ନୂଆଦିଲ୍ଲୀ,୨।୧୦: ଆଜିକାଲି ଇରାନୀ କପ ଖେଳାଯାଉଛି। ସୌରାଷ୍ଟ୍ର ଏବଂ ରେଷ୍ଟ ଅଫ୍ ଇଣ୍ଡିଆ ମଧ୍ୟରେ ଖେଳାଯାଉଥିବା ଏକ ମ୍ୟାଚରେ ସରଫରାଜ ଖାନ ପୁଣି ଥରେ ଚମତ୍କାର ପ୍ରଦର୍ଶନ କରିଛନ୍ତି। ରେଷ୍ଟ ଅଫ୍ ଇଣ୍ଡିଆ ପାଇଁ ଖେଳୁଥିବା ସରଫରାଜ ପ୍ରଥମ ଇନିଂସରେ ଏକ ଜବରଦସ୍ତ ଶତକ ହାସଲ କରିଥିଲେ।
ସେ ୧୭୮ ବଲ ସହାୟତାରେ ୧୩୮ ରନ ସ୍କୋର କରିଥିଲେ। ତାଙ୍କ ଇନିଂସରେ ୨୦ ଚୌକା ଓ ୨ ଛକା ସାମିଲ ଥିଲା। ସରଫରାଜ ଏହି ଇନିଂସ ସହ ଅଷ୍ଟ୍ରେଲିଆର ପୂର୍ବତନ କିମ୍ବଦନ୍ତୀ ସାର୍ ଡନ ବ୍ରାଡମ୍ୟାନଙ୍କ ରେକର୍ଡ ଭାଙ୍ଗିଛନ୍ତି।
ଇରାନୀ କପର ଏହି ମ୍ୟାଚ ସହିତ ସରଫରାଜ ତାଙ୍କର ପ୍ରଥମ ଶ୍ରେଣୀ କ୍ୟାରିୟରର ୨୯ଟି ମ୍ୟାଚର ୪୩ ଇନିଂସରେ ୨୯୨୮ ରନ ସଂଗ୍ରହ କରିଛନ୍ତି। ଏଥି ସହିତ ବ୍ରାଡମ୍ୟାନ ୨୨ଟି ମ୍ୟାଚର ୪୩ ଇନିଂସରେ ୨୯୨୭ ରନ ସଂଗ୍ରହ କରିଥିଲେ। ଡନ ବ୍ରାଡମ୍ୟାନ ତାଙ୍କର ୪୩ ଇନିଂସରେ ୧୨ ଶତକ ଏବଂ ୯ ଅର୍ଦ୍ଧଶତକ ହାସଲ କରିଥିଲେ। ଅନ୍ୟପକ୍ଷରେ ସରଫରାଜ ୪୩ ଇନିଂସରେ ମୋଟ ୧୦ ଶତକ ଏବଂ ୮ ଅର୍ଦ୍ଧଶତକ ହାସଲ କରିଛନ୍ତି। ଏହି ଇନିଂସରେ ସରଫରାଜ ୭ଥର ଅପରାଜିତ ରହିଥିବାବେଳେ ବ୍ରାଡମ୍ୟାନ ୮ ଥର ଅପରାଜିତ ରହିଥିଲେ।
