ଢେଙ୍କାନାଳ ଅଫିସ, ୧୮।୫ – ମହିମା ଧର୍ମର ନିଗୂଢ଼ ତତ୍ତ୍ୱକୁ ନିଜ ଲେଖା ମାଧ୍ୟମରେ ବିଶ୍ୱରେ ପରିଚିତ କରାଇଥିଲେ ସନ୍ଥକବି ଭୀମ ଭୋଇ। ଏଥିରେ ବହୁ ସଂସ୍କାରଧର୍ମୀ କଥା ରହିଛି। ମାନବବାଦର ବାର୍ତ୍ତା ପ୍ରତିଫଳିତ ହୋଇଛି। ବିଶ୍ୱଶାନ୍ତି ପ୍ରତିଷ୍ଠା ପାଇଁ ଭୀମ ଭୋଇଙ୍କ ଦର୍ଶନତତ୍ତ୍ୱ ସର୍ବଦା ଯୁଗୋପଯୋଗୀ ସାବ୍ୟସ୍ତ ହୋଇଛି। ଏହାକୁ ଯୁବପିଢ଼ିଙ୍କ ସମେତ ସବୁବର୍ଗର ଲୋକ ହୃଦୟଙ୍ଗମ କରିବା ଉଚିତ। ଢେଙ୍କାନାଳ ଜିଲା ଯୋରନ୍ଦାସ୍ଥିତ ମହିମାଗାଦିରେ କୌପୀନଧାରୀ ମହିମା ସମାଜ ପକ୍ଷରୁ ସନ୍ଥକବିଙ୍କ ୧୭୨ତମ ଜୟନ୍ତୀ ପାଳନ ଅବସରରେ ଉପସ୍ଥିତ ଅତିଥିମାନେ ଏଭଳି ମତବ୍ୟକ୍ତ କରି ତାଙ୍କର ସ୍ମୃତିଚାରଣ କରିଛନ୍ତି।
ସଭାପତି ରଘୁନାଥ ବାବାଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ପ୍ରଥମେ ଅଖଣ୍ଡଦୀପ ପ୍ରଜ୍ୱଳନ କରାଯାଇ ବିଶ୍ୱବାସୀଙ୍କ ମଙ୍ଗଳକାମନା କରାଯାଇଥିଲା। ମୁଖ୍ୟ ଅତିଥି ଭାବେ ଜିଲା ପରିଷଦ ସଭାନେତ୍ରୀ ଅର୍ଚ୍ଚନା ପୁହାଣ, ମୁଖ୍ୟବକ୍ତା ମହିମାଧର୍ମ ଗବେଷକ ଡ. ଉଦ୍ଧବ ନାୟକ, ସମ୍ମାନିତ ବକ୍ତା ଅବସରପ୍ରାପ୍ତ ପ୍ରଶାସନିକ ଅଧିକାରୀ ସନାତନ ମଲ୍ଲିକ, ଅନ୍ୟତମ ଗବେଷକ ପ୍ରଦ୍ୟୁମ୍ନ ରଥ, ସମ୍ମାନିତ ଅତିଥି ସରପଞ୍ଚ ଆରତୀ ନାୟକ, ଜିଲା ପରିଷଦ ସଭ୍ୟ ବିଶ୍ୱନାଥ ଚିନ୍ନାରା, ସମିତି ସଭ୍ୟ ପ୍ରତ୍ୟୁଷହରି ପ୍ରଧାନ, ଶିକ୍ଷାବିତ୍ ଶଙ୍କର୍ଷଣ ଶତପଥୀ, ମହିମାଭକ୍ତ ବୈକୁଣ୍ଠ ଦେହୁରୀ, ତପୋବନ ପତ୍ରିକା ସମ୍ପାଦକ ପ୍ରଶାନ୍ତ ମହାପାତ୍ର ପ୍ରମୁଖ ଯୋଗଦେଇ ଭୀମ ଭୋଇଙ୍କ ସାହିତ୍ୟକୃତିକୁ ସ୍ମୃତି ରୋମନ୍ଥନ କରିଥିଲେ।
ଏହି ଅବସରରେ ଭୀମ ଭୋଇ ଓ ମହିମା ଧର୍ମ ସମ୍ପର୍କିତ କବିତା ପାଠୋତ୍ସବ ଅନୁଷ୍ଠିତ ହୋଇଥିଲା। ସୁଧାଂଶୁ ଶେଖର ରାଉତଙ୍କ ସଂଯୋଜନାରେ କବୟିତ୍ରୀ ରଶ୍ମିତା ରାଉତ, କବି ନେତ୍ରାନନ୍ଦ ରାଉତ, ପ୍ରେମାନନ୍ଦ ରାଉତ, ବୈକୁଣ୍ଠ ବିହାରୀ ସ୍ବାଇଁ, ପତିତପାବନ ରାଉତ, ପ୍ରଫୁଲ୍ଲ ଚନ୍ଦ୍ର ପ୍ରଧାନ, ନୀରୋଦ ଚନ୍ଦ୍ର ସାମଲ, ଶଙ୍କର୍ଷଣ ଶତପଥୀ, ବାଇଧର ବାରିକ ପ୍ରମୁଖ ସ୍ବରଚିତ କବିତା ପାଠ କରିଥିଲେ। ରୂପମଞ୍ଜରୀ ପଟ୍ଟନାୟକ ଭୀମ ଭୋଇଙ୍କ ସମ୍ପର୍କରେ ପ୍ରବନ୍ଧ ପାଠ କରିଥିଲେ। ସମ୍ପାଦକ ସୁଶାନ୍ତ ବାବା, ବରିଷ୍ଠ ସନ୍ନ୍ୟାସୀ କରୁଣାକର ବାବା, ଅଭୟ ବାବା, ଜ୍ଞାନୀ ବାବା ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
