ଭୁବନେଶ୍ୱର,୨୭।୨(ବ୍ୟୁରୋ): ରାଜ୍ୟର ବିଭିନ୍ନ ନଦୀରୁ ହଜାର ହଜାର ଟ୍ରକ୍ ବାଲି ପଡ଼ୋଶୀ ଛତିଶଗଡ଼, ପଶ୍ଚିମବଙ୍ଗ ଓ ଆନ୍ଧ୍ର ପ୍ରଦେଶକୁ ଚାଲିଯାଉଛି। ଦଲାଲମାନେ ଶହ ଶହ ଟ୍ରକ୍ ବାଲି ଚୋରାଚାଲାଣ କରୁଛନ୍ତି। ରାଜ୍ୟକୁ ୫ ହଜାର କୋଟି ଟଙ୍କାର ରାଜସ୍ବହାନି ହେଉଛି। ମାର୍ ମାର୍ ଭଣ୍ଡାରିଆକୁ ମାର୍ ନୀତିରେ ସରକାର ସାଧାରଣ ଲୋକ ନେଉଥିବା ବାଲି ଟ୍ରାକ୍ଟର ପାଇଁ ୬୦ ହଜାର ଟଙ୍କା ଜରିମାନା କରୁଛନ୍ତି। ବାଲି ନୀତି ନ ଥିବାରୁ ନିଲାମ ନେଉଥିବା ଲିଜ୍ଧାରୀମାନେ ମନଇଚ୍ଛା ମୂଲ୍ୟରେ ବିକୁଛନ୍ତିି। ଏମିତି କି ବାଲି ଟ୍ରକ୍ ୨୦ ହଜାର ଟଙ୍କାରୁ ଊର୍ଦ୍ଧ୍ୱ ନେଉଛନ୍ତି । ରାଜ୍ୟରେ ହେଉଥିବା ବାଲି ଚୋରା ଚାଲାଣକୁ ନେଇ ବିରୋଧୀ ସରକାରଙ୍କ ଉପରେ ବର୍ଷିଥିଲେ। ସରକାର ତୁରନ୍ତ ବାଲି ନୀତି କାର୍ଯ୍ୟକାରୀ କରି ମୂଲ୍ୟ ନିର୍ଦ୍ଧାରଣ କରନ୍ତୁ ବୋଲି ବିରୋଧୀ ଦାବି କରିଥିଲେ। ବାଲିକୁ ନେଇ ୫୦ ଜଣ ସଭ୍ୟ ବିଧାନସଭାରେ ମନ୍ତ୍ରୀଙ୍କଠାରୁ ଜବାବ ତଲବ କରିଥିଲେ। ଗୃହର ଉଦ୍ବେଗକୁ ଦେଖି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ତୁରନ୍ତ ରାଜ୍ୟରେ ବାଲି ମୂଲ୍ୟ ନିର୍ଦ୍ଧାରଣ ପାଇଁ ନୀତି କାର୍ଯ୍ୟକାରୀ କରିବାକୁ ପରାମର୍ଶ ଦେଇଥିଲେ।
ଶୁକ୍ରବାର ପୂର୍ବାହ୍ନ ୧୦ଟା ୩୦ ମିନିଟ୍ରେ ଗୃହ କାର୍ଯ୍ୟ ଆରମ୍ଭ ହୋଇଥିଲା। ଭାଜପା ସଭ୍ୟ ମୋହନ ଚରଣ ମାଝି ବାଲି ଚୋରାଚାଲାଣ ଓ ବାଲି ନୀତିକୁ ନେଇ ପ୍ରଶ୍ନ କରିଥିଲେ। ରାଜ୍ୟରେ ବାଲି ନୀତି କାର୍ଯ୍ୟକାରୀ କରିବା ପାଇଁ କେବେ ନିଷ୍ପତ୍ତିି ହୋଇଥିଲା। ଅନ୍ୟ ରାଜ୍ୟରେ ବାଲି ନୀତି କାର୍ଯ୍ୟକାରୀ ହୋଇଥିବା ବେଳେ ଓଡ଼ିଶାରେ କେଉଁ କାରଣରୁ ବିଳମ୍ବ ହେଉଛି। କେବେ ସୁଦ୍ଧା ବାଲି ନୀତି କାର୍ଯ୍ୟକାରୀ ହେବ। ରାଜ୍ୟରେ ବାର୍ଷିକ ବାଲିର ଚାହିଦା କେତେ । ୨୦୧୫-୧୬ରୁ ୨୦୨୦-୨୧ ମଧ୍ୟରେ ରାଜ୍ୟରେ କେତେ ବାଲି ଉତ୍ତୋଳନ ହୋଇଛି। ବାହାର ରାଜ୍ୟ ଓ ବିଦେଶକୁ କେତେ ବାଲି ରପ୍ତାନି ହୋଇଛି। କେଉଁ ମହାନଗରରେ ସରକାରୀ ନିର୍ମାଣ କାର୍ଯ୍ୟରେ ବ୍ୟବହୃତ ବାଲିର ପ୍ରତି କ୍ୟୁବିକ୍ ଟନ୍ ମୂଲ୍ୟ କେତେ ବୋଲି ପଚାରିଥିଲେ। ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁଦାମ ମାର୍ଣ୍ଡି କହିଥିଲେ, ଓଡ଼ିଶା ବାଲି ନୀତି କାର୍ଯ୍ୟକାରୀ କରିବା ପାଇଁ ୨୦୧୮ ଏପ୍ରିଲ ୧୧ ତାରିଖରେ ତତ୍କାଳୀନ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ନିଷ୍ପତ୍ତିି ହୋଇଥିଲା। ଏହି ନୀତିର ଚିଠା ପ୍ରସ୍ତୁତି ତର୍ଜମା ପର୍ଯ୍ୟାୟରେ ରହିଛି। ରାଜ୍ୟରେ ବାଲିର ଚାହିଦା ଆକଳନ ହୋଇ ନାହିଁ। ଜିଲା କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ ୨୦୧୫-୧୬ରେ ୨୬,୪୧,୨୪୦ କ୍ୟୁବିକ୍ ମିଟର ବାଲି ଉତ୍ତୋଳନ ହୋଇଥିବା ବେଳେ ୨୦୧୬-୧୭ରେ ୩୫,୫୧,୧୨୬, ୨୦୧୭-୧୮ରେ ୪୧,୫୫,୨୯୨,୨୦୧୮-୧୯ରେ ୪୪,୩୭,୨୧୪, ୨୦୧୯-୨୦ରେ ୪୪,୧୭,୮୮୭ ଏବଂ ୨୦୨୦-୨୧ରେ ୪୭,୪୬,୪୫୪ କ୍ୟୁବିକ୍ ମିଟର ବାଲି ଉତ୍ତୋଳନ ହୋଇଛି। ବିଦେଶକୁ କିଛି ବାଲି ରପ୍ତାନି ହୋଇନାହିଁ। ତେବେ ୩ଟିି ରାଜ୍ୟକୁ ୨୦୧୮-୧୯ରେ ୧,୦୭,୮୩୧, ୨୦୧୯-୨୦ରେ ୭୪,୩୦୬ ଏବଂ ୨୦୨୦-୨୧ରେ ୫୯,୮୬୭ କ୍ୟୁବିକ୍ ମିଟର ବାଲି ରପ୍ତାନି କରାଯାଇଛି। ୫ଟି ମହାନଗର ନିଗମରେ ସରକାରୀ କାର୍ଯ୍ୟରେ ବ୍ୟବହୃତ ବାଲିର ମୂଲ୍ୟ ନିର୍ଦ୍ଧାରଣ କରାଯାଇ ନାହିଁ। ମୋହନ ମାଝି ଅତିରିକ୍ତ ପ୍ରଶ୍ନରେ ପୁଣି ପଚାରିଲେ, ରାଜ୍ୟ ସରକାର ବାଲିରୁ ବର୍ଷକୁ ମାତ୍ର ୧,୫୦୦ କୋଟି ଟଙ୍କା ରାଜସ୍ବ ପାଉଛନ୍ତି। ବାଲି ମୂଲ୍ୟ ନିର୍ଦ୍ଧାରଣ ହୋଇଥିଲେ ରାଜ୍ୟକୁ ବର୍ଷକୁ ୫ ହଜାର କୋଟି ଟଙ୍କାର ରାଜସ୍ବ ମିଳିପାରନ୍ତା ବୋଲି ସେ କହିଥିଲେ। ମନ୍ତ୍ରୀ କହିଥିଲେ, ବିଦେଶକୁ ବାଲି ରପ୍ତାନି ହେଉନାହିଁ। ୨/୩ଟି ରାଜ୍ୟକୁ ବାଲି ରପ୍ତାନି ହୋଇଛି। ବାଲି ମୂଲ୍ୟ ନିର୍ଦ୍ଧାରଣ ପାଇଁ ଖୁବ୍ଶୀଘ୍ର ସ୍ବତନ୍ତ୍ର ରୁଲ୍ ହେବ । ଗୃହର ଉଦ୍ବେଗକୁ ଦେଖି ବାଚସ୍ପତି କହିଥିଲେ, ରାଜ୍ୟରେ ବାଲି ଚୋରାଚାଲାଣ ହେଉଛି। ମୋ ନିର୍ବାଚନମଣ୍ଡଳୀରେ ମଧ୍ୟ ବାଲି ଆନ୍ଧ୍ରକୁ ଚାଲିଯାଉଛି। ସରକାର ଯଦି ୫ ହଜାର କୋଟି ଟଙ୍କା ରାଜସ୍ବ ପାଇବେ ତେବେ ବାଲି ନୀତି କାହିଁକି କରୁନାହାନ୍ତି। ତୁରନ୍ତ ବାଲି ନୀତି କରନ୍ତୁ ବୋଲି ମନ୍ତ୍ରୀଙ୍କୁ ବାଚସ୍ପତି ନିର୍ଦ୍ଦେଶ ଦେଇଥିଲେ। କଂଗ୍ରେସ ସଭ୍ୟ ତାରା ପ୍ରସାଦ ବାହିନୀପତି କହିଥିଲେ, ଆନ୍ଧ୍ରକୁ ଦୈନିକ ଶହ ଶହ ଟ୍ରକ୍ ବାଲି ଯାଉଛି। ମାଫିଆମାନେ ବାଲି ମୂଲ୍ୟ ବଢ଼ାଇ ବିିକ୍ରି କରୁଛନ୍ତି । ସରକାର ଯେଉଁ ନିଲାମ ରେଟ୍ ଦେଇଛନ୍ତି ତାହା ୨/୩ ମାସରେ ଭରଣା ହୋଇଯାଉଛି। ବର୍ଷତମାମ ସେମାନେ ବାଲି ବିକି ଚାଲିଛନ୍ତି। ସାଧାରଣ ଲୋକ ମୁଠାଏ ବାଲି ପାଉନି। ବାଲି ଟ୍ରାକ୍ଟର ଉପରେ ୬୦ ହଜାର ଟଙ୍କା ଜରିମାନା କରାଯାଉଛି। ବିଜେଡି ନେତାମାନେ ବାଲି ବେପାର କରିବେ, ଆଉ କେହି କରିବେ ନାହିଁ। ମନ୍ତ୍ରୀ କହିଥିଲେ, ବାଲି ଚୋରା ଚାଲାଣ ରୋକିବାକୁ ସ୍କ୍ବାଡ ଗଠନ ହୋଇଛି । ଲଘୁଖଣିଜ ପଦାର୍ଥ କନ୍ସେସନ ରୁଲ୍-୨୦୧୫ ଅନୁଯାୟୀ ଜରିମାନା କରାଯାଉଛି। ୫ ହଜାରରୁ ୫ ଲକ୍ଷ ଯାଏ ଜରିମାନା ହୋଇପାରିବ। କଂଗ୍ରେସ ସଭ୍ୟ ସୁରେଶ କୁମାର ରାଉତରାୟ, ସନ୍ତୋଷ ସିଂ ସାଲୁଜା ବାଲି ଚୋରିକୁ ନେଇ ଉଦ୍ବେଗ ପ୍ରକାଶ କରିଥିଲେ। ଦୁର୍ଦ୍ଦାନ୍ତ ଲୋକମାନେ ଜିଲାପାଳ ଓ ତହସିଲଦାରଙ୍କୁ ଧରି ବାଲି ନିଲାମ ନେଉଛନ୍ତି । ଭୁବନେଶ୍ୱର ଓ ଏହାର ଆଖପାଖ ନଦୀରୁ ବାଲି ଚୋରାରେ ବିକ୍ରିି ହେଉଛି। ହଜାର ହଜାର ଟ୍ରକ୍ ବାଲି ଆନ୍ଧ୍ର ଓ ପଶ୍ଚିମବଙ୍ଗକୁ ଚାଲିଯାଉଛି। ବାଲି ଉତ୍ତୋଳନ ଦ୍ୱାରା ପରିବେଶ ଉପରେ ପ୍ରଭାବ ପଡୁଛି। ନଦୀ ଗତିପଥ ବଦଳାଇ ଦେଉଛି। ସରକାର ଚୋରା ବାଲି ଚାଲାଣକୁ ତୁରନ୍ତ ବନ୍ଦ କରନ୍ତୁ । ମନ୍ତ୍ରୀ କହିଥିଲେ, ଚୋରି ରୋକିବାକୁ କଡ଼ା କାର୍ଯ୍ୟାନୁଷ୍ଠାନ ନିଆଯାଉଛି। ଏଥିପାଇଁ ଏକ ସ୍ବତନ୍ତ୍ର ନିର୍ଦ୍ଦେଶାଳୟ ଗଠନ ହୋଇଛି। ବାଲି ଏକ ଜରୁରୀ ଜିନିଷ। ୧୪୪ ବ୍ଲକ୍ ସମ୍ବେଦନଶୀଳ ରହିଛି। ସେହି ସବୁ ବ୍ଲକ୍ରେ ଚୋରା ଚାଲାଣ ବନ୍ଦ କରିବାକୁ ସରକାର ପଦକ୍ଷେପ ନେଉଛନ୍ତି । ବାଚସ୍ପତି ପୁଣି କହିଥିଲେ, ଏହା ରାଜ୍ୟର ସମସ୍ୟା। ତୁରନ୍ତ ବାଲି ନୀତି କାର୍ଯ୍ୟକାରୀ କରିବାକୁ ପରାମର୍ଶ ଦେଇଥିଲେ।
