ମହାକାଳପଡ଼ା,୪ା୧୦(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକର ଉପକୂଳ ସମୁଦ୍ର ତଟରେ ଅବସ୍ଥିତ ଅପହଞ୍ଚ ସାନ୍ତାଳୀ ଗ୍ରାମ ‘ପାଣିଖିଆ’। ଅନାଦି କାଳରୁ ଏହି ଗ୍ରାମର ସାନ୍ତାଳୀ ବଂଶଧରମାନେ ଲୁଣା ହେନ୍ତାଳ ଜଙ୍ଗଲ ମଧ୍ୟରେ ବସବାସ କରିଆସୁଛନ୍ତି। ତେବେ ସ୍ୱାଧୀନତାର ଏତେ ବର୍ଷ ପରେ ମଧ୍ୟ ଏହି ଗ୍ରାମରେ ମୌଳିକ ସୁବିଧା ଅପହଞ୍ଚ ହୋଇରହିଥିଲା।
ଏ ସମ୍ପର୍କରେ ଗଣମାଧ୍ୟମରେ ବାରମ୍ବାର ଖବର ପ୍ରକାଶ ପାଇବା ପରେ ପ୍ରଶାସନ ତତ୍ପରତା ପ୍ରକାଶ କରିଛି। ରବିବାର ‘ମିଶନ ଶକ୍ତି’ ବିଭାଗର ଏକ ପ୍ରତିନିଧି ଟିମ୍ ଗ୍ରାମକୁ ଗସ୍ତ କରି ୧୨ ଜଣ ସାନ୍ତାଳୀ ମହିଳାଙ୍କୁ ନେଇ ମା’ ଅଧିଷ୍ଠାତ୍ରୀ ଦେବୀ ‘ଜାହେରଆୟ’ ନାମକ ଏକ ନୂତନ ମହିଳା ସ୍ୱୟଂ ସହାୟକ ଗୋଷ୍ଠୀ (SHG) ଗଠନ କରିଛନ୍ତି। ସଭାନେତ୍ରୀ ଭାବେ ରେବତୀ ଟୁଡୁ ଓ ସମ୍ପାଦିକା ଭାବେ ମଲ୍ଲୀ ମାରାଣ୍ଡି ମନୋନୀତ ହୋଇଛନ୍ତି।
ଏହି ଗୋଷ୍ଠୀ ଗଠନ ପରେ ସ୍ଥାନୀୟ ସାନ୍ତାଳୀ ମହିଳାମାନଙ୍କ ମଧ୍ୟରେ ପ୍ରବଳ ଉତ୍ସାହ ଓ ଖୁସିର ଲହରୀ ଖେଳିଯାଇଛି। କେନ୍ଦ୍ର ଓ ରାଜ୍ୟ ସରକାରଙ୍କ ଜନଜାତି ବିକାଶ ଯୋଜନାର ସିଧାସଳଖ ଫାଇଦା ଏବେ ଏହି ମହିଳା ସ୍ୱୟଂ ସହାୟକ ଗୋଷ୍ଠୀ ମାଧ୍ୟମରେ ସେମାନଙ୍କ ପାଖରେ ପହଞ୍ଚିପାରିବ।
ମହିଳାମାନେ ଏବେ ଆତ୍ମନିର୍ଭରଶୀଳ ହେବା ସହ ବିଭିନ୍ନ ସରକାରୀ ସଭାସମିତି ଓ କାର୍ଯ୍ୟକ୍ରମରେ ସକ୍ରିୟ ଅଂଶଗ୍ରହଣ କରିବେ ବୋଲି ଗ୍ରାମର ମୁରବୀ ଗୁରୁଭା ହାଁସଦା, ଲବ ମାରାଣ୍ଡି, କୁଶ ମାରାଣ୍ଡି, ଚରଣ ଟୁଡୁ, ଶଙ୍କର ମାରାଣ୍ଡି, ଶିବ ଟୁଡୁ ଓ ସୁନେସ ସୋରେନ ପ୍ରମୁଖ ଆଶାପ୍ରକାଶ କରିଛନ୍ତି।