ଖଡ଼ିଆଳ,୧୫।୪(ଡି.ଏନ.ଏ.): ନୂଆପଡା ଜିଲା ଖଡ଼ିଆଳ ବ୍ଲକ ଅନ୍ତର୍ଗତ ରିଷିଗାଁ ପଞ୍ଚାୟତ ସରଗାଦି ଗ୍ରାମରେ କିଡ୍ନୀ ରୋଗରେ ୨୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ବେଳେ ବର୍ତ୍ତମାନ ୫୦ରୁ ଅଧିକ ଲୋକ ଏହି ରୋଗରେ ପଡି ମୃତ୍ୟୁସହ ସଂଗ୍ରାମ କରୁଥିବା ଜଣାପଡ଼ିଛି। କାହା ଘରେ ସ୍ବାମୀ ସ୍ତ୍ରୀ ତ କାହା ଘରେ ବାପ ପୁଅ ପୁଣି କାହା ଘରେ ଭାଇ ଭାଇ ଏହି ରୋଗରେ ପଡିଛନ୍ତି। ଗ୍ରାମରେ ବ୍ୟାପୁଥିବା ଏହି ରୋଗର ପ୍ରକୃତ କାରଣ ଜଣାପଡିନାହିଁ। ହେଲେ ଗ୍ରାମକୁ ଯୋଗାଣ ହେଉଥିବା ପାଣି ପ୍ରଦୂଷିତ ଥିବାରୁ ଏହି ରୋଗ ବ୍ୟାପୁଥିବା ଲୋକେ ଅଭିଯୋଗ କରୁଛନ୍ତି। ଜଣଙ୍କ ପରେ ଜଣଙ୍କୁ ବ୍ୟାପିବାରେ ଲାଗିଛି କିଡ୍ନୀ ରୋଗ। ଟଙ୍କା ଅଭାବରୁ ରୋଗର ଚିକିତ୍ସା କରି ନ ପାରି ମୃତ୍ୟୁମୁଖରେ ପଡୁଛନ୍ତି ଲୋକେ। ଗ୍ରାମର ସଙ୍ଗୀତା ବାଗଙ୍କ ଶ୍ୱଶୁର, ଦେଢ଼ ଶ୍ୱଶୁର ଓ ସ୍ବାମୀ ଏହି ରୋଗରେ ମୃତ୍ୟୁବରଣ କରିଥିବାରୁ ବର୍ତ୍ତମାନ ପରିବାର ଲୋକେ ସମସ୍ୟାରେ ଚଳୁଛନ୍ତି। ଘର ମୁରବୀମାନେ ମୃତ୍ୟୁବରଣ କରିବା ଓ ଚିକିତ୍ସା ପାଇଁ ଘର ଯାବତୀୟ ଜିନିଷ, ଜମିବାଡ଼ି ବିକିବାକୁ ପଡ଼ୁଥିବାରୁ ଲୋକେ ଅଭାବ ଅସୁବିଧାରେ ଚଳିବାକୁ ବାଧ୍ୟ ହେଉଛନ୍ତି। ଅନ୍ୟପକ୍ଷରେ ନିରବଦ୍ରଷ୍ଟା ସାଜିଛି ପ୍ରଶାସନ। ଗ୍ରାମକୁ ପାନୀୟ ଜଳଯୋଗାଣ ପାଇଁ ବ୍ୟବସ୍ଥା ହୋଇଥିଲେ ମଧ୍ୟ ଏହି ପାଣି ବିଶୁଦ୍ଧ ନ ଥିବା ଅଭିଯୋଗ କରୁଛନ୍ତି ଲୋକେ। ଯଥାଶିଘ୍ର ତିଖାଲି ଡ୍ୟାମରୁ ମେଗା ଜଳ ସେଚନ ପ୍ରକଳ୍ପରୁ ଶୁଦ୍ଧ ପାନୀୟ ଜଳ ଯୋଗାଣ ପାଇଁ ସ୍ଥାନୀୟ ସରପଞ୍ଚ ବିରଞ୍ଚି ନାଗଙ୍କ ସହ ଗ୍ରାମବାସୀ ଦାବି କରିଛନ୍ତି। ବର୍ତ୍ତମାନ ଗ୍ରାମର ଉର୍ମିଳା ବାଗ, ସାମନ୍ତ ବାଗ, କୁନ୍ତୀ ବାଗ, ରାଧେଶ୍ୟାମ ବାଗ, କ୍ଷ୍ୟମାନନ୍ଦ ମହନନ୍ଦ, ଗିରିଧାରୀ ଠେଲା, ହୃଦ ଶବର, ହୃଷୀ ଘିଭେଳା, ଧୀର ଦୁର୍ଗା, ସୁବିନ୍ଦ୍ର ଦୁର୍ଗା, ପ୍ରଶ୍ନ ବାଗ, ଘନଶ୍ୟାମ ଦୁର୍ଗା, ପୁନୁ ଦୁର୍ଗା, ଚୈତ ରାମ ବାଗ, ଶମ୍ଭୁ ବାଗ ଆକ୍ରାନ୍ତ ହୋଇ ଦୁର୍ଦିନରେ ଦିନ କାଟୁଛନ୍ତି। ପ୍ରଶାସନ ଯଦି ଆକ୍ରାନ୍ତ ବ୍ୟକ୍ତିମାନଙ୍କୁ ସହାୟତା ନ ଯୋଗାଇଲେ ଆଗାମୀ ଦିନରେ ଦୁଃଖ ଦି ଗୁଣିତ ହେବ ବୋଲି ପ୍ରକାଶ କରିଛନ୍ତି। ଏ ନେଇ ଖଡ଼ିଆଳ ଉପଖଣ୍ଡ ଚିକିତ୍ସାଳୟ ଇନଚାର୍ଜ ଡାକ୍ତର ରଞ୍ଜିତ ରାଉତଙ୍କୁ ପଚାରିବାରୁ ସେହି ଗ୍ରାମରେ କ୍ୟାମ୍ପ କରି ରୋଗର କାରଣ ଅନୁଧ୍ୟାନ କରାଯିବ ଓ ଚିକିତ୍ସା ବ୍ୟବସ୍ଥା କରାଯିବ ବୋଲି ପ୍ରକାଶ କରିଥିଲେ।
