୁଙ୍କର ବିବାହ ହୋଇ ସାରିଥିଲା। ମାଆ ବାପା ବାହାରେ ଦାଦନ ଖଟୁଥିବାରୁ ଭଉଣୀ ସରୋଜିନୀ, ପ୍ରମିଳା ଓ ଭାଇ ଜହନଙ୍କୁ ବଡ଼ ଭଉଣୀ ମିତୁଳା ନିଜ ପାଖରେ ରଖି ନନ୍ଦାହାଣ୍ଡି ବ୍ଲକ ମଝିଗୁଡା ସ୍କୁଲରେ ପଢ଼ାଇଥିଲେ। ଏହା ମଧ୍ୟରେ ୨୦୧୬ରେ କମଳା ଓ ୨୦୧୮ରେ ଗୋବର୍ଦ୍ଧନଙ୍କର ମୃତ୍ୟୁ ଘଟିଲା। ମିତୁଳା ଜିଲାପାଳଙ୍କ ନିକଟରେ ନିଜ ଭାଇଭଉଣୀଙ୍କ ଭବିଷ୍ୟତ ପାଇଁ ନେହୁରା ହେଲେ। ଜିଲାପାଳଙ୍କ ନିର୍ଦ୍ଦେଶକ୍ରମେ ଜିଲା ଶିଶୁ ଶୁରକ୍ଷା ଅଧିକାରୀ ସୁରେଶ ପଟ୍ଟନାୟକ ସରୋଜିନିଙ୍କୁ ଆଣି ମଝିଗୁଡାସ୍ଥିତ ପଣ୍ଡିତ ଦିନ ଦୟାଲ ବାଳିକା ଆଶ୍ରମରେ ଥଇଥାନ କଲେ। ଆଶ୍ରମରେ ରହି ସରୋଜିନୀ ପ୍ରଥମରୁ ୭ମ ଶ୍ରେଣୀ ପର୍ଯ୍ୟନ୍ତ ଜବାଗୁଡା ପିୟୁପିଏସରେ ପଢ଼ିଥିଲେ। ୩ୟ ଶେଣୀରେ ୨୪୦୦, ୬ଷ୍ଠରେ ୬୮୦୦ ଟଙ୍କା ମେଧାବୃତ୍ତି ପାଇଥିଲେ। ୨୦୧୮ରେ ଦଶମରେ ୭୧% ମାର୍କ ରଖି ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିଲେ। ମୁଖ୍ୟମନ୍ତ୍ରୀଙ୍କ ପୋଷ୍ଟ ସ୍କଲାରସିପି ଯୋଜନାରୁ ୫ହଜାର ଟଙ୍କା ସରୋଜିନୀଙ୍କୁ ମିଳିଥିଲା। ଜିଲା ଶିଶୁ ସୁରକ୍ଷା ୟୁନିଟ ପକ୍ଷରୁ କାଉନ୍ସିଲିଂ କରି ସରୋଜିନୀଙ୍କୁ ସୁଦକ୍ଷା ଯୋଜନାରେ ଉମରକୋଟ ସରକାରୀ ଆଇଟିଆଇରେ ଜଏନ କଲେ। ବିଜୁ ସୁରକ୍ଷା ଯୋଜନାରେ ୨୦ ହଜାର ଟଙ୍କା ପ୍ରଶାସନ ପକ୍ଷରୁ ପ୍ରଦାନ କରାଗଲା। ୮୨% ନମ୍ବର ରଖି ପାସ କଲେ ସରୋଜିନୀ। ମାଟ୍ରିକ ପରେ ସରୋଜିନିଙ୍କୁ ମାସିକ ୨ ହଜାର ଟଙ୍କା ଲେଖାଏ ପୁଷ୍ଠ ପୋଷକତା ଯୋଜନାରେ ଶିଶୁ ସୁରକ୍ଷା ବିଭାଗ ପକ୍ଷରୁ ପ୍ରଦାନ କରାଯାଉଥିଲା। ସରକାରୀ ସୁବିଧା ସୁଯୋଗ, ପ୍ରଶାସନର ସହାୟତା ଯୋଗୁ ମୋର ଭବିଷ୍ୟତ ଗଢି ପାରିଛି ବୋଲି ସରୋଜିନୀ କହିଛନ୍ତି। ଜିଲା ଶିଶୁ ସୁରକ୍ଷା ଅଧିକାରୀ ସୁରେଶ ପଟନାୟକ ମୋ ପାଠ ପଢା ପ୍ରତି ସବୁବେଳେ ଧ୍ୟାନ ଦେଉଥିଲେ ବୋଲି ସେ କହିଛନ୍ତି। ଏବେ ଆନ୍ଧ୍ରପ୍ରଦେଶ ଇଷ୍ଟ ଗୋଦାବରୀ ଜିଲାର ପନାଡ଼ାରେ ଦେବୀ ଆକ୍ବାଟକ ପ୍ରାଇଭେଟ ଲିମିଟେଡ଼ରେ ଲେଡି ଇନ୍ଚାର୍ଜ ରହିବା ସହ ଡାଟା ଏଣ୍ଟ୍ରି ଓ ଅଗ୍ନି ନିରାପତ୍ତା ବିଭାଗରେ ୨୦୨୧ ନଭେମ୍ବରରୁ କାମ କରୁଛନ୍ତି ସରୋଜିନୀ। ସାନ ଭଉଣୀ ପ୍ରମିଳା ହରିଜନ ପଣ୍ଡିତ ଦିନ ଦୟାଲ ବାଳିକା ଆଶ୍ରମରେ ଓ ଭାଇ ଖାତିଗୁଡାସ୍ଥିତ ଆଗେପେ ଚିଲଡ୍ରେନ ହୋମରେ ରହି ପଢୁଛନ୍ତି। ସରକାରଙ୍କ ପକ୍ଷରୁ ଯାହା ସବୁ ସୁବିଧା ରହିଛି ତାହା ଯୋଗାଇ ଦିଆଯାଇଛି ବୋଲି ଜିଲା ଶିଶୁ ସୁରକ୍ଷା ଅଧିକାରୀ ସୁରେଶ ପଟ୍ଟନାୟକ କହିଛନ୍ତି।
